Etiket: A Course in Miracles Afrikaans (Page 1 of 2)

Les 48 – Daar is niks om te vrees nie.

September 1, 2025 / admin

1. Vandag se idee konstateer eenvoudig ’n feit. ²Dit is nie ’n feit vir diegene wat in illusies glo nie, maar illusies is nie feite nie. ³In waarheid is daar niks om te vrees nie. ⁴Dit is baie maklik om in te sien. ⁵Maar dit is baie moeilik om in te sien vir diegene wat wil hê dat illusies waar moet wees.

2. Vandag se oefenperiodes sal baie kort, baie eenvoudig en baie gereeld wees. ²Herhaal bloot die idee so dikwels as moontlik. ³Jy kan dit met oop oë gebruik op enige oomblik en in enige situasie. ⁴Dit word egter sterk aanbeveel dat jy ’n minuut of langer gebruik om jou oë te sluit, wanneer dit ook al moontlik is, en die idee stadig ’n paar keer vir jouself te herhaal. ⁵Dit is veral belangrik om die idee onmiddellik te gebruik, sou enigiets die vrede van jou geestesdenke versteur.

3. Die teenwoordigheid van vrees is ’n duidelike teken dat jy op jou eie krag vertrou. ²Die bewustheid dat daar niks is om te vrees nie, toon dat jy iewers in jou geestesdenke, alhoewel nie noodwendig op ’n plek wat jy nou reeds herken nie, God onthou het en Sy krag toelaat om die plek van jou swakheid in te neem. ³Die oomblik dat jy gewillig is om dit te doen, is daar inderdaad niks om te vrees nie.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 48: There is nothing to fear. (ACIM, W-48)

Les 42 – God is my Krag. Visie is Sy geskenk.

Augustus 26, 2025 / admin

1. Vandag se idee kombineer twee baie kragtige gedagtes, beide van groot belang. ²Dit beskryf ook ’n oorsaak en gevolg verhouding wat verduidelik waarom jy nie kan misluk in jou pogings om die doel van die kursus te bereik nie. ³Jy sal sien omdat dit God se Wil is. ⁴Dit is Sy krag, nie jou eie nie, wat jou krag gee. ⁵En dit is Sy geskenk, eerder as jou eie, wat jou visie gee.

2. God is inderdaad jou krag, en wat Hy gee, word waarlik gegee. ²Dit beteken dat jy dit te enige tyd en op enige plek, waar jy ook al is, en in watter omstandighede jy jou ook al mag bevind, kan ontvang. ³Jou reis deur tyd en ruimte is nie willekeurig nie. ⁴Jy kan nie anders as om op die regte tyd op die regte plek te wees nie. ⁵So werk die krag van God. ⁶So is Sy gawes.

3. Ons sal vandag twee oefenperiodes van drie tot vyf minute hê, die een so gou moontlik nadat jy wakker geword het, en die ander een so na as moontlik aan slapenstyd. ²Dit is egter beter om te wag totdat jy stil en alleen kan wees en tot jy reg voel, eerder as om oor die tye as sulks begaan te wees.

4. Begin hierdie oefenperiodes deur die dag se idee stadig te herhaal, met oop oë, terwyl jy om jou heen kyk. ²Sluit dan jou oë en herhaal die idee weer, nog stadiger as voorheen. ³Probeer hierna om aan niks te dink nie behalwe aan gedagtes wat by jou opkom in verband met die idee van die dag. ⁴Jy sou byvoorbeeld kon dink:

⁵Visie moet moontlik wees. ⁶God gee waarlik,

of:

⁷God se gawes aan my moet wel myne wees, want Hy het hulle aan my gegee.

5. Enige gedagte wat duidelik verband hou met vandag se idee is geskik. ²Jy mag trouens verbaas wees oor die hoeveelheid insig wat met die kursus verband hou wat sommige van jou gedagtes bevat. ³Laat hulle kom sonder om hulle te sensureer, tensy jy vind dat jou geestesdenke bloot afdwaal en jy duidelik irrelevante gedagtes laat binnekom het. ⁴Jy mag ook ’n stadium bereik waar dit voorkom of geen gedagtes in jou geestesdenke opkom nie. ⁵As sulke steurings voorkom, kan jy jou oë oopmaak en die idee weereens herhaal terwyl jy stadig om jou heen kyk; sluit jou oë, herhaal die idee nogmaals en gaan dan voort om na verwante gedagtes in jou geestesdenke te soek.

6. Onthou egter dat ’n aktiewe soeke na verwante gedagtes nie gepas is vir vandag se oefeninge nie. ²Probeer bloot om terug te staan en die gedagtes te laat vloei. ³As jy dit moeilik vind, is dit beter om die oefenperiodes te gebruik vir ’n stadige herhaling van die idee met afwisselende oop en toe oë, as om jou in te span om ten alle koste geskikte gedagtes te vind.

7. Daar is nie ’n beperking op die aantal kort oefenperiodes wat vandag voordelig sal wees nie. ²Die idee vir die dag is die eerste stap om gedagtes saam te voeg en jou te leer dat jy ’n verenigde denksisteem bestudeer waarin niks ontbreek wat nodig is nie, en waarin niks wat teenstrydig of irrelevant is, ingesluit is nie.

8. Hoe meer dikwels jy die idee gedurende die dag herhaal, hoe meer dikwels herinner jy jouself daaraan dat die doel van die kursus vir jou belangrik is, en dat jy dit nie vergeet het nie.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 42: God is my strength. Vision is His gift. (ACIM, W-42)

Les 41 – God gaan met my, waar ek ook al gaan.

Augustus 25, 2025 / admin

1. Vandag se idee sal uiteindelik die gevoel van eensaamheid en verlatenheid wat alle geskeidenes ervaar, volledig oorwin. ²Depressie is ’n onvermydelike gevolg van skeiding. ³So ook angs, bekommernis, ’n diep gevoel van hulpeloosheid, ellende, lyding en intense vrees vir verlies.

2. Die geskeidenes het baie “geneesmiddels” uitgevind vir wat hulle glo die “kwale van die wêreld” is. ²Maar die een ding wat hulle nie doen nie, is om die werklikheid van die probleem te bevraagteken. ³En aangesien die probleem nie werklik is nie, kan geen geneesmiddel help vir die gevolge daarvan nie. ⁴Vandag se idee het die krag om al hierdie dwaasheid vir altyd te beëindig. ⁵En dwaasheid is dit inderdaad, ondanks die ernstige en tragiese vorms wat dit kan aanneem.

3. Diep in jou is alles wat volmaak is, gereed om deur jou na die wêreld uitgestraal te word. ²Dit sal alle smart en pyn en vrees en verlies genees, want dit sal die geestesdenke genees wat gedink het dat hierdie dinge werklik was, en gely het as gevolg van sy trou daaraan.

4. Jy kan nooit van jou volmaakte heiligheid ontneem word nie, want die Bron daarvan gaan waar jy ook al gaan. ²Jy kan nooit ly nie, want die Bron van alle vreugde gaan met jou waar jy ook al gaan. ³Jy kan nooit alleen wees nie, want die Bron van alle lewe gaan met jou waar jy ook al gaan. ⁴Niks kan die vrede van jou geestesdenke versteur nie, want God gaan met jou waar jy ook al gaan.

5. Ons begryp dat jy dit nie alles glo nie. ²Hoe kan jy, wanneer die waarheid diep in jou weggesteek is onder ’n swaar wolk van waansinnige gedagtes, dig en verhullend, maar nogtans alles verteenwoordig wat jy sien? ³Vandag sal ons ons eerste egte poging aanwend om by hierdie donker en swaar wolk verby te kom en deur dit na die lig daaragter te gaan.

6. Daar sal vandag net een lang oefenperiode wees. ²Sit in die oggend, indien moontlik sodra jy opstaan, stil vir so drie of vyf minute met jou oë toe. ³Herhaal vandag se idee baie stadig aan die begin van die oefenperiode. ⁴Doen daarna geen moeite om aan enigiets te dink nie. ⁵Probeer in plaas daarvan om ’n gevoel van inkeer tot jouself te kry, verby al die nuttelose gedagtes van die wêreld. ⁶Probeer om jou eie geestesdenke baie diep binne te gaan, en dit skoon en vry te hou van enige gedagtes wat jou aandag mag aflei.

7. Jy kan die idee van tyd tot tyd herhaal, as jy dit nuttig vind. ²Maar probeer bowenal om na binne af te sink, weg van die wêreld en al die dwase gedagtes daarvan. ³Jy probeer verder reik as al hierdie dinge. ⁴Jy probeer om alle skyn agter te laat en al nader te kom aan die werklikheid.

8. Dit is heeltemal moontlik om God te bereik. ²Dit is in werklikheid baie maklik, want dit is die natuurlikste ding ter wêreld. ³Jy kan selfs sê dat dit die enigste natuurlike ding in die wêreld is. ⁴Die pad sal vir jou oopgaan, as jy glo dat dit moontlik is. ⁵Hierdie oefening kan verbysterende resultate oplewer, selfs al met die eerste poging, en is vroeër of later altyd suksesvol. ⁶Op die fyner besonderhede van hierdie oefening sal daar na gelang van vordering ingegaan word. ⁷Maar dit sal nooit heeltemal misluk nie, en onmiddellike sukses is moontlik.

9. Gebruik vandag se idee dikwels deur die dag deur dit stadig te herhaal, verkieslik met geslote oë. ²Dink aan wat jy sê, en wat die woorde beteken. ³Konsentreer op die heiligheid wat hulle oor jou impliseer, op die altyd aanwesige kameraadskap wat jou deel is, op die volledige beskerming wat jou omring.

10. Jy kan inderdaad bekostig om te lag oor vreesgedagtes, wanneer jy onthou dat God met jou gaan, waar jy ook al gaan.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 41: God goes with me wherever I go. (ACIM, W-41)

Les 35 – My geestesdenke is deel van God se Geestesdenke. Ek is baie heilig.

Augustus 19, 2025 / admin

1. Vandag se idee beskryf nie die manier waarop jy jouself tans sien nie. ²Dit beskryf egter wel wat visie jou sal wys. ³Dit is moeilik vir enigeen wat dink dat hy in hierdie wêreld is, om dit van homself te glo. ⁴Tog is die rede waarom hy dink hy in hierdie wêreld is, juis omdat hy dit nie glo nie.

2. Jy sal glo jy is deel van waar jy dink jy is. ²Dit is omdat jy jouself omring met die omgewing wat jy wil hê. ³En jy wil dit hê om die beeld van jouself wat jy gemaak het, te beskerm. ⁴Die beeld is deel van hierdie omgewing. ⁵Wat jy sien terwyl jy glo dat jy daarin is, word deur die oë van die beeld gesien. ⁶Dit is nie visie nie. ⁷Beelde kan nie sien nie.

3. Vandag se idee verskaf ’n heel ander siening van jouself. ²Deur jou Bron vas te stel, stel jy jou Identiteit vas, en dit beskryf jou soos jy in waarheid werklik moet wees. ³Ons gebruik vandag ’n ietwat ander soort toepassing vir die dag se idee, omdat die klem op die waarnemer val in plaas van op dit wat hy waarneem.

4. Begin by elkeen van die drie oefenperiodes van vyf minute vandag, om die idee van die dag vir jouself te herhaal, en sluit dan jou oë en ondersoek jou geestesdenke vir die verskillende soorte beskrywende terme waarvolgens jy jouself sien. ²Sluit al die ego-gebaseerde kenmerke in wat jy aan jouself toeken, positief of negatief, gewens of ongewens, verhewe of platvloers. ³Almal is ewe onwerklik, want jy kyk nie na jouself deur heilige oë nie

5. Aan die begin van jou periode van geestesdenke-ondersoek sal jy heelwaarskynlik meer klem lê op wat jy as die meer negatiewe aspekte van jou persepsie van jouself beskou. ²Teen die einde van die oefenperiode mag egter meer positiewe beskrywende indrukke van jouself jou geestesdenke te binne skiet. ³Probeer insien dat die rigting en aard van jou fantasieë oor jouself nie saak maak nie. ⁴Illusies het in werklikheid geen rigting nie. ⁵Hulle is eenvoudig nie waar nie.

6. ’n Geskikte ongeselekteerde lys vir die toepassing van die idee vir vandag sou soos volg daar kon uitsien:

²Ek sien myself as misbruik.

³Ek sien myself as depressief.

⁴Ek sien myself as ’n mislukking.

⁵Ek sien myself as bedreigd.

⁶Ek sien myself as hulpeloos.

⁷Ek sien myself as oorwinnaar.

⁸Ek sien myself as verloorder.

⁹Ek sien myself as mensliewend.

¹⁰Ek sien myself as deugsaam.

7. Moenie in abstrakte terme aan hierdie stellings dink nie. ²Hulle sal by jou opkom soos verskillende situasies, persoonlikhede en gebeure waarin jy ’n rol speel, jou geestesdenke te binne skiet. ³Kies enige spesifieke situasie wat by jou opkom, identifiseer die beskrywende term of terme wat jy voel betrekking het op jou reaksies in daardie situasie, en gebruik hulle om vandag se idee op toe te pas. ⁴Nadat jy elkeen opgenoem het, voeg jy by:

⁵Maar my geestesdenke is deel van God se Geestesdenke. ⁶Ek is baie heilig.

8. Gedurende die langer oefenperiodes sal daar heelwaarskynlik pouses wees waartydens niks besonders by jou opkom nie. ²Moenie jou forseer om spesifieke dinge uit te dink om die pouse te vul nie, maar ontspan bloot en herhaal vandag se idee stadig totdat iets weer by jou opkom. ³Alhoewel niks wat by jou opkom uit die oefeninge weggelaat moet word nie, moet niks moedswillig “uitgegrawe” word nie. ⁴Nóg dwang nóg diskriminerende onderskeid moet gebruik word.

9. So dikwels as wat dit gedurende die dag moontlik is, moet ’n spesifieke eienskap en eienskappe wat jy op daardie oomblik aan jouself toeskryf, geneem word, vandag se idee op hulle toegepas word, en die idee soos dit in die bogenoemde vorm gestel word, by elkeen van hulle gevoeg word. ²As daar niks besonders by jou opkom nie, herhaal die idee bloot vir jouself met geslote oë.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 34: I could see peace instead of this. (ACIM, W-35)

Les 34 – Ek sou vrede in plaas hiervan kan sien.

Augustus 18, 2025 / admin

1. Vandag se idee begin om die voorwaardes te beskryf wat geld vir die ander manier van sien. ²Vrede van die geestesdenke is duidelik ’n innerlike saak ³Dit moet met jou eie gedagtes begin en dan na buite toe uitbrei. ⁴Juis vanuit die vrede van jou geestesdenke vloei ’n vreedsame persepsie van die wêreld voort.

2. Drie langer oefenperiodes word vir vandag se oefeninge vereis. ²Een in die oggend en een in die aand word aanbeveel, met ’n bykomende een enige tyd tussenin wanneer jy ten beste gereed voel daarvoor. ³Alle toepassings moet met geslote oë gedoen word. ⁴Dit is jou innerlike wêreld waarop vandag se idee toegepas moet word.

3. Ongeveer vyf minute se ondersoek van jou geestesdenke is nodig vir elkeen van vandag se langer oefenperiodes. ²Ondersoek jou geestesdenke vir vreesgedagtes, angswekkende situasies, “aanstootlike” persoonlikhede of gebeure, of enigiets anders waaroor jy liefdelose gedagtes koester. ³Neem hulle almal ongedwonge en terloops waar, herhaal vandag se idee stadig terwyl jy hulle in jou geestesdenke sien opkom en laat elkeen dan gaan, om deur die volgende een vervang te word.

4. As jy dit moeilik begin vind om aan spesifieke onderwerpe te dink, moet jy voortgaan om die idee rustig vir jouself te herhaal, sonder om dit op iets in die besonder toe te pas. ²Maak egter seker om nie iets opsetlik uit te sluit nie.

5. Die korter toepassings moet veelvuldig wees, en moet telkens gedoen word wanneer jy voel dat die vrede van jou geestesdenke enigsins bedreig word. ²Die bedoeling is om jou deur die hele dag teen versoekings te beskerm. ³As ’n spesifieke soort versoeking in jou bewussyn opkom, moet die oefening hierdie vorm aanneem:

⁴Ek sou vrede in hierdie situasies kon sien, in plaas van wat ek nou daarin sien.

6. As dié dinge wat inbreuk maak op jou innerlike vrede ’n algemene vorm van nare emosies aanneem soos depressie, angs of bekommernis, moet die idee in sy oorspronklik vorm gebruik word. ²As jy vind dat jy meer as een toepassing van vandag se idee benodig om te help om jou geestesdenke in enige spesifieke opsig te help verander, probeer om ’n hele paar minute te neem en te bestee aan die herhaling van die idee totdat jy ’n gevoel van verligting ervaar. ³Dit sal ook help as jy spesifiek vir jouself sê:

⁴Ek kan my gevoelens van depressie, angs of bekommernis (of my gedagtes oor hierdie situasie, persoonlikheid of gebeurtenis) vervang met vrede.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 34: I could see peace instead of this. (ACIM, W-34)

Les 33 – Daar is ’n ander manier om na die wêreld te kyk.

Augustus 17, 2025 / admin

1. Vandag se idee is ’n poging om in te sien dat jy jou persepsie van die wêreld kan verander, in sowel sy uiterlike as sy innerlike aspek. ²’n Volle vyf minute behoort in die oggend en aand aan die toepassing bestee te word. ³Herhaal tydens hierdie oefenperiodes die idee so dikwels as wat jy dit gemaklik vind, alhoewel toepassings sonder gejaagdheid noodsaaklik bly. ⁴Wissel die ondersoek van jou uiterlike en innerlike persepsies af, maar sonder om die afwisseling as te skielik te ervaar.

2. Kyk bloot ongedwonge rond in die wêreld wat jy as buite jouself waarneem, sluit dan jou oë en ondersoek jou innerlike gedagtes met dieselfde ongedwongenheid. ²Probeer om teenoor beide ewe onbetrokke te bly, en hierdie onbetrokkenheid te behou terwyl jy die idee deur die dag herhaal.

3. Die korter oefenperiodes moet so veelvuldig moontlik wees. ²Spesifieke toepassings van vandag se idee moet ook onmiddellik gemaak word sodra enige situasie ontstaan wat jou in die versoeking bring om ontsteld te raak. ³Sê by sulke toepassings:

⁴Daar is ’n ander manier om hierna te kyk.

4. Onthou om vandag se idee toe te pas sodra jy bewus word van ’n kwelling. ²Dit mag nodig wees om ’n minuut of langer stil te sit en die idee verskeie kere vir jouself te herhaal. ³Dit sal tydens hierdie soort toepassings heelwaarskynlik help om jou oë te sluit.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 33: There is another way of looking at the world. (ACIM, W-33)

Les 31 – Ek is nie ’n slagoffer van die wêreld wat ek sien nie.

Augustus 15, 2025 / admin

1. Vandag se idee is die inleiding tot jou vryheidsverklaring. ²Die idee moet weereens toegepas word op beide die wêreld wat jy buite jou en die wêreld wat jy binne jou sien. ³In die toepassing van hierdie idee sal ons ’n oefenvorm gebruik wat al hoe meer gebruik sal word, met variasies soos aangedui. ⁴Die vorm behels in die algemeen twee aspekte, een waar jy die idee op ’n meer volgehoue basis toepas, en die ander een wat bestaan uit herhaalde toepassings van die idee deur die dag.

2. Twee langer oefenperiodes word met vandag se idee benodig, een in die oggend en een in die aand. ²Drie tot vyf minute word vir elkeen aanbeveel. ³Kyk gedurende hierdie tye stadig om jou heen terwyl jy die idee twee of drie keer herhaal. ⁴Sluit dan jou oë, en pas dieselfde idee op jou innerlike wêreld toe. ⁵Jy sal tegelyk aan beide ontsnap, want die innerlike is die oorsaak van die uiterlike.

3. Soos jy jou innerlike wêreld ondersoek, laat jy eenvoudig alle gedagtes wat deur jou geestesdenke gaan in jou bewussyn toe, deur elkeen vir ’n oomblik in oënskou te neem, en dan deur die volgende een te laat vervang. ²Moenie probeer om enige soort hiërargie onder hulle tot stand te bring nie. ³Kyk so gelykmoedig en onpartydig moontlik hoe hulle kom en gaan. ⁴Moenie by enigeen in besonder stilstaan nie, maar probeer om die stroom gelykmatig en kalm te laat vloei, sonder enige spesiale insette van jou kant af. ⁵Soos jy jou gedagtes stil sit en dophou, herhaal vandag se idee vir jouself so dikwels soos wat jy wil, maar sonder enige haas.

4. Herhaal daarnaas ook vandag se idee so dikwels moontlik gedurende die dag. ²Herinner jouself daaraan dat jy besig is om ’n onafhanklikheidsverklaring in die naam van jou eie vryheid te maak. ³En in jou vryheid lê die vryheid van die wêreld.

5. Vandag se idee is ook besonder bruikbaar om te gebruik as antwoord op enige vorm van versoeking wat mag ontstaan. ²Dit is ’n verklaring dat jy nie daaraan sal toegee nie, en jouself nie tot slaaf sal maak nie.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 31: I am not the victim of the world I see. (ACIM, W-31)

Les 30 – God is in alles wat ek sien, want God is in my geestesdenke.

Augustus 14, 2025 / admin

1. Vandag se idee is die springplank na visie. ²Vanuit hierdie idee sal die wêreld voor jou oopgaan, en jy sal daarna kyk en daarin sien wat jy nog nooit tevore gesien het nie. ³Ook sal wat jy voorheen gesien het, nie eers vaagweg vir jou sigbaar wees nie.

2. Ons probeer om vandag ’n nuwe soort “projeksie” te hanteer. ²Ons gaan nie probeer om ontslae te raak van dit waarvan ons nie hou deur dit buite ons te sien nie. ³Ons probeer in plaas daarvan om in die wêreld te sien wat in ons geestesdenke is, en wat ons wil sien, is daar. ⁴Ons probeer dus om te verbind met wat ons sien, eerder as om dit weg van ons af te hou. ⁵Dit is die basiese verskil tussen visie en die manier waarop jy sien.

3. Vandag se idee moet so dikwels moontlik deur die dag toegepas word. ²Wanneer jy ook al ’n oomblik beskikbaar het, herhaal dit stadig vir jouself terwyl jy rondom jou kyk en probeer besef dat die idee geld vir alles wat jy nou sien, of nou sou kon sien as dit binne jou gesigsveld was.

4. Ware visie is nie beperk tot konsepte soos “naby” of “ver” nie. ²Om jou te help om gewoond te begin raak aan hierdie idee, moet jy by die toepassing van vandag se idee probeer om te dink aan dinge wat sowel buite jou huidige gesigsveld val, as dié wat jy daadwerklik kan sien

5. Ware visie word nie slegs deur ruimte en afstand beperk nie, maar is hoegenaamd nie van die liggaam se oë afhanklik nie. ²Die geestesdenke is sy enigste bron. ³Om jou ook te help om meer aan hierdie idee gewoond te raak, moet verskeie oefenperiodes daaraan gewy word om vandag se idee met geslote oë toe te pas, deur enige onderwerpe te gebruik wat in jou geestesdenke opkom, en deur na binne in plaas van na buite te kyk. ⁴Vandag se idee geld vir beide in gelyke mate.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 30: God is in everything I see because God is in my mind. (ACIM, W-30)

Les 29 – God is in alles wat ek sien.

Augustus 13, 2025 / admin

1. Vandag se idee verduidelik waarom jy die totaliteit van alle doel in elke ding kan sien. ²Dit verduidelik waarom niks apart is, op sigself of in sigself nie. ³En dit verduidelik waarom niks wat jy sien enigiets beteken nie. ⁴Dit verklaar, om die waarheid te sê, elke idee wat ons tot dusver gebruik het en ook die daaropvolgendes. ⁵Vandag se idee vorm die hele basis en grondslag vir visie.

2. Jy sal die idee op hierdie stadium heelwaarskynlik baie moeilik vind om te begryp. ²Jy mag dit verspot, oneerbiedig, sinloos, snaaks en selfs aanstootlik vind. ³God kan tog sekerlik nie in byvoorbeeld ’n tafel, soos jy dit sien, wees nie. ⁴Nogtans het ons gister beklemtoon dat ’n tafel die doel van die universum deel. ⁵En wat ook al die doel van die universum deel, deel ook die doel van die Skepper daarvan.

3. Probeer dan vandag om te begin leer hoe jy na alle dinge met liefde, waardering en oop geestesdenke kan kyk. ²Jy sien hulle nie nou nie.³Weet jy wat hulle bevat? ⁴Niks is soos dit vir jou voorkom nie. ⁵Die heilige doel en bedoeling daarvan strek verder as jou beperkte veld. ⁶Sodra visie jou die heiligheid gewys het wat die wêreld verlig, sal jy vandag se idee volmaak begryp. ⁷En jy sal nie begryp hoe jy dit ooit moeilik kon vind nie.

4. Ons ses oefenperiodes van twee minute elk vir vandag behoort ’n nou al bekende patroon te volg: Begin deur die idee vir jouself te herhaal en pas dit dan op willekeurig gekose voorwerpe rondom jou toe, en noem elkeen spesifiek by die naam. ²Probeer die neiging vermy om die keuses self te stuur en te bepaal, iets wat met vandag se idee besonder aanloklik mag wees omdat dit so geheel en al vreemd is. ³Onthou dat enige volgorde wat jy voorskryf, ewe vreemd is aan die werklikheid.

5. Jou lys van voorwerpe moet dus so vry moontlik van selfgemaakte keuses wees. ²’n Geskikte lys mag byvoorbeeld die volgende insluit:

³God is in hierdie klerehanger.

⁴God is in hierdie tydskrif.

⁵God is in hierdie vinger.

⁶God is in hierdie lamp.

⁷God is in hierdie liggaam.

⁸God is in hierdie deur.

⁹God is in hierdie snippermandjie.

¹⁰Herhaal die idee, ter aanvulling van die gewone oefenperiodes, minstens een keer elke uur deur stadig rondom jou heen te kyk terwyl jy die woorde langsaam vir jouself sê. ¹¹Jy behoort ten minste een of twee keer ’n gevoel van rustigheid te ervaar as jy dit doen.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 29: God is in everything I see. (ACIM, W-29)

Les 28 – Ek wil, meer as enigiets anders, dinge anders sien.

Augustus 12, 2025 / admin

1. Vandag pas ons gister se idee in werklikheid spesifiek toe. ²In hierdie oefenperiodes sal jy ’n reeks duidelik omskrewe verbintenisse maak. ³Die vraag of jy hulle in die toekoms gaan nakom, gaan ons nie hier aan nie. ⁴As jy nou ten minste gewillig is om hulle te maak, het jy begin om hulle na te kom. ⁵En ons is nog maar aan die begin.

2. Jy mag wonder hoekom dit byvoorbeeld belangrik is om te sê: “Ek wil, meer as enigiets anders, hierdie tafel anders sien.” ²Op sigself is dit hoegenaamd nie belangrik nie. ³Maar wat is op sigself? ⁴En wat beteken “op sigself”? ⁵Jy sien ’n aantal afsonderlike dinge om jou, wat in werklikheid beteken dat jy hoegenaamd nie sien nie. ⁶Óf jy sien, óf jy sien nie. ⁷As jy een ding anders gesien het, sal jy alles anders sien. ⁸Die lig wat jy in een daarvan sien, is dieselfde lig wat jy in almal sien.

3. As jy sê: “Ek wil, meer as enigiets anders, hierdie tafel anders sien,” verplig jy jouself om jou vooropgesette idees van die tafel terug te trek en jou geestesdenke oop te maak vir wat dit is, en waartoe dit dien. ²Jy definieer dit nie aan die hand van die verlede nie. ³Jy vra wat dit is, eerder as om dit te vertel wat dit is. ⁴Jy verbind nie die betekenis daarvan met jou eie nietige ervarings van tafels nie, en ook beperk jy nie die doel daarvan tot jou eie onbeduidende persoonlike gedagtes nie.

4. Jy sal nie, wat jy alreeds gedefinieer het, bevraagteken nie. ²En die doel van hierdie oefeninge is om vrae te stel en die antwoorde te kry. ³Deur te sê: “Ek wil, meer as enigiets anders, hierdie tafel anders sien,” verbind jy jouself daartoe om te sien. ⁴Dit is nie ’n eensydige verbintenis nie. ⁵Dit is ’n verbintenis wat ewe veel vir die tafel geld as vir enigiets anders, nie meer nie en ook nie minder nie.

5. Jy sou, om die waarheid te sê, visie aan die hand van slegs daardie tafel kon verwerf as jy al jou eie idees daaroor sou terugtrek en met volkome oop geestesdenke daarna sou kyk. ²Dit het iets om jou te wys: iets wat pragtig is en skoon en van oneindige waarde, vol geluk en vol verwagting. ³Weggesteek onder al jou idees lê die werklike doel daarvan, die doel wat dit met die hele universum deel.

6. Deur die tafel as ’n voorwerp te gebruik vir die toepassing van vandag se idee, vra jy dus eintlik om die doel van die universum te sien. ²Jy rig dieselfde versoek tot elke voorwerp wat jy tydens die oefenperiodes gebruik. ³En jy maak ’n verbintenis met elkeen van hulle om hulle doel aan jou bekend te maak, in plaas daarvan om jou eie oordeel daaroor uit te spreek.

7. Ons sal vandag ses oefenperiodes van twee minute elk hê, waartydens vandag se idee eers genoem word en dan toegepas word op wat jy ook al om jou sien. ²Nie alleen moet die voorwerpe willekeurig gekies word nie, maar daar moet aan elkeen dieselfde opregtheid toegeken word wanneer vandag se idee daarop toegepas word, in ’n poging om te erken dat hulle oor gelyke waarde beskik in hul bydrae tot jou vermoë om te sien.

8. Soos gewoonlik moet die toepassings die naam bevat van die voorwerp waarop jou oë toevallig val, en jy moet jou oë daarop laat rus terwyl jy sê:

²Meer as enigiets anders wil ek hierdie __________ anders sien.

³Elke toepassing moet taamlik stadig uitgevoer word, en so aandagtig moontlik. ⁴Daar is geen haas nie.