Etiket: innerlike vrede (Page 3 of 3)

Les 17 – Ek sien geen neutrale dinge nie.

1. Hierdie idee is nog ’n stap in die rigting om oorsaak en gevolg, soos dit werklik in die wêreld voorkom, te identifiseer. ²Jy sien geen neutrale dinge nie, want jy het geen neutrale gedagtes nie. ³Dit is altyd die gedagte wat eerste kom, ten spyte van die versoeking om te glo dat dit presies omgekeerd is. ⁴Dit is nie die manier waarvolgens die wêreld dink nie, maar jy moet leer dat dit die manier is waarvolgens jy dink. ⁵As dit nie so was nie, sou persepsie geen oorsaak hê nie en sou dit self die oorsaak van die werklikheid wees. ⁶Gesien die uiters veranderlike aard daarvan, is dit allermins waarskynlik.

2. Wanneer jy vandag se idee toepas, sê vir jouself, met oop oë:

²Ek sien geen neutrale dinge nie, want ek het geen neutrale gedagtes nie.

³Kyk dan om jou heen, en laat jou blik lank genoeg op elke ding wat jy opmerk rus om te sê:

⁴Ek sien nie ’n neutrale __________ nie, want my gedagtes oor __________ is nie neutraal nie.

⁵Jy kan byvoorbeeld sê:

⁶Ek sien nie ’n neutrale muur nie, want my gedagtes oor mure is nie neutraal nie.

⁷Ek sien nie ’n neutrale liggaam nie, want my gedagtes oor liggame is nie neutraal nie.

3. Dit is soos gewoonlik noodsaaklik om geen onderskeid te maak tussen wat jy glo lewendig of leweloos, aangenaam of onaangenaam is nie. ²Afgesien van wat jy ook al mag glo, sien jy niks wat werklik lewend is, of regtig vreugdevol is nie. ³Dit is omdat jy tot nog toe onbewus is van enige gedagtes wat werklik waar, en daarom werklik vreugdevol is.

4. Drie of vier spesifieke oefenperiodes word aanbeveel, en ’n minimum van drie word benodig vir maksimale voordeel, al ondervind jy ook weerstand. ²Maar indien wel, kan die lengte van die oefenperiode verminder word tot minder as die minuut of meer wat aanbeveel word.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 17: I see no neutral things. (ACIM, W-17)

Les 16 – Ek het geen neutrale gedagtes nie.

1. Vandag se idee is die eerste stap om die oortuiging dat jou gedagtes geen gevolge het nie, uit die weg te ruim. ²Alles wat jy sien, is die resultaat van jou gedagtes. ³Daar bestaan geen uitsondering op hierdie feit nie. ⁴Gedagtes is nie groot of klein, sterk of swak nie. ⁵Hulle is bloot waar of onwaar. ⁶Dié wat waar is, skep na hulle eie beeld. ⁷Dié wat onwaar is, maak hulle s’n.

2. Geen enkele begrip weerspreek homself meer as dié een oor “ledige gedagtes” nie. ²Wat aanleiding gee tot die persepsie van ’n hele wêreld kan beswaarlik ledig genoem word. ³Elke gedagte wat jy het, dra by tot waarheid of illusie: óf dit brei die waarheid uit, óf dit vermenigvuldig illusies. ⁴Jy kan inderdaad niks vermenigvuldig nie, maar jy sal dit sodoende ook nie uitbrei nie.

3. Naas jou erkenning dat gedagtes nooit ledig is nie, is dit vir verlossing ook nodig dat jy erken dat elke gedagte wat jy het jou óf vrede óf oorlog besorg, óf liefde óf vrees. ²’n Neutrale resultaat is onmoontlik omdat ’n neutrale gedagte onmoontlik is. ³Daar bestaan so ’n groot versoeking om vreesgedagtes af te maak as onbelangrik, onbenullig en nie die moeite werd om jou oor te bekommer nie, dat dit noodsaaklik is dat jy insien dat hulle almal ewe destruktief, maar ewe onwerklik is. ⁴Ons sal hierdie idee in vele vorms oefen voordat jy dit regtig begryp.

4. Wanneer jy vandag se idee toepas, ondersoek jy jou geestesdenke eers vir ongeveer ’n minuut lank met geslote oë, en probeer bewustelik geen enkele “klein” gedagtetjie oor te slaan wat neig om die soektog te ontwyk nie. ²Dit is nogal moeilik totdat jy daaraan gewoond raak. ³Jy sal vind dat dit steeds vir jou moeilik is om nie tog ’n kunsmatige onderskeid te tref nie. ⁴Elke gedagte wat by jou opkom, afgesien van die waarde wat jy daaraan heg, is geskik om vandag se idee op toe te pas.

5. Herhaal tydens die oefenperiodes eers die idee vir jouself, en hou elke gedagte vas soos dit jou geestesdenke te binne skiet, terwyl jy vir jouself sê:

²Hierdie gedagte oor __________ is nie ’n neutrale gedagte nie.

³Daardie gedagte oor __________ is nie ’n neutrale gedagte nie.

⁴Gebruik vandag se idee soos gewoonlik, wanneer jy ook al bewus word van ’n spesifieke gedagte wat ongemak veroorsaak. ⁵Die volgende vorm word voorgestel vir hierdie doel:

⁶Hierdie gedagte oor __________ is nie ’n neutrale gedagte nie, want ek het nie neutrale gedagtes nie.

6. Vier of vyf oefenperiodes word aanbeveel, as jy hulle relatief maklik vind. ²As spanning ervaar word, sal drie genoeg wees. ³Die lengte van die oefenperiode behoort ook verminder te word as daar ongemak voorkom.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 16: I have no neutral thoughts. (ACIM, W-16)

Les 15 – My gedagtes is beelde wat ek gemaak het.

1. Juis omdat die gedagtes wat jy dink jy dink as beelde verskyn, herken jy hulle nie as niks nie. ²Jy dink dat jy hulle dink, en dus dink jy dat jy hulle sien. ³Dit is hoe jou “sien” tot stand gekom het. ⁴Dit is die funksie wat jy aan jou liggaam se oë gegee het. ⁵Dit is nie sien nie. ⁶Dit is die maak van beelde. ⁷Dit neem die plek van sien in en vervang visie met illusie.

2. Hierdie inleidende idee tot die proses van beelde maak wat jy sien noem, sal nie veel betekenis vir jou hê nie. ²Jy sal dit begin begryp wanneer jy klein ligrandjies rondom dieselfde bekende voorwerpe wat jy nou sien, gesien het. ³Dit is die begin van ware visie. ⁴Jy kan seker wees dat ware visie spoedig sal volg wanneer dit gebeur het.

3. Soos ons voortgaan, mag jy baie “momente van lig” ervaar. ²Hulle mag baie verskillende vorms aanneem, sommiges nogal heeltemal onverwags. ³Moenie vir hulle bang wees nie. ⁴Hulle is tekens dat jy uiteindelik jou oë begin oopmaak. ⁵Hulle sal nie aanhou nie, want hulle is bloot simbolies van ware persepsie, en hou nie verband met kennis nie. ⁶Hierdie oefeninge sal nie kennis vir jou openbaar nie. ⁷Maar hulle sal die pad daarheen voorberei.

4. Herhaal, in die beoefening van vandag se idee, dit eers vir jouself en pas dit dan toe op alles wat jy om jou sien deur dit by die naam te noem en jou oë daarop te laat rus, terwyl jy sê:

²Hierdie __________ is ’n beeld wat ek gemaak het.

³Daardie __________ is ’n beeld wat ek gemaak het.

⁴Dit is nie nodig om ’n groot aantal spesifieke voorwerpe vir die toepassing van vandag se idee in te sluit nie. ⁵Dit is egter nodig om aan te hou kyk na elke voorwerp terwyl jy die idee vir jouself herhaal. ⁶Die idee moet elke keer taamlik stadig herhaal word.

5. Alhoewel jy uit die aard van die tydsduur nie in staat sal wees om die idee op regtig baie dinge van toepassing te maak gedurende die oefenperiode van ongeveer ’n minuut wat aanbeveel word nie, moet jy probeer om die keuses so vry en willekeurig as moontlik te maak. ²Minder as ’n minuut sal voldoende wees vir die oefenperiodes as jy ongemaklik begin voel. ³Moenie meer as drie oefenperiodes vir vandag se idee hou nie, tensy jy geheel en al gemaklik daarmee voel, en moenie vier oorskry nie. ⁴Die idee kan egter gedurende die dag na behoefte toegepas word.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 15: My thoughts are images that I have made. (ACIM, W-15)

Les 14 – God het nie ’n betekenislose wêreld geskep nie.

1. Vandag se idee is natuurlik die rede waarom ’n betekenislose wêreld onmoontlik is. ²Wat God nie geskep het nie, bestaan nie. ³En alles wat bestaan, bestaan soos Hy dit geskep het. ⁴Die wêreld wat jy sien, het niks met die werklikheid te maak nie. ⁵Dit is jou eie maaksel en dit bestaan nie.

2. Vandag se oefeninge moet deurgaans met geslote oë gedoen word. ²Die tydperk waarin jy jou geestesdenke ondersoek, behoort kort te wees, hoogstens ’n minuut. ³Moenie meer as drie oefenperiodes met vandag se idee hou nie, tensy jy hulle gemaklik vind. ⁴Indien wel, sal dit wees omdat jy werklik begryp waartoe hulle dien.

3. Vandag se idee is ’n verdere stap om te leer om die gedagtes wat jy op die wêreld geskryf het, te laat vaar en in hulle plek die Woord van God te sien. ²Die eerste stappe in hierdie omruiling, wat in werklikheid verlossing genoem kan word, mag redelik moeilik en selfs behoorlik pynlik wees. ³Sommiges sal jou prontuit vreesbevange maak. ⁴Maar jy sal nie daar gelos word nie. ⁵Jy sal ver daarby verbygaan. ⁶Ons pad lei na volmaakte veiligheid en volmaakte vrede.

4. Dink met geslote oë aan al die afgryslikhede in die wêreld wat jou geestesdenke te binne skiet. ²Noem elkeen by die naam soos dit by jou opkom, en ontken dan die werklikheid daarvan. ³God het dit nie geskep nie, en dus is dit nie werklik nie. ⁴Sê byvoorbeeld:

⁵God het nie daardie oorlog geskep nie, en dit is dus nie werklik nie.

⁶God het nie daardie vliegtuigongeluk geskep nie, en dus is dit nie werklik nie.

⁷God het nie daardie ramp (spesifiseer) geskep nie, en dit is dus nie werklik nie.

5. Geskikte onderwerpe vir die toepassing van vandag se idee sluit ook enigiets in wat jy bang is met jou mag gebeur, of met enigeen oor wie jy besorgd is. ²Die “ramp” moet in elke geval spesifiek omskryf word. ³Moenie algemene terme gebruik nie. ⁴Moet byvoorbeeld nie sê: “God het nie siekte geskep nie,” maar: “God het nie kanker geskep nie,” of hartaanvalle, of wat ook al vrees by jou ontlok.

6. Dit is jou persoonlike repertoire van afgryslikhede waarna jy kyk. ²Hierdie dinge is deel van die wêreld wat jy sien. ³Sommige daarvan is gemeenskaplike illusies, en ander is deel van jou persoonlike hel. ⁴Dit maak nie saak nie. ⁵Wat God nie geskep het nie, kan slegs in jou eie geestesdenke, apart van Syne, bestaan. ⁶Daarom het dit geen betekenis nie. ⁷Sluit, ter erkenning van hierdie feit, die oefenperiodes af met ’n herhaling van vandag se idee:

⁸God het nie ’n betekenislose wêreld geskep nie.

7. Vandag se idee kan natuurlik op enigiets toegepas word wat, buite die oefenperiodes, jou gedurende die dag ontstel. ²Wees baie spesifiek in die toepassing daarvan. ³Sê:

⁴God het nie ’n betekenislose wêreld geskep nie. ⁵Hy het nie (spesifiseer die situasie wat jou ontstel) geskep nie en dit is dus nie werklik nie.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 14: God did not create a meaningless world. (ACIM, W-14)

Les 13 – ’n Betekenislose wêreld veroorsaak vrees.

1. Vandag se idee is in werklikheid net ’n ander vorm van die vorige een, behalwe dat dit meer spesifiek is oor die emosie wat opgewek word. ²’n Betekenislose wêreld is eintlik onmoontlik. ³Daar bestaan niks sonder betekenis nie. ⁴Dit beteken egter nie dat jy nie sal dink dat jy iets waarneem wat nie betekenis het nie. ⁵Jy sal, inteendeel, hoogswaarskynlik dink dat jy dit wel waarneem.

2. Die herkenning van betekenisloosheid ontlok intense angs in alle geskeide mense. ²Dit verteenwoordig ’n situasie waar God en die ego mekaar “uitdaag” oor wie se betekenis in die oop spasie geskryf moet word wat die betekenisloosheid veroorsaak. ³Die ego storm rasend in om ten alle koste sy eie idees daar neer te plak, bang dat die leegte andersins gebruik sal word om sy eie onvermoë en onwerklikheid te bewys. ⁴En slegs in hierdie opsig is hy korrek.

3. Dit is daarom noodsaaklik dat jy leer om die betekenislose te herken en sonder vrees te aanvaar. ²As jy bang is, sal jy sekerlik eienskappe aan die wêreld toeken waaroor dit nie beskik nie en dit met beelde en voorstellings vul wat nie bestaan nie. ³Vir die ego is illusies veiligheidsmaatreëls, soos hulle heelwaarskynlik vir jou ook sal wees wat jouself met die ego gelykstel.

4 Vandag se oefeninge wat ongeveer drie of vier keer gedoen moet word vir nie langer as ’n minuut of wat op ’n keer nie, moet op ’n ietwat ander manier as die voriges toegepas word. ²Herhaal vandag se idee vir jouself met geslote oë. ³Maak dan jou oë oop, kyk stadig om jou heen terwyl jy sê:

⁴Ek kyk na ’n betekenislose wêreld.

⁵Herhaal hierdie stelling vir jouself soos jy rondkyk. ⁶Maak dan jou oë toe en sluit af met:

⁷’n Betekenislose wêreld veroorsaak vrees, omdat ek dink dat ek met God meeding .

5. Jy mag dit moeilik vind om nie weerstand van een of ander aard op hierdie laaste uitspraak te ervaar nie. ²Ongeag watter vorm hierdie weerstand ook al mag aanneem, moet jy jouself daaraan herinner dat jy in werklikheid vir so ’n gedagte bang is vanweë die “wraak” van die “vyand.” ³Daar word nie van jou verwag om die uitspraak op hierdie stadium te glo nie, en jy sal dit heelwaarskynlik as absurd van die hand wys. ⁴Let egter versigtig op enige tekens van verbloemde of onverbloemde vrese wat dit mag opwek.

6. Dit is ons eerste poging tot die uitspreek van ’n eksplisiete oorsaak-en-gevolgverhouding, en wel van ’n soort wat jy nog uiters moeilik vind om te herken. ²Moenie stilstaan by die slotuitspraak nie, en probeer om nie eers daaraan te dink nie, behalwe tydens die oefenperiodes. ³Dit sal op hierdie stadium voldoende wees.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 13: A meaningless world engenders fear. (ACIM, W-13)

Les 12 – Ek voel ontsteld omdat ek ’n betekenislose wêreld sien.

1. Die belangrikheid van hierdie idee lê in die feit dat dit ’n korreksie bevat van ’n belangrike verdraaiing in jou persepsie. ²Jy dink dat dit ’n vreesaanjaende wêreld is wat jou ontstel, of ’n treurige wêreld, of ’n gewelddadige wêreld, of ’n kranksinnige wêreld. ³Jy het al hierdie eienskappe daaraan toegeken. ⁴Die wêreld is op sigself egter sonder betekenis.

2. Hierdie oefeninge word met oop oë gedoen. ²Kyk om jou heen, hierdie keer taamlik stadig. ³Probeer ’n tempo vind wat jou blik in ’n rustige en reëlmatige ritme van een ding na ’n ander kan laat gly. ⁴Moenie dat die tydsduur van die verskuiwing merkbaar langer of korter word nie, maar probeer liewer om deurlopend ’n afgemete gelykmatige tempo te handhaaf. ⁵Wat jy sien, maak nie saak nie. ⁶Dit leer jy jouself wanneer jy aan alles waarop jou blik ook al mag rus ewe veel aandag en ewe veel tyd gee. ⁷Dit is ’n eerste tree om te leer om aan alles gelyke waarde toe te ken.

3. Sê vir jouself, soos jy om jou rondkyk:

²Ek dink ek sien ’n angswekkende wêreld, ’n gevaarlike wêreld, ’n vyandige wêreld, ’n treurige wêreld, ’n bose wêreld, ’n mal wêreld,

ensovoorts, deur enige beskrywende terme te gebruik wat by jou mag opkom. ³As daar terme by jou opkom wat eerder positief as negatief lyk, sluit hulle in. ⁴Jy sou byvoorbeeld kon dink aan “’n goeie wêreld,” of “’n bevredigende wêreld.” ⁵As sulke terme by jou opkom, gebruik hulle saam met die res. ⁶Jy mag miskien nog nie begryp waarom hierdie “aangename” byvoeglike naamwoorde in hierdie oefeninge tuishoort nie, maar onthou dat ’n “goeie wêreld” ’n “slegte” een impliseer, en ’n “bevredigende wêreld” ’n “onbevredigende” een. ⁷Alle terme wat in jou geestesdenke opkom, is geskik as onderwerp vir vandag se oefeninge. ⁸Hulle oënskynlike kwaliteit maak nie saak nie.

4. Maak seker dat jy nie die tydsduur varieer wanneer jy vandag se idee toepas op wat jy dink aangenaam en wat jy dink onaangenaam is nie. ²Vir die doel van hierdie oefeninge is daar geen verskille tussen hulle nie. ³Voeg aan die einde van die oefenperiode by:

⁴Maar ek voel ontsteld omdat ek ’n betekenislose wêreld sien.

5. Wat betekenisloos is, is nie goed of sleg nie. ²Waarom sou ’n betekenislose wêreld jou dan ontstel? ³As jy die wêreld as betekenisloos sou kon aanvaar en toelaat dat die waarheid vir jou daarop geskrywe word, sou dit jou onbeskryflik gelukkig maak. ⁴Maar juis omdat dit betekenisloos is, voel jy genoodsaak om daarop te skryf wat jy wil hê dit moet wees. ⁵En dít is wat jy daarin sien. ⁶En dít is wat in waarheid geen betekenis het nie. ⁷Onder jou woorde staan die Woord van God geskrywe. ⁸Die waarheid ontstel jou nou, maar wanneer jou woorde uitgevee is, sal jy Syne sien. ⁹Dit is die uiteindelike doel van hierdie oefeninge.

6. Dit is genoeg om die idee vandag drie of vier keer te oefen. ²Die oefenperiodes moet ook nie langer as ’n minuut duur nie. ³Selfs dit mag jy te lank vind. ⁴Staak die oefeninge sodra jy ’n gevoel van spanning ervaar.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 12: I am upset because I see a meaningless world. (ACIM, W-12)

Les 10 – My gedagtes beteken niks nie.

1. Hierdie idee is van toepassing op al die gedagtes waarvan jy bewus is, of bewus van word tydens die oefenperiodes. ²Die rede waarom die idee op hulle almal van toepassing is, is dat hulle nie jou werklike gedagtes is nie. ³Ons het al voorheen hierdie onderskeid gemaak, en sal dit weer doen. ⁴Jy het tot nog toe nog nie ’n basis vir vergelyking nie. ⁵Sodra jy het, sal jy geen twyfel daaroor hê dat wat jy eers geglo het jou gedagtes was, niks beteken het nie.

2. Dit is die tweede keer dat ons hierdie soort idee gebruik. ²Die vorm alleen is ’n bietjie anders. ³Hierdie keer word die idee begin met “My gedagtes” in plaas van “Hierdie gedagtes”, en word nie uiterlik en by name verbind met die dinge rondom jou nie. ⁴Die klem is nou op die gebrek aan werklikheid van wat jy dink jy dink.

3. Hierdie aspek van die korreksieproses het begin met die idee dat die gedagtes waarvan jy bewus is, betekenisloos is, en eerder buite jou as binne jou was; en daarna is beklemtoon dat hulle status in die verlede gelê het eerder as in die hede. ²Nou beklemtoon ons dat die teenwoordigheid van hierdie “gedagtes” juis beteken dat jy nie dink nie. ³Dit is bloot ’n ander manier om ons vorige stelling te herhaal dat jou geestesdenke in werklikheid leeg is. ⁴Om dit te erken, beteken om te erken dat jy niks sien nie, as jy dink dat jy dit sien. ⁵As sodanig is hierdie erkenning die voorwaarde vir visie.

4. Sluit jou oë vir hierdie oefeninge, en begin hulle deur vandag se idee redelik stadig vir jouself te herhaal. ²Voeg dan by:

³Hierdie idee sal help om my te bevry van alles wat ek nou glo.

⁴Die oefeninge bestaan, soos voorheen, daaruit om jou geestesdenke te ondersoek vir alle gedagtes wat daar beskikbaar is, sonder om te kies of te oordeel. ⁵Probeer om enige soort indelings te vermy. ⁶As dit jou sou help, kon jy jou trouens voorstel dat jy ’n eienaardig saamgestelde optog sien verbybeweeg wat vir jou min of geen persoonlike betekenis het nie. ⁷En soos elke gedagte deur jou geestesdenke gaan, sê jy:

⁸My gedagte oor __________ beteken niks nie.

⁹My gedagte oor __________ beteken niks nie.

5. Vandag se idee kan vanselfsprekend nuttig wees vir enige gedagtes wat jou op ’n gegewe tydstip kwel. ²Vyf oefenperiodes word bykomend aanbeveel, nie een langer as ongeveer ’n minuut se ondersoek van die geestesdenke nie. ³Dit word nie aanbeveel dat hierdie tydsduur oorskry word nie, en dit moet na ’n halwe minuut of korter verminder word as jy ongemak ervaar. ⁴Onthou egter om die idee stadig te herhaal voordat dit spesifiek toegepas word, en ook om by te voeg:

⁵Hierdie idee sal help om my te bevry van alles wat ek nou glo.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 10: My thoughts do not mean anything. (ACIM, W-10)

Les 9 – Ek sien niks soos dit nou is nie.

1. Hierdie idee volg baie duidelik uit die twee voriges. ²Maar alhoewel jy dit miskien intellektueel kan aanvaar, is dit onwaarskynlik dat dit nou al iets vir jou sal beteken. ³Begrip is egter nie op die oomblik nodig nie. ⁴In werklikheid is die erkenning dat jy nie begryp nie ’n voorvereiste om jou vals idees ongedaan te maak. ⁵Dit gaan in hierdie oefeninge oor beoefening, nie oor begrip nie. ⁶Jy hoef nie te oefen wat jy alreeds begryp nie. ⁷Jy sou trouens heel onlogies wees as jy sou mik na begrip, en terselfdertyd aanneem dat jy reeds daaroor beskik.

2. Dit is moeilik vir ongeoefende geestesdenke om te glo dat dit wat hy hom dan so duidelik verbeel, nie daar is nie. ²Hierdie idee kan nogal verontrustend wees en hewige weerstand ondervind, in velerlei vorm. ³Maar dit belet nie die toepassing daarvan nie. ⁴Niks meer word dan ook gevra van hierdie of enige ander oefeninge nie. ⁵Elke klein stappie sal ’n bietjie van die duisternis uit die weg ruim, en begrip sal uiteindelik elke hoekie in die geestesdenke, wat skoongemaak is van die puin wat dit verdonker het, kom verlig.

3. Hierdie oefeninge waarvoor drie of vier oefenperiodes voldoende is, behels om rondom jou te kyk en vandag se idee toe te pas op wat jy ook al sien, gedagtig aan die behoefte om dit willekeurig toe te pas, asook die noodsaaklike reël om niks opsetlik uit te sluit nie. ²Byvoorbeeld:

³Ek sien nie hierdie tikmasjien soos dit nou is nie.

⁴Ek sien nie hierdie telefoon soos dit nou is nie.

⁵Ek sien nie hierdie arm soos dit nou is nie.

4. Begin met dinge wat naaste aan jou is, en verbreed dan jou veld na buite:

²Ek sien nie daardie kapstok soos dit nou is nie.

³Ek sien nie daardie deur soos dit nou is nie.

⁴Ek sien nie daardie gesig soos dit nou is nie.

5. Dit word weer beklemtoon dat, alhoewel daar nie gepoog moet word om alles in te sluit nie, dit vermy moet word om iets opsetlik uit te sluit. ²Sorg dat jy eerlik met jouself is wanneer jy hierdie onderskeiding maak. ³Jy mag in die versoeking gestel word om dit te verdoesel.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 9: I see nothing as it is now. (ACIM, W-9)

Les 5 – Ek is nooit ontsteld om die rede wat ek dink nie.

1. Hierdie idee kan, soos die vorige een, gebruik word ten opsigte van enige persoon, situasie of gebeurtenis wat jy dink jou pyn veroorsaak. ²Pas dit spesifiek toe op wat jy ook al glo die oorsaak van jou ontsteltenis is, en gebruik die beskrywing van die gevoel op enige wyse wat vir jou reg lyk. ³Die ontsteltenis mag voorkom as vrees, bekommernis, depressie, angs, woede, haat, jaloesie of etlike ander vorme, wat jy almal as verskillend sal waarneem. ⁴Dit is nie waar nie. ⁵Voordat jy egter geleer het dat die vorm nie saak maak nie, is elke vorm ’n geskikte onderwerp vir vandag se oefeninge. ⁶Die toepassing van dieselfde idee op elkeen afsonderlik is die eerste stap na die uiteindelike erkenning dat hulle almal dieselfde is.

2. Wanneer jy vandag se idee gebruik vir die oorsaak van ’n ontsteltenis, in enige vorm wat jy waargeneem het, gebruik dan sowel die naam van die vorm waarin jy die ontsteltenis sien, asook die oorsaak wat jy daaraan toeskryf. ²Byvoorbeeld:

³Ek is nie kwaad vir __________ om die redes wat ek dink nie.

⁴Ek is nie bang vir __________ om die redes wat ek dink nie.

3. Maar weereens, dit moet nie vervang word met oefenperiodes waartydens jy jou geestesdenke eers ondersoek vir, wat jy glo, die “oorsake” van jou ontsteltenis is nie, en die vorms van ontsteltenis wat jy dink daaruit voortvloei nie.

4. Jy mag dit in hierdie oefeninge, meer as in voriges, moeilik vind om nie te diskrimineer nie, en te verhoed om aan sommige onderwerpe meer gewig toe te ken as aan ander. ²Dit kan help om die oefeninge met die volgende stelling vooraf te gaan:

³Daar is geen klein vorme van ontsteltenis nie. ⁴Hulle is almal ewe steurend vir my innerlike vrede.

5. Ondersoek dan jou geestesdenke vir wat jou ook al bekommer, ongeag hoeveel of hoe min jy dink dit jou bekommer.

6. Jy mag ook vind dat jy minder gewillig is om vandag se idee toe te pas op sekere vermeende oorsake van ontsteltenis as op ander. ²As dit gebeur, dink eers hieraan:

³Ek kan nie hierdie vorm van ontsteltenis behou en die ander laat gaan nie. ⁴Vir die doel van hierdie oefeninge sal ek hulle dus almal as dieselfde beskou.

7. Ondersoek jou geestesdenke dan vir nie langer as ongeveer ’n minuut nie, en probeer om ’n aantal verskillende vorms van ontsteltenis wat jou bekommer, te identifiseer, ongeag die relatiewe belangrikheid wat jy miskien aan hulle toeken. ²Pas vandag se idee op elkeen van hulle toe deur beide die naam van die bron van ontsteltenis te noem, soos jy dit sien, asook die gevoel, soos jy dit ervaar. ³Verdere voorbeelde is:

⁴Ek is nie bekommerd oor _________ om die redes wat ek dink nie.

⁵Ek is nie depressief oor __________om die redes wat ek dink nie.

⁶Drie of vier keer gedurende die dag is genoeg.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 5: I am never upset for the reason I think. (ACIM, W-5)

Les 4 – Hierdie gedagtes beteken niks nie.

Hierdie gedagtes beteken niks nie.

Hulle is soos die dinge wat ek in hierdie kamer

(in hierdie straat, uit hierdie venster, op hierdie plek) sien.

1. In teenstelling tot die voriges, begin hierdie oefeninge nie met die idee van die dag nie. ²Begin hierdie oefenperiode deur vir ’n minuut te let op die gedagtes wat deur jou geestesdenke gaan. ³Pas dan die idee daarop toe. ⁴As jy reeds van ongelukkige gedagtes bewus is, gebruik hulle dan as onderwerp vir die idee. ⁵Moet egter nie net die gedagtes wat jy dink “sleg” is, kies nie. ⁶Jy sal vind, as jy jouself oefen om na jou gedagtes te kyk, dat hulle so ’n verskeidenheid verteenwoordig dat nie een daarvan in ’n sekere sin “goed” of “sleg” genoem kan word nie. ⁷Dit is waarom hulle niks beteken nie.

2. By die keuse van onderwerpe vir die toepassing van vandag se idee, is dit soos gewoonlik nodig om spesifiek te wees. ²Moenie bang wees om “goeie” sowel as “slegte” gedagtes te gebruik nie. ³Nie een van hulle gee jou ware gedagtes weer wat deur hulle geheim gehou word nie. ⁴Die “goeies” is slegs skaduwees van wat daaragter lê, en skaduwees bemoeilik sig. ⁵Die “slegtes” blokkeer sig, en maak sien onmoontlik. ⁶Jy wil nie een van die twee hê nie.

3. Hierdie oefening is belangrik, en sal van tyd tot tyd in ietwat verskillende vorm herhaal word. ²Die mikpunt hier is om jou die eerste stappe te leer na die einddoel om die betekenislose van die betekenisvolle te skei. ³Dit is die eerste poging in die langtermyn doel om die betekenislose buite jou te leer sien, en die betekenisvolle binne jou. ⁴Dit is ook die begin daarvan om jou geestesdenke te oefen om te herken wat dieselfde is en wat verskillend is.

4. Tipeer elke gedagte wat jy vir die toepassing van die idee van vandag gebruik volgens die sentrale figuur of gebeurtenis wat dit bevat, byvoorbeeld:

²Hierdie gedagte oor __________ beteken niks nie.

³Dit is soos die dinge wat ek in hierdie kamer

(in hierdie straat, ensovoorts) sien.

5. Jy kan ook die idee gebruik vir enige spesifieke gedagte wat jy as skadelik beskou.

²Hierdie gebruik is nuttig, maar is nie ’n plaasvervanger vir die meer willekeurige werkwyses wat tydens oefeninge gevolg moet word nie. ³Moet egter nie jou geestesdenke vir langer as ongeveer ’n minuut ondersoek nie. ⁴Jy is nog te onervare om die neiging te vermy om doelloos in gedagtes versonke te raak.

6. Omdat hierdie oefeninge bowendien die eerste van hul soort is, mag jy dit besonder moeilik vind om alle oordeel in verband met gedagtes op te skort. ²Moenie hierdie oefeninge meer as drie of vier keer gedurende die dag herhaal nie. ³Ons sal later daarna terugkeer.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 4: These thoughts do not mean anything. They are like the things I see in this room [on this street, from this window, in the place]. (ACIM, W-4)

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

Sluit aan by ons e-poslys