Hier is die volgende idees om vandag te hersien:

1.             (41) God gaan met my, waar ek ook al gaan.

2Hoe kan ek alleen wees as God altyd saam met my gaan? 3Hoe kan ek twyfelagtig en onseker oor myself wees as daar volmaakte sekerheid in Hom rus? 4Hoe kan ek deur enigiets ontstel word as Hy in my woon in absolute vrede? 5Hoe kan ek ly as liefde en vreugde my, danksy Hom, omring. 6Laat ek geen illusies oor myself koester nie. 7Ek is volmaak, want God gaan met my, waar ek ook al gaan.

2.             (42) God is my Krag. 2Visie is Sy geskenk.

3Laat ek nie vandag op my eie oë staatmaak om te sien nie. 4Laat ek gewillig wees om my jammerlike illusie van wat sien is, te verruil vir die visie wat deur God gegee word. 5Christus se visie is Sy geskenk, en Hy het dit vir my gegee. 6Laat ek my vandag op hierdie geskenk beroep, sodat hierdie dag my kan help om die ewigheid te begryp.

3.             (43) God is my Bron. 2Los van Hom kan ek nie sien nie.

3Ek kan sien wat God wil hê ek moet sien. 4Ek kan nie enigiets anders sien nie. 5Buite Sy Wil is daar slegs illusies. 6Dít is wat ek kies wanneer ek dink ek los van Hom kan sien. 7Dít is wat ek kies wanneer ek probeer om met die liggaam se oë te sien. 8Tog is die visie van Christus vir my gegee om hulle te vervang. 9Dit is met hierdie visie dat ek wil sien.

4.             (44) God is die lig waarin ek sien.

2Ek kan nie in die duisternis sien nie. 3God is die enigste lig. 4As ek dus wil sien, moet dit deur Hom wees. 5Ek het probeer bepaal wat sig is, en ek was verkeerd. 6Nou word dit my gegee om te begryp dat God die Lig is waarin ek sien. 7Laat ek visie, en die gelukkige wêreld wat dit my sal wys, verwelkom.

5.             (45) God is die Geestesdenke waarmee ek dink.

2Ek het geen gedagtes wat ek nie met God deel nie. 3Ek het apart van Hom geen gedagtes nie, want ek het geen geestesdenke apart van Syne nie. 4As deel van Sy Geestesdenke is my gedagtes Syne en Sy Gedagtes myne.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 59: Review (41-45). (ACIM, W-59)