Etiket: Geestelike groei (Page 1 of 2)

Les 72 – Om griewe te koester, is ’n aanval op God se plan vir verlossing.

Augustus 1, 2026 /

1. Hoewel ons vasgestel het dat die ego se verlossingsplan die teenoorgestelde van God se verlossingsplan is, het ons nog nie beklemtoon dat dit ’n aktiewe aanval op Sy plan, en ’n doelbewuste poging om dit te vernietig, is nie. 2In die aanval word aan God eienskappe toegeken wat eintlik met die ego geassosieer word, terwyl die ego skyn om God se eienskappe aan te neem.

2. Die ego se fundamentele wens is om God se plek in te neem. 2Die ego is in werklikheid die fisiese beliggaming van daardie wens. 3Want dit is daardie wens wat lyk asof dit die geestesdenke met ’n liggaam beklee, wat dit apart en alleen hou, en nie in staat stel om ander se geestesdenke te bereik nie, behalwe deur die liggaam wat gemaak was om dit gevange te hou. 4Die beperking op kommunikasie kan nie die beste metode wees om kommunikasie uit te brei nie. 5Nogtans sal die ego jou wysmaak dat dit so is.

3. Al sou die pogings om die beperkings te handhaaf wat ’n liggaam probeer voorskryf hier glashelder wees, is dit miskien nie so duidelik waarom die koestering van griewe ’n aanval op God se plan vir verlossing is nie. 2Maar laat ons dan die soort dinge waaroor jy geneig is om griewe te koester, in oorweging neem. 3Word hulle nie altyd geassosieer met iets wat ’n liggaam doen nie? 4’n Persoon sê iets waarvan jy nie hou nie. 5Hy doen iets waarvan jy nie hou nie. 6Hy “verraai” sy vyandige gedagtes deur sy gedrag.

4. Dit gaan vir jou hier glad nie oor wat die persoon is nie. 2Inteendeel, jy is uitsluitlik besorgd oor wat hy in ’n liggaam doen. 3Jy doen alles behalwe om hom te help om hom van die liggaam se beperkinge te bevry. 4Jy is aktief besig om hom daaraan te bind deur hom daarmee te verwar, en deur hulle oor een kam te skeer. 5Hiermee word God aangeval, want as Sy Seun slegs ’n liggaam is, moet Hy ook so wees. 6’n Skepper wat heeltemal anders as sy skepping is, is ondenkbaar.

5. As God ’n liggaam is, wat moet Sy plan vir verlossing dan wees? 2Wat kan dit anders as die dood wees? 3Deur Homself te probeer voorstel as die Outeur van lewe en nie van dood nie, is Hy ’n leuenaar en bedrieër vol valse beloftes, wat illusies in plaas van die waarheid aanbied. 4Die liggaam se oënskynlike werklikheid maak hierdie siening van God heel oortuigend. 5Om die waarheid te sê, as die liggaam werklik sou wees, sou dit inderdaad moeilik wees om hierdie gevolgtrekking vry te spring. 6En elke grief wat jy koester, is ’n dwingende beklemtoning dat die liggaam werklik is. 7Dit ignoreer geheel en al wat jou broer is. 8Dit versterk jou geloof dat hy ’n liggaam is, en jy veroordeel hom daarvoor. 9Dit voer aan dat sy verlossing die dood moet wees, en projekteer hierdie aanval op God, en hou Hom daarvoor verantwoordelik.

6. Na hierdie goed voorbereide arena, waar kwaai diere hul prooi soek en geen genade geduld word nie, kom die ego nou om jou te red. 2God het jou ’n liggaam gemaak. 3Baie goed. 4Laat ons dit aanvaar en bly wees. 5Moenie jouself, as ’n liggaam, laat ontneem van wat die liggaam te bied het nie. 6Vat die bietjie wat jy kan kry. 7God het jou niks gegee nie. 8Die liggaam is jou enigste verlosser. 9Hy is God se dood en jou verlossing.

7. Dit is die universele geloof van die wêreld wat jy sien. 2Sommiges haat die liggaam en probeer hom seermaak en verneder. 3Ander het weer die liggaam lief, en probeer om hom te verheerlik en op te hemel. 4Maar solank die liggaam sentraal staan in jou konsep van jouself, is jy besig om God se plan vir verlossing aan te val en koester jy griewe teen Hom en Sy skepping, sodat jy nie die Stem van die waarheid kan hoor en Hom as Vriend kan verwelkom nie. 5Jou uitverkore verlosser het Sy plek ingeneem. 6Dit is jou vriend; Hy is jou vyand.

8. Ons sal vandag probeer om hierdie sinlose aanvalle op verlossing te staak. 2Ons sal in plaas daarvan probeer om verlossing te verwelkom. 3Jou onderstebo persepsie het die innerlike vrede geruïneer. 4Jy het jouself in ’n liggaam gesien, en die waarheid buite jou, uitgesluit van jou bewussyn deur die beperkinge van die liggaam. 5Nou gaan ons probeer om dit anders te sien.

9. Die lig van die waarheid is in ons, waar dit deur God geplaas was. 2Dit is die liggaam wat buite ons is, en wat nie van belang is nie. 3Om sonder ’n liggaam te wees, beteken om in ons natuurlike staat te wees. 4Om die lig van die waarheid in ons te herken, is om onsself soos ons is, te herken. 5Om ons Self as los van die liggaam te sien, beteken om die aanval op God se plan vir verlossing te staak en dit in plaas daarvan te aanvaar. 6En waar Sy plan ook al aanvaar word, is dit reeds volbring.

10. Ons doel tydens die langer oefenperiodes vandag is om daarvan bewus te word dat God se plan vir verlossing alreeds in ons volbring is. 2Om hierdie doel te bereik, moet ons aanval vervang met aanvaarding. 3Solank ons dit aanval, kan ons nie begryp wat God se plan vir ons is nie. 4Ons val dus aan wat ons nie herken nie. 5Nou gaan ons probeer om weg te doen met oordeel, en te vra wat God se plan vir ons is:

              6Wat is verlossing, Vader? 7Ek weet nie. 8Sê vir my, sodat ek kan begryp.

9Dan sal ons in stilte op Sy antwoord wag. 10Ons het God se plan vir verlossing aangeval sonder om te wag en te hoor wat dit is. 11Ons het ons griewe so hard uitgeskreeu dat ons nie na Sy stem geluister het nie. 12Ons het ons griewe gebruik om ons oë te sluit en ore toe te stop.

11. Nou sal ons sien en hoor en leer. 2“Wat is verlossing, Vader?” 3Vra en jy sal antwoord gegee word. 4Soek en jy sal vind. 5Ons vra nie meer die ego wat verlossing is nie en waar om dit te vind nie. 6Ons vra dit van die waarheid. 7Wees dus verseker dat die antwoord waar sal wees, op grond van Wie jy vra.

12. Elke keer as jy voel dat jou vertroue afneem en jou hoop op sukses kwyn en sterf, herhaal jou vraag en jou versoek, en onthou dat jy nou ’n vraag stel aan die oneindige Skepper van oneindigheid, Wat jou soos Homself geskep het:

              2Wat is verlossing, Vader? 3Ek weet nie. 4Sê vir my, sodat ek kan begryp.

5Hy sal antwoord. 6Wees vasbeslote om te hoor.

13. Een of miskien twee korter oefenperiodes elke uur sal vandag genoeg wees, omdat hulle ietwat langer as gewoonlik sal wees. 2Hierdie oefeninge moet begin met:

3Om griewe te koester, is ’n aanval op God se plan vir verlossing. 4Laat ek dit in plaas van griewe aanvaar. 5Wat is verlossing, Vader?

6Bly dan min of meer ’n minuut in stilte, verkieslik met geslote oë, en luister en wag op Sy antwoord.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 72: Holding grievances is an attack on God’s plan for salvation. (ACIM, W-72)

Les 46 – God is die Liefde waarin ek vergewe.

Augustus 30, 2025 /

1. God vergewe nie, want Hy het nooit veroordeel nie. 2En daar moet veroordeling wees voordat vergifnis nodig is. 3Vergifnis is die groot behoefte van hierdie wêreld, maar dit is omdat dit ’n wêreld van illusies is. 4Dié wat vergewe, bevry hulleself dus van illusies, terwyl dié wat hulle van vergifnis weerhou, hulleself daaraan bind. 5Net soos jy alleen jouself veroordeel, vergewe jy ook alleen jouself.

2. Maar alhoewel God nie vergewe nie, is Sy Liefde nietemin die basis vir vergifnis. 2Vrees veroordeel en liefde vergewe. 3Vergifnis maak ongedaan wat deur vrees veroorsaak is, en laat die geestesdenke weer terugkeer om bewus te word van God. 4Om hierdie rede kan vergifnis waarlik verlossing genoem word. 5Dit is die middel waardeur illusies verdwyn.

3. Vandag se oefeninge vereis ten minste drie oefenperiodes van ’n volle vyf minute elk, en soveel korter toepassings as moontlik. 2Begin die langer oefenperiodes deur vandag se idee, soos gewoonlik, vir jouself te herhaal. 3Sluit jou oë as jy dit doen en bestee ’n minuut of twee om jou geestesdenke te ondersoek vir diegene wat jy nog nie vergewe het nie. 4Dit maak nie saak “hoeveel” jy hulle nie vergewe het nie. 5Jy het hulle volkome vergewe of glad nie.

4. As jy die oefeninge goed doen, sal dit nie vir jou moeilik wees om ’n aantal mense te kry wat jy nie vergewe het nie. 2Jy kan van die veilige veronderstelling uitgaan dat enigeen van wie jy nie hou nie, ’n geskikte onderwerp is. 3Noem elkeen op sy naam en sê:

              4God is die Liefde waarin ek jou, (naam), vergewe.

5. Die bedoeling van die eerste fase van vandag se oefenperiodes is om jou in staat te stel om jouself te vergewe. 2Nadat jy die idee toegepas het op almal wat in jou geestesdenke opgekom het, sê vir jouself:

              3God is die Liefde waarin ek myself vergewe.

4Bestee dan die res van die oefenperiode daaraan om verwante idees, soos die volgende, by te voeg:

              5God is die Liefde waarmee ek myself lief het.

              6God is die Liefde waarin ek geseënd is.

6. Die toepassingsvorm mag aansienlik varieer, maar die sentrale idee moet nie uit die oog verloor word nie. 2Jy sou byvoorbeeld kon sê:

              3Ek kan nie skuldig wees nie, want ek is ’n Seun van God.

              4Ek is alreeds vergewe.

            5Geen vrees is moontlik in geestesdenke wat deur God bemin word nie.

              6Dit is nie nodig om aan te val nie, want liefde het my vergewe.

7Die oefenperiode moet egter eindig met ’n herhaling van die dag se idee soos dit oorspronklik gestel is.

7. Die korter oefenperiodes kan bestaan uit óf ’n herhaling van die dag se idee in sy oorspronklike óf in ’n verwante vorm, net soos jy verkies. 2Sorg egter om meer spesifieke toepassings te maak as dit nodig is. 3Hulle sal nodig wees op elke oomblik van die dag wanneer jy bewus word van enige soort negatiewe reaksie teenoor iemand, hetsy teenwoordig of nie. 4In dié geval, sê stil vir hom:

              5God is die Liefde waarin ek jou vergewe.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 46: God is the Love in which I forgive. (ACIM, W-46)

Les 43 – God is my Bron. Los van Hom kan ek nie sien nie.

Augustus 27, 2025 /

1. Persepsie is nie ’n eienskap van God nie. 2Aan Hom behoort die koninkryk van kennis. 3Maar Hy het die Heilige Gees geskep as die Middelaar tussen persepsie en kennis. 4Sonder hierdie skakel met God sou persepsie vir ewig die plek van kennis in jou geestesdenke ingeneem het. 5Met hierdie skakel met God sal persepsie so verander en gesuiwer word dat dit na kennis lei. 6Dit is sy funksie soos die Heilige Gees dit sien. 7Daarom is dit in waarheid sy funksie.

2. In God kan jy nie sien nie. 2Persepsie het nie ’n funksie in God nie en bestaan nie. 3Maar in verlossing, wat die ongedaanmaking behels van wat nooit was nie, het persepsie ’n grootse doel. 4Deur die Seun van God vir ’n onheilige doel gemaak, moet dit die middel word waarmee hy weer van sy heiligheid bewus word. 5Persepsie het geen betekenis nie. 6Nogtans gee die Heilige Gees ’n betekenis daaraan wat baie na aan die betekenis van God Self is. 7Geneesde persepsie word die middel waardeur die Seun van God sy broer en dus homself vergewe.

3. Los van God kan jy nie sien nie, want jy kan nie los van God bestaan nie. 2Wat jy ook al doen, doen jy in Hom, want wat jy ook al dink, dink jy met Sy Geestesdenke. 3As visie werklik is, en dit is slegs werklik in die mate waarin dit die Heilige Gees se doel deel, kan jy nie apart van God sien nie.

4. Drie oefenperiodes van vyf minute elk word vandag benodig, een so vroeg moontlik en die ander so laat moontlik in die dag. 2Die derde een kan onderneem word op die gunstigste en geskikste tyd binne jou omstandighede en gereedheid. 3Herhaal die idee vir die dag aan jouself met oop oë aan die begin van hierdie oefenperiodes. 4Kyk dan vir ’n kort rukkie om jou heen terwyl jy die idee spesifiek op wat jy sien, toepas. 5Vier of vyf onderwerpe vir hierdie fase van die oefenperiode is voldoende. 6Jy kan byvoorbeeld sê:

              7God is my Bron. 8Ek kan nie hierdie lessenaar los van hom sien nie.

              9God is my Bron. 10Ek kan nie daardie skildery los van hom sien nie.

5. Alhoewel hierdie deel van die oefening relatief kort moet wees, moet jy seker maak dat jy die onderwerpe vir hierdie oefenfase willekeurig kies, sonder dat jy self besluit wat jy in- of uitsluit. 2Vir die tweede en langer fase moet jy jou oë sluit, vandag se idee weer herhaal en dan alle relevante gedagtes wat by jou opkom, op jou eie persoonlike manier by die idee voeg. 3Gedagtes soos:

            4Ek sien deur oë van vergifnis.

              5Ek sien die wêreld as geseënd.

              6Die wêreld kan my myself laat sien.

              7Ek sien my eie gedagtes, wat soos die Gedagtes van God Self is.

8Enige gedagte wat min of meer aan vandag se idee verwant is, is geskik. 9Die gedagtes hoef nie ’n duidelike verwantskap met die idee te hê nie, maar hulle moet nie daarmee in stryd wees nie.

6. As jy vind dat jou geestesdenke afdwaal, as jy begin bewus word van gedagtes wat duidelik nie met vandag se idee verband hou nie, of as dit voorkom of jy aan niks kan dink nie, maak dan jou oë oop, herhaal die eerste fase van die oefenperiode en probeer dan weer die tweede fase. 2Moenie ’n lang uitgerekte periode waartydens jy behep raak met onverwante gedagtes, toelaat nie. 3Keer so dikwels as wat nodig is na die eerste fase van die oefeninge terug om dit te voorkom.

7. By die toepassing van vandag se idee in die korter oefenperiodes, kan die vorm varieer volgens die omstandighede en situasies waarin jy jouself gedurende die dag bevind. 2As jy byvoorbeeld saam met iemand anders is, probeer onthou om saggies vir hom te sê:

              3God is my Bron. 4Los van Hom kan ek jou nie sien nie.

5Hierdie vorm is net so van toepassing op vreemdelinge as wat dit is op diegene wat jy dink nader aan jou is. 6Probeer trouens om hoegenaamd geen onderskeidings van hierdie aard te maak nie.

8. Vandag se idee behoort ook die hele dag deur toegepas te word op verskillende situasies en gebeure wat mag voorkom, veral op dié wat skyn om jou op een of ander manier te ontstel. 2Pas die idee vir hierdie doel in hierdie vorm toe:

            3God is my Bron. 4Los van Hom kan ek dit nie sien nie.

9. As geen spesifieke onderwerp op ’n gegewe tyd by jou opkom nie, herhaal bloot die idee in sy oorspronklike vorm. 2Probeer vandag om nie enige lang tye te laat verby gaan sonder om aan die idee van die dag en dus aan jou funksie te dink nie.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 43: God is my Source. I cannot see apart from Him. (ACIM, W-43)

Les 41 – God gaan met my, waar ek ook al gaan.

Augustus 25, 2025 /

1. Vandag se idee sal uiteindelik die gevoel van eensaamheid en verlatenheid wat alle geskeidenes ervaar, volledig oorwin. 2Depressie is ’n onvermydelike gevolg van skeiding. 3So ook angs, bekommernis, ’n diep gevoel van hulpeloosheid, ellende, lyding en intense vrees vir verlies.

2. Die geskeidenes het baie “geneesmiddels” uitgevind vir wat hulle glo die “kwale van die wêreld” is. 2Maar die een ding wat hulle nie doen nie, is om die werklikheid van die probleem te bevraagteken. 3En aangesien die probleem nie werklik is nie, kan geen geneesmiddel help vir die gevolge daarvan nie. 4Vandag se idee het die krag om al hierdie dwaasheid vir altyd te beëindig. 5En dwaasheid is dit inderdaad, ondanks die ernstige en tragiese vorms wat dit kan aanneem.

3. Diep in jou is alles wat volmaak is, gereed om deur jou na die wêreld uitgestraal te word. 2Dit sal alle smart en pyn en vrees en verlies genees, want dit sal die geestesdenke genees wat gedink het dat hierdie dinge werklik was, en gely het as gevolg van sy trou daaraan.

4. Jy kan nooit van jou volmaakte heiligheid ontneem word nie, want die Bron daarvan gaan waar jy ook al gaan. 2Jy kan nooit ly nie, want die Bron van alle vreugde gaan met jou waar jy ook al gaan. 3Jy kan nooit alleen wees nie, want die Bron van alle lewe gaan met jou waar jy ook al gaan. 4Niks kan die vrede van jou geestesdenke versteur nie, want God gaan met jou waar jy ook al gaan.

5. Ons begryp dat jy dit nie alles glo nie. 2Hoe kan jy, wanneer die waarheid diep in jou weggesteek is onder ’n swaar wolk van waansinnige gedagtes, dig en verhullend, maar nogtans alles verteenwoordig wat jy sien? 3Vandag sal ons ons eerste egte poging aanwend om by hierdie donker en swaar wolk verby te kom en deur dit na die lig daaragter te gaan.

6. Daar sal vandag net een lang oefenperiode wees. 2Sit in die oggend, indien moontlik sodra jy opstaan, stil vir so drie of vyf minute met jou oë toe. 3Herhaal vandag se idee baie stadig aan die begin van die oefenperiode. 4Doen daarna geen moeite om aan enigiets te dink nie. 5Probeer in plaas daarvan om ’n gevoel van inkeer tot jouself te kry, verby al die nuttelose gedagtes van die wêreld. 6Probeer om jou eie geestesdenke baie diep binne te gaan, en dit skoon en vry te hou van enige gedagtes wat jou aandag mag aflei.

7. Jy kan die idee van tyd tot tyd herhaal, as jy dit nuttig vind. 2Maar probeer bowenal om na binne af te sink, weg van die wêreld en al die dwase gedagtes daarvan. 3Jy probeer verder reik as al hierdie dinge. 4Jy probeer om alle skyn agter te laat en al nader te kom aan die werklikheid.

8. Dit is heeltemal moontlik om God te bereik. 2Dit is in werklikheid baie maklik, want dit is die natuurlikste ding ter wêreld. 3Jy kan selfs sê dat dit die enigste natuurlike ding in die wêreld is. 4Die pad sal vir jou oopgaan, as jy glo dat dit moontlik is. 5Hierdie oefening kan verbysterende resultate oplewer, selfs al met die eerste poging, en is vroeër of later altyd suksesvol. 6Op die fyner besonderhede van hierdie oefening sal daar na gelang van vordering ingegaan word. 7Maar dit sal nooit heeltemal misluk nie, en onmiddellike sukses is moontlik.

9. Gebruik vandag se idee dikwels deur die dag deur dit stadig te herhaal, verkieslik met geslote oë. 2Dink aan wat jy sê, en wat die woorde beteken. 3Konsentreer op die heiligheid wat hulle oor jou impliseer, op die altyd aanwesige kameraadskap wat jou deel is, op die volledige beskerming wat jou omring.

10. Jy kan inderdaad bekostig om te lag oor vreesgedagtes, wanneer jy onthou dat God met jou gaan, waar jy ook al gaan.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 41: God goes with me wherever I go. (ACIM, W-41)

Les 34 – Ek sou vrede in plaas hiervan kan sien.

Augustus 18, 2025 /

1. Vandag se idee begin om die voorwaardes te beskryf wat geld vir die ander manier van sien. 2Vrede van die geestesdenke is duidelik ’n innerlike saak 3Dit moet met jou eie gedagtes begin en dan na buite toe uitbrei. 4Juis vanuit die vrede van jou geestesdenke vloei ’n vreedsame persepsie van die wêreld voort.

2. Drie langer oefenperiodes word vir vandag se oefeninge vereis. 2Een in die oggend en een in die aand word aanbeveel, met ’n bykomende een enige tyd tussenin wanneer jy ten beste gereed voel daarvoor. 3Alle toepassings moet met geslote oë gedoen word. 4Dit is jou innerlike wêreld waarop vandag se idee toegepas moet word.

3. Ongeveer vyf minute se ondersoek van jou geestesdenke is nodig vir elkeen van vandag se langer oefenperiodes. 2Ondersoek jou geestesdenke vir vreesgedagtes, angswekkende situasies, “aanstootlike” persoonlikhede of gebeure, of enigiets anders waaroor jy liefdelose gedagtes koester. 3Neem hulle almal ongedwonge en terloops waar, herhaal vandag se idee stadig terwyl jy hulle in jou geestesdenke sien opkom en laat elkeen dan gaan, om deur die volgende een vervang te word.

4. As jy dit moeilik begin vind om aan spesifieke onderwerpe te dink, moet jy voortgaan om die idee rustig vir jouself te herhaal, sonder om dit op iets in die besonder toe te pas. 2Maak egter seker om nie iets opsetlik uit te sluit nie.

5. Die korter toepassings moet veelvuldig wees, en moet telkens gedoen word wanneer jy voel dat die vrede van jou geestesdenke enigsins bedreig word. 2Die bedoeling is om jou deur die hele dag teen versoekings te beskerm. 3As ’n spesifieke soort versoeking in jou bewussyn opkom, moet die oefening hierdie vorm aanneem:

              4Ek sou vrede in hierdie situasies kon sien, in plaas van wat ek nou daarin             sien.

6. As dié dinge wat inbreuk maak op jou innerlike vrede ’n algemene vorm van nare emosies aanneem soos depressie, angs of bekommernis, moet die idee in sy oorspronklik vorm gebruik word. 2As jy vind dat jy meer as een toepassing van vandag se idee benodig om te help om jou geestesdenke in enige spesifieke opsig te help verander, probeer om ’n hele paar minute te neem en te bestee aan die herhaling van die idee totdat jy ’n gevoel van verligting ervaar. 3Dit sal ook help as jy spesifiek vir jouself sê:

            4Ek kan my gevoelens van depressie, angs of bekommernis (of my gedagtes oor             hierdie situasie, persoonlikheid of gebeurtenis) vervang met vrede.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 34: I could see peace instead of this. (ACIM, W-34)

Les 33 – Daar is ’n ander manier om na die wêreld te kyk.

Augustus 17, 2025 /

1. Vandag se idee is ’n poging om in te sien dat jy jou persepsie van die wêreld kan verander, in sowel sy uiterlike as sy innerlike aspek. 2’n Volle vyf minute behoort in die oggend en aand aan die toepassing bestee te word. 3Herhaal tydens hierdie oefenperiodes die idee so dikwels as wat jy dit gemaklik vind, alhoewel toepassings sonder gejaagdheid noodsaaklik bly. 4Wissel die ondersoek van jou uiterlike en innerlike persepsies af, maar sonder om die afwisseling as te skielik te ervaar.

2. Kyk bloot ongedwonge rond in die wêreld wat jy as buite jouself waarneem, sluit dan jou oë en ondersoek jou innerlike gedagtes met dieselfde ongedwongenheid. 2Probeer om teenoor beide ewe onbetrokke te bly, en hierdie onbetrokkenheid te behou terwyl jy die idee deur die dag herhaal.

3. Die korter oefenperiodes moet so veelvuldig moontlik wees. 2Spesifieke toepassings van vandag se idee moet ook onmiddellik gemaak word sodra enige situasie ontstaan wat jou in die versoeking bring om ontsteld te raak. 3Sê by sulke toepassings:

              4Daar is ’n ander manier om hierna te kyk.

4. Onthou om vandag se idee toe te pas sodra jy bewus word van ’n kwelling. 2Dit mag nodig wees om ’n minuut of langer stil te sit en die idee verskeie kere vir jouself te herhaal. 3Dit sal tydens hierdie soort toepassings heelwaarskynlik help om jou oë te sluit.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 33: There is another way of looking at the world. (ACIM, W-33)

Les 32 – Ek het die wêreld wat ek sien, self uitgedink.

Augustus 16, 2025 /

1. Vandag gaan ons voort om die tema van oorsaak en gevolg te ontwikkel. 2Jy is nie die slagoffer van die wêreld wat jy sien nie, want jy het dit self uitgedink. 3Jy kan dit net so maklik opgee as wat jy dit gemaak het. 4Jy sal dit óf sien óf nie sien nie, soos jy dit verlang. 5Solank jy dit wil hê, sal jy dit sien; wanneer jy dit nie meer wil hê nie, sal dit nie meer daar wees vir jou om te sien nie.

2. Vandag se idee is, soos die voriges, op jou innerlike en uiterlike wêrelde, wat in werklikheid dieselfde is, van toepassing. 2Omdat jy hulle egter as verskillend sien, sal die oefenperiodes vir vandag weer twee fases behels, die een wat betrekking het op die wêreld wat jy buite jou sien, en die ander een op die wêreld wat jy in jou geestesdenke sien. 3Probeer tydens vandag se oefeninge die idee tuisbring dat beide in jou eie verbeelding bestaan.

3. Ons sal weer die oefenperiodes vir die oggend en aand begin deur vandag se idee twee of drie keer te herhaal, terwyl jy om jou heen kyk na die wêreld wat jy as buite jouself sien. 2Sluit dan jou oë en kyk rond in jou innerlike wêreld. 3Probeer om beide so gelykwaardig moontlik te behandel. 4Herhaal vandag se idee sonder haas so dikwels jy wil, terwyl jy die beelde wat jou verbeelding aan jou bewussyn voorlê, dophou.

4. Vir die langer oefenperiodes word drie tot vyf minute, maar nie minder as drie nie, aanbeveel. 2Jy kan meer as vyf bestee as jy die oefening rustig vind. 3Om dit te vergemaklik, kan jy ’n tyd kies wanneer jy min steurings verwag, en jy self redelik gereed daarvoor voel.

5. Hierdie oefeninge moet gedurende die dag voortgesit word, so dikwels moontlik. 2Die korter toepassings bestaan daaruit om die idee stadig te herhaal, soos jy hetsy jou innerlike hetsy jou uiterlike wêreld ondersoek. 3Dit maak nie saak watter een jy kies nie.

6. Vandag se idee moet ook onmiddellik toegepas word op enige situasie wat jou bekommerd mag maak. 2Pas die idee toe deur vir jouself te sê:

              3Ek het hierdie situasie soos ek dit sien, self uitgedink.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 32: I have invented the world I see. (ACIM, W-32)

Les 31 – Ek is nie ’n slagoffer van die wêreld wat ek sien nie.

Augustus 15, 2025 /

1. Vandag se idee is die inleiding tot jou vryheidsverklaring. 2Die idee moet weereens toegepas word op beide die wêreld wat jy buite jou en die wêreld wat jy binne jou sien. 3In die toepassing van hierdie idee sal ons ’n oefenvorm gebruik wat al hoe meer gebruik sal word, met variasies soos aangedui. 4Die vorm behels in die algemeen twee aspekte, een waar jy die idee op ’n meer volgehoue basis toepas, en die ander een wat bestaan uit herhaalde toepassings van die idee deur die dag.

2. Twee langer oefenperiodes word met vandag se idee benodig, een in die oggend en een in die aand. 2Drie tot vyf minute word vir elkeen aanbeveel. 3Kyk gedurende hierdie tye stadig om jou heen terwyl jy die idee twee of drie keer herhaal. 4Sluit dan jou oë, en pas dieselfde idee op jou innerlike wêreld toe. 5Jy sal tegelyk aan beide ontsnap, want die innerlike is die oorsaak van die uiterlike.

3. Soos jy jou innerlike wêreld ondersoek, laat jy eenvoudig alle gedagtes wat deur jou geestesdenke gaan in jou bewussyn toe, deur elkeen vir ’n oomblik in oënskou te neem, en dan deur die volgende een te laat vervang. 2Moenie probeer om enige soort hiërargie onder hulle tot stand te bring nie. 3Kyk so gelykmoedig en onpartydig moontlik hoe hulle kom en gaan. 4Moenie by enigeen in besonder stilstaan nie, maar probeer om die stroom gelykmatig en kalm te laat vloei, sonder enige spesiale insette van jou kant af. 5Soos jy jou gedagtes stil sit en dophou, herhaal vandag se idee vir jouself so dikwels soos wat jy wil, maar sonder enige haas.

4. Herhaal daarnaas ook vandag se idee so dikwels moontlik gedurende die dag. 2Herinner jouself daaraan dat jy besig is om ’n onafhanklikheidsverklaring in die naam van jou eie vryheid te maak. 3En in jou vryheid lê die vryheid van die wêreld.

5. Vandag se idee is ook besonder bruikbaar om te gebruik as antwoord op enige vorm van versoeking wat mag ontstaan. 2Dit is ’n verklaring dat jy nie daaraan sal toegee nie, en jouself nie tot slaaf sal maak nie.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 31: I am not the victim of the world I see. (ACIM, W-31)

Les 29 – God is in alles wat ek sien.

Augustus 13, 2025 /

1. Vandag se idee verduidelik waarom jy die totaliteit van alle doel in elke ding kan sien. 2Dit verduidelik waarom niks apart is, op sigself of in sigself nie. 3En dit verduidelik waarom niks wat jy sien enigiets beteken nie. 4Dit verklaar, om die waarheid te sê, elke idee wat ons tot dusver gebruik het en ook die daaropvolgendes. 5Vandag se idee vorm die hele basis en grondslag vir visie.

2. Jy sal die idee op hierdie stadium heelwaarskynlik baie moeilik vind om te begryp. 2Jy mag dit verspot, oneerbiedig, sinloos, snaaks en selfs aanstootlik vind. 3God kan tog sekerlik nie in byvoorbeeld ’n tafel, soos jy dit sien, wees nie. 4Nogtans het ons gister beklemtoon dat ’n tafel die doel van die universum deel. 5En wat ook al die doel van die universum deel, deel ook die doel van die Skepper daarvan.

3. Probeer dan vandag om te begin leer hoe jy na alle dinge met liefde, waardering en oop geestesdenke kan kyk. 2Jy sien hulle nie nou nie.3Weet jy wat hulle bevat? 4Niks is soos dit vir jou voorkom nie. 5Die heilige doel en bedoeling daarvan strek verder as jou beperkte veld. 6Sodra visie jou die heiligheid gewys het wat die wêreld verlig, sal jy vandag se idee volmaak begryp. 7En jy sal nie begryp hoe jy dit ooit moeilik kon vind nie.

4. Ons ses oefenperiodes van twee minute elk vir vandag behoort ’n nou al bekende patroon te volg: Begin deur die idee vir jouself te herhaal en pas dit dan op willekeurig gekose voorwerpe rondom jou toe, en noem elkeen spesifiek by die naam. 2Probeer die neiging vermy om die keuses self te stuur en te bepaal, iets wat met vandag se idee besonder aanloklik mag wees omdat dit so geheel en al vreemd is. 3Onthou dat enige volgorde wat jy voorskryf, ewe vreemd is aan die werklikheid.

5. Jou lys van voorwerpe moet dus so vry moontlik van selfgemaakte keuses wees. 2’n Geskikte lys mag byvoorbeeld die volgende insluit:

              3God is in hierdie klerehanger.

              4God is in hierdie tydskrif.

              5God is in hierdie vinger.

              6God is in hierdie lamp.

              7God is in hierdie liggaam.

              8God is in hierdie deur.

              9God is in hierdie snippermandjie.

10Herhaal die idee, ter aanvulling van die gewone oefenperiodes, minstens een keer elke uur deur stadig rondom jou heen te kyk terwyl jy die woorde langsaam vir jouself sê. 11Jy behoort ten minste een of twee keer ’n gevoel van rustigheid te ervaar as jy dit doen.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 29: God is in everything I see. (ACIM, W-29)

Les 26 – My aanvalsgedagtes val my onkwetsbaarheid aan.

Augustus 10, 2025 /

1. Dit is ongetwyfeld duidelik dat as jy aangeval kan word, jy nie onkwetsbaar is nie. 2Jy sien aanval as ’n wesenlike bedreiging. 3Dit is omdat jy glo dat jy werklik kan aanval. 4En wat déúr jou gevolge het, moet ook óp jou gevolge hê. 5Hierdie wet sal jou uiteindelik red, maar tans misbruik jy dit. 6Jy moet dus leer hoe om dit in jou beste belang te gebruik, in plaas van daarteen.

2. Omdat jou aanvalsgedagtes geprojekteer word, sal jy aanval vrees. 2En as jy aanval vrees, moet jy glo dat jy nie onkwetsbaar is nie. 3Aanvalsgedagtes maak jou dus kwetsbaar in jou eie geestesdenke, want dit is waar die aanvalsgedagtes is. 4Aanvalsgedagtes en onkwetsbaarheid kan nie tegelyk aanvaar word nie. 5Hulle weerspreek mekaar.

3. Vandag se idee stel die gedagte bekend dat jy jouself altyd eerste aanval. 2As aanvalsgedagtes onvermydelik die oortuiging meebring dat jy kwetsbaar is, dan is die gevolg daarvan dat hulle jou in jou eie oë verswak. 3Dus het hulle jou persepsie van jouself aangeval. 4En omdat jy in hulle glo, kan jy nie meer in jouself glo nie. 5’n Vals beeld van jouself het die plek van wat jy is, ingeneem.

4. Oefening met vandag se idee sal jou help begryp dat kwetsbaarheid of onkwetsbaarheid die resultaat van jou eie gedagtes is. 2Niks anders as jou gedagtes kan jou aanval nie. 3Niks anders as jou gedagtes kan jou laat dink dat jy kwetsbaar is nie. 4En niks anders as jou gedagtes kan aan jou bewys dat dit nie so is nie.

5. Ses oefenperiodes word benodig om vandag se idee toe te pas. 2’n Volle twee minute kan vir elk probeer word, alhoewel die tyd na ’n minuut verminder kan word as daar te veel ongemak is. 3Moenie dit verder verminder nie.

6. Die oefenperiode moet begin deur vandag se idee te herhaal, jou oë dan te sluit en weer te kyk na onopgeloste probleme, waarvan die uitkoms jou bekommer. 2Die bekommernis mag die vorm van depressie, besorgdheid, woede, neerdrukkende gevoelens, vrees, voorgevoelens of beheptheid aanneem. 3Enige probleem wat nog nie opgelos is nie en deur die dag by herhaling in jou gedagtes opduik, is ’n geskikte onderwerp. 4Jy sal nie in een enkele oefenperiode baie kan gebruik nie omdat meer tyd as gewoonlik aan elkeen bestee moet word. 5Vandag se idee moet soos volg toegepas word:

7. Noem eers die situasie by die naam:

              2Ek is bekommerd oor __________.

3Gaan dan deur elke moontlike gevolg wat in dié verband by jou opgekom het en vir jou bekommernis veroorsaak het, en verwys redelik spesifiek na elkeen deur te sê:

              4Ek is bang dat __________ sal gebeur.

8. As jy die oefeninge deeglik doen, sal jy omtrent oor vyf of ses kwellende moontlikhede beskik vir elke situasie wat jy behandel, en moontlik selfs meer. 2Dit is veel nuttiger om ’n paar situasies deeglik te dek as om ’n groot aantal net aan te roer. 3Soos die lys van verwagte uitkomste vir elke situasie groei, sal jy heelwaarskynlik sommige daarvan, veral die wat aan die einde by jou opkom, minder aanvaarbaar vind. 4Probeer egter om hulle almal, sover jy kan, gelyk te behandel.

9. Nadat jy elke uitkoms waarvoor jy bang is, opgenoem het, sê vir jouself:

              2Daardie gedagte is ’n aanval op myself.

3Sluit elke oefenperiode af deur vandag se idee weereens vir jouself te herhaal.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 26: My attack thoughts are attacking my invulnerability. (ACIM, W-26)

« Older posts

Vrywaring / Disclaimer: Hierdie Afrikaanse weergawe is my interpretasie van A Course in Miracles, wat my diep geïnspireer het. Ek het die Kursus in Engels bestudeer en het daarna verlang om my ervaring en insigte in my moedertaal, Afrikaans, te deel. Die werkboek-lesse en terme op hierdie webwerf is vertaal deur Henri Theron. Vir die volledige vertaalde Afrikaanse weergawe van A Course in Miracles, is jy welkom om in aanraking te kom met Henri by: (www.nkiw.org).

Oorspronklik gepubliseer deur die Foundation for Inner Peace in 1975, soos gelei deur Dr. Helen Schucman en mede-skrywer Dr. William Thetford.
Met hul goedkeuring het die Foundation for A Course in Miracles die onderrig-vertakking van die Kursus geword. Albei organisasies het deur die jare getrou gevolg hoe Helen wou hê haar manuskrip hanteer moes word.
As ’n universele, self-studie geestelike leerpad, leer die Kursus ’n unieke vorm van vergifnis—om die hindernisse in die denkgees te verwyder en die blywende teenwoordigheid van liefde te ontdek.

Hierdie webwerf word nie vir geldelike gewin of donasies aangebied nie. Ek doen dit bloot uit liefde en oortuiging, omdat ek glo dat hierdie Kursus 'n kragtige waarheid bevat wat met almal gedeel moet word. Dit is my hart se behoefte om hierdie Kursus bekend te stel aan enigiemand wat daarmee wil werk. Sê hello, stuur vir my 'n e-pos by: (marnus@hemelbewus.org).

Sluit aan by ons e-poslys

All quotes are from A Course in Miracles, Third Edition.
Copyright © 2007 by the Foundation for Inner Peace, copyright holder and publisher.
448 Ignacio Blvd., #306, Novato, CA 94949, acim.org, used with permission.

© 2026 Hemelbewus

Patternstorm Designs