Kategorie: Daaglike Lesse (Page 1 of 7)

Les 75 – Die lig het gekom.

Augustus 1, 2026 / admin

1. Die lig het gekom. ²Jy is genees en jy kan genees. ³Die lig het gekom. ⁴Jy is verlos en jy kan verlos. ⁵Jy het vrede, en jy bring vrede saam met jou, waar jy ook al gaan. ⁶Duisternis en onrus en dood het verdwyn. ⁷Die lig het gekom.

2. Ons vier vandag die gelukkige einde van jou lang droom van rampspoed. ²Daar is nou nie meer somber drome nie. ³Die lig het gekom. ⁴Vandag begin die tyd van lig vir jou en iedereen. ⁵Dit is ’n nuwe tydperk waarin ’n nuwe wêreld gebore word. ⁶Die ou een het verbygegaan sonder om ’n spoor agter te laat. ⁷Ons sien vandag ’n ander wêreld, want die lig het gekom.

3. Vandag se oefeninge sal van gelukkige aard wees, waarin ons dank betuig vir die verbygaan van die oue en die aanbreek van die nuwe. ²Geen skaduwees uit die verlede het oorgebly om ons sig te vertroebel en die wêreld wat vergifnis ons bied te verberg nie. ³Ons sal vandag die nuwe wêreld aanvaar as dit wat ons wil sien. ⁴Wat ons begeer, sal ons gegee word. ⁵Ons wil die lig sien; die lig het gekom.

4. Ons langer oefenperiodes sal daaraan gewy word om te kyk na die wêreld wat ons vergifnis ons wys. ²Dit is wat ons wil sien, en dit alleen. ³Ons eenduidige doelstelling maak ons mikpunt onafwendbaar. ⁴Die regte wêreld verrys vandag in blydskap voor ons op, om uiteindelik gesien te word. ⁵Ons het sig gekry, nou dat die lig gekom het.

5. Ons wil nie vandag die ego se skaduwee op die wêreld sien nie. ²Ons sien die lig, en daarin sien ons hoe die Hemel se spieëlbeeld oor die wêreld lê. ³Begin die langer oefenperiodes deur jouself die goeie tyding van jou bevryding te vertel:

⁴Die lig het gekom. ⁵Ek het die wêreld vergewe.

6. Moenie vandag by die verlede stilstaan nie. ²Hou jou geestesdenke volledig oop, skoongewas van alle idees uit die verlede en skoon van elke idee wat jy gemaak het. ³Jy het vandag die wêreld vergewe. ⁴Jy kan dit nou bekyk asof jy dit nog nooit tevore gesien het nie. ⁵Jy weet egter nog nie hoe dit lyk nie. ⁶Jy wag net eenvoudig dat dit aan jou gewys moet word. ⁷Terwyl jy wag, herhaal jy verskeie kere stadig en met die grootste geduld:

⁸Die lig het gekom. ⁹Ek het die wêreld vergewe.

7. Besef dat jou vergifnis jou op visie geregtig maak. ²Begryp dat die Heilige Gees nooit versuim om die gawe van sig te gee aan diegene wat vergewe nie. ³Glo dat Hy jou nie nou in die steek sal laat nie. ⁴Jy het die wêreld vergewe. ⁵Hy sal met jou wees terwyl jy wag en kyk. ⁶Hy sal jou dit wys wat ware visie sien. ⁷Dit is Sy Wil, en jy het jou met Hom verbind. ⁸Wag geduldig op Hom. ⁹Hy sal daar wees. ¹⁰Die lig het gekom.¹¹Jy het die wêreld vergewe.

8. Sê vir hom dat jy weet jy kan nie faal nie, omdat jy op Hom vertrou. ²En sê vir jouself dat jy in sekerheid wag om die wêreld te sien wat Hy jou belowe het. ³Van nou af aan sal jy anders sien. ⁴Die lig het vandag gekom. ⁵En jy sal die wêreld sien wat jou belowe was sedert tyd begin het, en waarin die einde van tyd verseker is.

9. Ook die korter oefenperiodes sal vreugdevolle herinneringe van jou bevryding wees. ²Herinner jouself elke kwartier of wat daaraan dat vandag ’n tyd vir spesiale feesviering is. ³Sê dankie vir die genade en die Liefde van God. ⁴Verbly jou in die krag van vergifnis om jou sig heeltemal te genees. ⁵Wees vol vertroue dat daar vandag ’n nuwe begin is. ⁶Sonder die duisternis van die verlede oor jou oë kan jy nie vandag misluk om te sien nie. ⁷En wat jy sien, sal so welkom wees dat jy vandag graag vir ewig sou laat duur.

10. Sê dan:

²Die lig het gekom. ³Ek het die wêreld vergewe.

⁴As jy in versoeking sou kom, sê vir almal wat lyk asof hulle jou die duisternis in wil terugtrek:

⁵Die lig het gekom. ⁶Ek het jou vergewe.

11. Ons dra hierdie dag op aan die kalmte waarin God wil hê jy moet wees. ²Bewaar dit in jou bewustheid van jouself en sien dit vandag oral, terwyl ons die begin van jou visie en die sig van die werklike wêreld vier wat gekom het om die plek in te neem van die onversoenlike wêreld wat jy gedink het werklikheid was.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 75: The light has come. (ACIM, W-75)

Les 74 – Daar is geen ander wil as God se Wil nie.

Augustus 1, 2026 / admin

1. Vandag se idee kan beskou word as die sentrale gedagte waarop al ons oefeninge gerig word. ²God se Wil is die enigste Wil. ³Wanneer jy dit ingesien het, het jy ingesien dat jou wil Syne is. ⁴Die oortuiging dat konflik moontlik is, het verdwyn. ⁵Vrede het in die plek gekom van die vreemde idee dat jy deur teenstrydige doelstellings in twee geskeur is. ⁶As ’n uitdrukking van die Wil van God, het jy geen ander doel as Syne nie.

2. Daar lê diepe vrede in vandag se idee opgesluit, en vandag se oefeninge is daarop gerig om dit te vind. ²Die idee self is volkome waar. ³Dit kan dus nie tot illusies aanleiding gee nie. ⁴Sonder illusies is konflik onmoontlik. ⁵Laat ons probeer om dit vandag in te sien, en laat ons die vrede wat hierdie insig bring, ervaar.

3. Begin die langer oefenperiodes deur die volgende gedagtes ’n paar keer stadig te herhaal, vasberade om te begryp wat hulle beteken, en om hulle in gedagte te hou:

²Daar is geen ander wil as God se Wil nie. ³Ek kan nie in konflik wees nie.

⁴Bestee dan ’n paar minute om enkele verwante gedagtes by te voeg, soos:

⁵Ek het vrede.

⁶Niks kan my ontstel nie. ⁷My wil is God se Wil.

⁸My wil en God se Wil is één.

⁹God wil vrede vir Sy Seun.

¹⁰Maak seker om gedurende hierdie inleidingsfase enige konflikterende gedagtes wat deur jou geestesdenke gaan, vinnig te hanteer.¹¹Sê onmiddellik vir jouself:

¹²Daar is geen ander wil as God se Wil nie. ¹³Hierdie konflikterende gedagtes is betekenisloos.

4. As daar ’n konflikgebied is wat besonder moeilik lyk om op te los, kies dit dan vir spesiale oorweging uit. ²Dink kortliks, maar baie spesifiek, daaroor na, identifiseer die betrokke persoon of persone en die situasie of situasies wat betrokke is, en sê vir jouself:

³Daar is geen ander wil as God se Wil nie. ⁴Ek deel dit met Hom.

⁵My konflikte oor __________ kan nie werklik wees nie.

5. Nadat jy jou gedagtes op hierdie wyse gesuiwer het, kan jy jou oë toemaak en die vrede probeer ervaar waarop jou werklikheid jou geregtig maak. ²Versink jou daarin en voel hoe dit jou omsluit. ³Die versoeking mag daar wees om hierdie pogings verkeerdelik as afsydigheid of onttrekking te sien, maar die verskil is maklik te bespeur. ⁴As jy suksesvol is, sal jy ’n diep gevoel van vreugde en toenemende geestelike wakkerheid ervaar, in plaas van ’n gevoel van sufheid en futloosheid.

6. Vreugde is die kenmerk van vrede. ²Deur hierdie ervaring sal jy weet dat jy dit bereik het. ³As jy voel dat jy weer versink in afsydigheid, herhaal vandag se idee vinnig en probeer weer. ⁴Doen dit so dikwels as wat nodig is. ⁵Jy sal beslis daarby baat as jy weier om op onttrekking of afsydigheid terug te val, selfs as jy nie die vrede ervaar wat jy soek nie.

7. Sê vir jouself tydens die korter oefenperiodes wat vandag op gereelde en voorafbepaalde tussenposes gedoen moet word:

²Daar is geen ander wil as God se Wil nie. ³Vandag soek ek Sy vrede.

⁴Probeer dan om te vind wat jy soek. ⁵Dit sou goed wees om vandag ’n minuut of twee elke halfuur, met geslote oë indien moontlik, hieraan te wy.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 74: There is no will but God’s. (ACIM, W-74)

Les 73 – Ek wil dat daar lig moet wees

Augustus 1, 2026 / admin

1. Ons oordink vandag die wil wat jy met God deel. ²Dit is nie dieselfde as die ego se ydele wense, waaruit die duisternis en niksheid voortspruit nie. ³Die wil wat jy met God deel, het al die krag van skepping daarin. ⁴Die ego se ydele wense word nie gedeel nie, en het dus geen krag hoegenaamd nie. ⁵Sy wense is nie heeltemal so ydel nie, in die sin dat hulle wel ’n wêreld van illusies kan maak waarin jy baie sterk kan glo. ⁶Maar hulle is inderdaad ydel en vrugteloos wanneer dit oor skepping gaan. ⁷Hulle maak niks wat werklik is nie.

2. Ydele wense en griewe is vennote oftewel medemakers in die verbeelding van die wêreld wat jy sien. ²Die ego se wense het daartoe aanleiding gegee, en die ego se behoefte aan griewe, wat nodig is om hom in stand te hou, bevolk hom met figure wat jou blyk aan te val en wat ’n “regverdige” oordeel eis. ³Hierdie figure word die agente wat die ego in diens neem om met griewe te smous. ⁴Hulle staan tussen jou bewussyn en jou broers se werklikheid. ⁵Wanneer jy hulle aanskou, ken jy nie jou broers of jou Self nie.

3. Jou wil het vir jou verlore geraak in hierdie vreemde ruilhandel, waarin skuld heen en weer verkwansel word en griewe met elke ruiling vermeerder. ²Kon so ’n wêreld geskep gewees het deur die Wil wat die Seun van God met sy Vader deel? ³Het God rampspoed vir Sy Seun geskep? ⁴Skepping is die Wil van Beide saam. ⁵Sou God ’n wêreld skep wat Homself sou doodmaak?

4. Ons sal vandag weereens probeer om die wêreld te bereik wat in ooreenstemming met jou wil is. ²Die lig is daarin, want dit weerstaan nie die Wil van God nie. ³Dit is nie die Hemel nie, maar die lig van die Hemel skyn daarop. ⁴Die duisternis het verdwyn. ⁵Die ego se ydele wense is onttrek. ⁶Maar die lig wat op hierdie wêreld skyn, weerspieël jou wil en dus moet dit in jou gesoek word.

5. Jou beeld van die wêreld kan slegs weerspieël wat daar binne jou is. ²Nóg die bron van lig, nóg die bron van duisternis kan buite jou gevind word. ³Griewe verduister jou geestesdenke, en jy kyk uit op ’n verduisterde wêreld. ⁴Vergifnis beëindig die duisternis, herstel jou wil, en laat jou ’n wêreld van lig aanskou. ⁵Ons het herhaaldelik beklemtoon dat die versperrings en hindernisse van griewe maklik oorkom kan word, en nie tussen jou en jou verlossing kan staan nie. ⁶Die rede is heel eenvoudig. ⁷Wil jy regtig in die hel wees? ⁸Wil jy regtig ween en ly en sterf?

6. Vergeet die ego se argumente wat probeer bewys dat dit alles werklik die Hemel is. ²Jy weet dat dit nie so is nie. ³Jy kan dit nie vir jouself so wil hê nie. ⁴Daar is ’n punt waar illusies nie kan verbygaan nie. ⁵Lyding is nie geluk nie, en dit is geluk wat jy regtig wil hê. ⁶Dit is in waarheid jou wil. ⁷En dus is verlossing ook jou wil. ⁸Jy wil slaag in wat ons vandag probeer doen. ⁹Ons onderneem dit met jou seën en hartlike instemming.

7. Ons sal vandag slaag as jy onthou dat jy vir jouself verlossing wil hê. ²Jy wil God se plan aanvaar, want jy deel daarin. ³Jy het nie ’n wil wat hom werklik daarteen kan verset nie, en jy wil dit ook nie doen nie. ⁴Verlossing kom jou toe. ⁵Jy wil, bowenal, die vryheid hê om te onthou Wie jy regtig is. ⁶Dit is vandag die ego wat magteloos staan voor jou wil. ⁷Jou wil is vry, en niks kan dit oorweldig nie.

8. Daarom doen ons vandag se oefeninge in blye vertroue, in sekerheid dat ons sal vind wat jy wíl vind, en dat ons sal onthou wat jy wíl onthou. ²Geen ydele wense kan ons verhinder, of ons met ’n illusie van krag mislei nie. ³Laat jou wil vandag geskied, en die waansinnige oortuiging dat jy die hel in plaas van die Hemel verkies vir altyd beëindig.

9. Ons sal die langer oefenperiodes begin met die erkenning dat God se plan vir verlossing en slegs Syne, volkome in ooreenstemming met jou wil is. ²Dit is nie die plan van ’n vreemde mag wat teen jou sin aan jou opgedring word nie. ³Dit is die een plan waaroor jy en jou Vader hier in volkome ooreenstemming verkeer. ⁴Jy sal vandag slaag, die tydstip wat vasgestel is vir die bevryding van die Seun van God uit die hel en die bevryding van alle ydele wense. ⁵Nou word hy opnuut van sy wil bewus. ⁶Hy is op hierdie einste dag gewillig om die lig in homself te aanskou en gered te word.

10. Nadat jy jouself hieraan herinner het, en jou vas voorgeneem het om jou wil duidelik in gedagte te hou, sê vir jouself met sagte vasberadenheid en rustige sekerheid:

²Ek wil dat daar lig moet wees. ³Laat ek die lig aanskou wat God se Wil, en my wil, weerspieël.

⁴Laat jou wil dan toe om homself te laat geld, verbind met die krag van God en verenig met jou Self. ⁵Plaas die res van die oefenperiode onder Hulle leiding. ⁶Sluit jou by Hulle aan soos Hulle die pad aandui.

11. Lê tydens die korter oefenperiodes weer ’n verklaring af van wat jy werklik wil hê. ²Sê:

³Ek wil dat daar lig moet wees. ⁴Duisternis is nie my wil nie.

⁵Dit moet verskeie kere elke uur herhaal word. ⁶Dit is egter baie belangrik om vandag se idee onmiddellik op hierdie wyse toe te pas as jy in die versoeking kom om ’n grief van enige aard te koester. ⁷Dit sal jou help om jou griewe te laat vaar, in plaas van te vertroetel en in die donker weg te steek.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 73: I will there be light. (ACIM, W-73)

Les 72 – Om griewe te koester, is ’n aanval op God se plan vir verlossing.

Augustus 1, 2026 / admin

1. Hoewel ons vasgestel het dat die ego se verlossingsplan die teenoorgestelde van God se verlossingsplan is, het ons nog nie beklemtoon dat dit ’n aktiewe aanval op Sy plan, en ’n doelbewuste poging om dit te vernietig, is nie. ²In die aanval word aan God eienskappe toegeken wat eintlik met die ego geassosieer word, terwyl die ego skyn om God se eienskappe aan te neem.

2. Die ego se fundamentele wens is om God se plek in te neem. ²Die ego is in werklikheid die fisiese beliggaming van daardie wens. ³Want dit is daardie wens wat lyk asof dit die geestesdenke met ’n liggaam beklee, wat dit apart en alleen hou, en nie in staat stel om ander se geestesdenke te bereik nie, behalwe deur die liggaam wat gemaak was om dit gevange te hou. ⁴Die beperking op kommunikasie kan nie die beste metode wees om kommunikasie uit te brei nie. ⁵Nogtans sal die ego jou wysmaak dat dit so is.

3. Al sou die pogings om die beperkings te handhaaf wat ’n liggaam probeer voorskryf hier glashelder wees, is dit miskien nie so duidelik waarom die koestering van griewe ’n aanval op God se plan vir verlossing is nie. ²Maar laat ons dan die soort dinge waaroor jy geneig is om griewe te koester, in oorweging neem. ³Word hulle nie altyd geassosieer met iets wat ’n liggaam doen nie? ⁴’n Persoon sê iets waarvan jy nie hou nie. ⁵Hy doen iets waarvan jy nie hou nie. ⁶Hy “verraai” sy vyandige gedagtes deur sy gedrag.

4. Dit gaan vir jou hier glad nie oor wat die persoon is nie. ²Inteendeel, jy is uitsluitlik besorgd oor wat hy in ’n liggaam doen. ³Jy doen alles behalwe om hom te help om hom van die liggaam se beperkinge te bevry. ⁴Jy is aktief besig om hom daaraan te bind deur hom daarmee te verwar, en deur hulle oor een kam te skeer. ⁵Hiermee word God aangeval, want as Sy Seun slegs ’n liggaam is, moet Hy ook so wees. ⁶’n Skepper wat heeltemal anders as sy skepping is, is ondenkbaar.

5. As God ’n liggaam is, wat moet Sy plan vir verlossing dan wees? ²Wat kan dit anders as die dood wees? ³Deur Homself te probeer voorstel as die Outeur van lewe en nie van dood nie, is Hy ’n leuenaar en bedrieër vol valse beloftes, wat illusies in plaas van die waarheid aanbied. ⁴Die liggaam se oënskynlike werklikheid maak hierdie siening van God heel oortuigend. ⁵Om die waarheid te sê, as die liggaam werklik sou wees, sou dit inderdaad moeilik wees om hierdie gevolgtrekking vry te spring. ⁶En elke grief wat jy koester, is ’n dwingende beklemtoning dat die liggaam werklik is. ⁷Dit ignoreer geheel en al wat jou broer is. ⁸Dit versterk jou geloof dat hy ’n liggaam is, en jy veroordeel hom daarvoor. ⁹Dit voer aan dat sy verlossing die dood moet wees, en projekteer hierdie aanval op God, en hou Hom daarvoor verantwoordelik.

6. Na hierdie goed voorbereide arena, waar kwaai diere hul prooi soek en geen genade geduld word nie, kom die ego nou om jou te red. ²God het jou ’n liggaam gemaak. ³Baie goed. ⁴Laat ons dit aanvaar en bly wees. ⁵Moenie jouself, as ’n liggaam, laat ontneem van wat die liggaam te bied het nie. ⁶Vat die bietjie wat jy kan kry. ⁷God het jou niks gegee nie. ⁸Die liggaam is jou enigste verlosser. ⁹Hy is God se dood en jou verlossing.

7. Dit is die universele geloof van die wêreld wat jy sien. ²Sommiges haat die liggaam en probeer hom seermaak en verneder. ³Ander het weer die liggaam lief, en probeer om hom te verheerlik en op te hemel. ⁴Maar solank die liggaam sentraal staan in jou konsep van jouself, is jy besig om God se plan vir verlossing aan te val en koester jy griewe teen Hom en Sy skepping, sodat jy nie die Stem van die waarheid kan hoor en Hom as Vriend kan verwelkom nie. ⁵Jou uitverkore verlosser het Sy plek ingeneem. ⁶Dit is jou vriend; Hy is jou vyand.

8. Ons sal vandag probeer om hierdie sinlose aanvalle op verlossing te staak. ²Ons sal in plaas daarvan probeer om verlossing te verwelkom. ³Jou onderstebo persepsie het die innerlike vrede geruïneer. ⁴Jy het jouself in ’n liggaam gesien, en die waarheid buite jou, uitgesluit van jou bewussyn deur die beperkinge van die liggaam. ⁵Nou gaan ons probeer om dit anders te sien.

9. Die lig van die waarheid is in ons, waar dit deur God geplaas was. ²Dit is die liggaam wat buite ons is, en wat nie van belang is nie. ³Om sonder ’n liggaam te wees, beteken om in ons natuurlike staat te wees. ⁴Om die lig van die waarheid in ons te herken, is om onsself soos ons is, te herken. ⁵Om ons Self as los van die liggaam te sien, beteken om die aanval op God se plan vir verlossing te staak en dit in plaas daarvan te aanvaar. ⁶En waar Sy plan ook al aanvaar word, is dit reeds volbring.

10. Ons doel tydens die langer oefenperiodes vandag is om daarvan bewus te word dat God se plan vir verlossing alreeds in ons volbring is. ²Om hierdie doel te bereik, moet ons aanval vervang met aanvaarding. ³Solank ons dit aanval, kan ons nie begryp wat God se plan vir ons is nie. ⁴Ons val dus aan wat ons nie herken nie. ⁵Nou gaan ons probeer om weg te doen met oordeel, en te vra wat God se plan vir ons is:

⁶Wat is verlossing, Vader? ⁷Ek weet nie. ⁸Sê vir my, sodat ek kan begryp.

⁹Dan sal ons in stilte op Sy antwoord wag. ¹⁰Ons het God se plan vir verlossing aangeval sonder om te wag en te hoor wat dit is. ¹¹Ons het ons griewe so hard uitgeskreeu dat ons nie na Sy stem geluister het nie. ¹²Ons het ons griewe gebruik om ons oë te sluit en ore toe te stop.

11. Nou sal ons sien en hoor en leer. ²“Wat is verlossing, Vader?” ³Vra en jy sal antwoord gegee word. ⁴Soek en jy sal vind. ⁵Ons vra nie meer die ego wat verlossing is nie en waar om dit te vind nie. ⁶Ons vra dit van die waarheid. ⁷Wees dus verseker dat die antwoord waar sal wees, op grond van Wie jy vra.

12. Elke keer as jy voel dat jou vertroue afneem en jou hoop op sukses kwyn en sterf, herhaal jou vraag en jou versoek, en onthou dat jy nou ’n vraag stel aan die oneindige Skepper van oneindigheid, Wat jou soos Homself geskep het:

²Wat is verlossing, Vader? ³Ek weet nie. ⁴Sê vir my, sodat ek kan begryp.

⁵Hy sal antwoord. ⁶Wees vasbeslote om te hoor.

13. Een of miskien twee korter oefenperiodes elke uur sal vandag genoeg wees, omdat hulle ietwat langer as gewoonlik sal wees. ²Hierdie oefeninge moet begin met:

³Om griewe te koester, is ’n aanval op God se plan vir verlossing. ⁴Laat ek dit in plaas van griewe aanvaar. ⁵Wat is verlossing, Vader?

⁶Bly dan min of meer ’n minuut in stilte, verkieslik met geslote oë, en luister en wag op Sy antwoord.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 72: Holding grievances is an attack on God’s plan for salvation. (ACIM, W-72)

Les 71 – Slegs God se plan vir verlossing sal werk.

Augustus 1, 2026 / admin

1. Miskien besef jy nie dat die ego ’n plan vir verlossing ontwerp het wat in stryd met God se plan is nie. ²Dit is hierdie plan waarin jy glo. ³Aangesien dit die teenoorgestelde van God se plan is, glo jy ook dat om God se plan in plaas van dié van die ego te aanvaar, beteken om verdoem te wees. ⁴Dit klink natuurlik absurd. ⁵Maar nadat ons bepaal het presies wat die ego se plan is, sal jy miskien insien dat, hoe absurd dit ook al mag wees, jy wel daarin glo.

2. Die ego se plan vir verlossing sentreer om die koestering van griewe. ²Daarvolgens sou jy verlos kon word as iemand anders maar net op ’n ander manier sou praat en handel of as sekere eksterne omstandighede en gebeurtenisse maar net sou verander. ³Sodoende word die oorsprong van verlossing voortdurend buite jouself gesien. ⁴Elke grief wat jy koester, is ’n verklaring en ’n bewering waarin jy glo, wat sê: “As dit anders was, sou ek verlos wees.” ⁵Die verandering van jou geestesdenke wat vir verlossing nodig is, word dus van almal en alles buiten jouself gevra.

3. Die rol wat aan jou eie geestesdenke in hierdie plan toegeken word, is dan bloot om te bepaal wat anders as hyself moet verander om verlos te word. ²Volgens hierdie waansinnige plan is enige vermeende bron van verlossing aanvaarbaar, op voorwaarde dat dit nie werk nie. ³Dit verseker dat die vrugtelose soektog sal voortduur, want die illusie volhard dat, alhoewel hierdie hoop te alle tye onvervuld gebly het, daar nog steeds rede vir hoop op ander plekke en in ander dinge is. ⁴Iemand anders sal nog beter diens kan lewer, ’n ander situasie sal tog nog sukses kan oplewer.

4. So lyk die ego se plan vir verlossing. ²Jy kan waarskynlik sien hoe dit in ooreenstemming is met die ego se basiese leerstelling: “Soek, maar moenie vind nie.” ³Want wat sou jou ‘n groter waarborg kon gee dat jy nie verlossing sal vind nie, as om al jou pogings daarop te konsentreer om te soek waar dit nie is nie?

5. God se plan vir verlossing werk eenvoudig, want deur Sy leiding te volg, soek jy vir verlossing daar waar dit is. ²Maar as jy suksesvol wil wees, soos God jou dit belowe, moet jy bereid wees om slegs dáár te soek. ³Andersins is jou doel verdeeld en sal jy probeer om twee planne vir verlossing te volg, wat in alle opsigte in lynregte teenstelling is. ⁴Die resultaat kan alleen verwarring, ellende en ’n diep gevoel van mislukking en wanhoop veroorsaak.

6. Hoe kan jy aan dit alles ontsnap? ²Baie eenvoudig. ³Vandag se idee is die antwoord. ⁴Slegs God se plan vir verlossing sal werk. ⁵Daar kan geen werklike konflik hieroor wees nie, want daar is geen moontlike alternatief vir God se plan wat jou sal verlos nie. ⁶Sy plan is die enigste met ’n resultaat wat verseker is. ⁷Sy plan is die enigste een wat nie anders kan as om te slaag nie.

7. Laat ons vandag oefen om hierdie sekerheid te herken. ²En laat ons ons verheug dat daar ’n antwoord bestaan op wat vir ons ’n konflik blyk te wees met geen oplossing moontlik nie. ³By God is alle dinge moontlik. ⁴Op grond van Sy plan wat nie kan misluk nie, moet verlossing jou deel wees.

8. Begin die twee langer oefenperiodes vir vandag deur oor vandag se idee na te dink, en te besef dat dit uit twee dele bestaan, wat elkeen ewe veel bydra tot die geheel. ²God se plan vir jou verlossing sal werk, en ander planne sal nie werk nie. ³Moenie jouself toelaat om depressief of kwaad te word vir die tweede deel nie: dit is inherent aan die eerste. ⁴En in die eerste deel lê jou volledige bevryding van al jou eie waansinnige pogings en dwase planne om jouself te bevry. ⁵Hulle het tot depressie en kwade gevoelens aanleiding gegee, maar God se plan sal slaag. ⁶Dit sal tot bevryding en vreugde lei.

9. Laat ons gedagtig hieraan die res van die langer oefenperiodes daaraan bestee om God te vra om Sy plan aan ons te openbaar. ²Vra Hom baie spesifiek:

³Wat wil U hê moet ek doen ?

⁴Waarheen wil U hê moet ek gaan?

⁵Wat wil U hê moet ek sê, en vir wie?

⁶Gee Hom volle beheer oor die res van die oefenperiode, en laat Hy jou vertel wat deur jou gedoen moet word in Sy plan vir jou verlossing. ⁷Tot dieselfde mate waarin jy gewillig is om Sy Stem te hoor, sal Hy jou antwoord. ⁸Weier om nie te hoor nie. ⁹Die blote feit dat jy die oefening doen, bewys dat jy ’n mate van gewilligheid het om te luister. ¹⁰Dit is genoeg om op God se antwoord aanspraak te maak.

10. Sê dikwels vir jouself tydens die korter oefenperiodes dat God se plan vir verlossing, en slegs Syne alleen, sal werk. ²Wees vandag op jou hoede vir alle versoekings om griewe te koester, en reageer daarop met hierdie vorm van vandag se idee:

³Om aan griewe vas te hou, is die teenoorgestelde van God se plan vir verlossing. ⁴En slegs Sy plan sal werk.

⁵Probeer om vandag se idee ongeveer ses of sewe keer per uur te onthou. ⁶Daar kan geen beter manier wees om ’n halwe minuut of minder aan te bestee, as om die Bron van jou verlossing te onthou en Dit te sien waar Dit is nie.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 71: Only God’s plan for salvation will work. (ACIM, W-71)

Les 70 – My verlossing kom van my.

Augustus 1, 2026 / admin

1. Alle versoekings is niks anders as een of ander vorm van die basiese versoeking om nie vandag se idee te glo nie. ²Dit kom voor of verlossing van oral behalwe van jou kom. ³Dieselfde geld vir die oorsprong van skuld. ⁴Jy sien nie dat skuld sowel as verlossing in jou eie geestesdenke is en nêrens anders nie. ⁵Wanneer jy insien dat alle skuld alleenlik ’n uitvinding van jou geestesdenke is, sien jy ook in dat skuld en verlossing op dieselfde plek moet wees. ⁶Deur dit te begryp, word jy gered.

2. Die oënskynlike prys wat betaal word om vandag se idee te aanvaar, is dit: dit beteken dat niks buite jouself jou kan verlos nie, niks buite jouself jou vrede kan gee nie. ²Maar dit beteken ook dat niks buite jouself jou kan seermaak nie, jou vrede kan versteur nie of jou op enige wyse kan ontstel nie. ³Vandag se idee plaas jou in beheer van die universum, waar jy tuishoort op grond van wat jy is. ⁴Dit is nie ’n rol wat gedeeltelik aanvaar kan word nie. ⁵En jy behoort sekerlik te begin insien dat die aanvaarding daarvan verlossing beteken.

3. Dit mag egter ook wees dat dit nog nie vir jou duidelik is waarom die besef dat skuld in jou eie geestesdenke is, die insig meebring dat verlossing ook daar is nie. ²God sou tog nie die geneesmiddel vir die siekte geplaas het waar dit nie kan help nie. ³Dit is hoe jou geestesdenke sou gewerk het, maar bepaald nie Syne nie. ⁴Hy wil hê dat jy genees moet word en het dus die Bron van genesing bewaar daar waar die behoefte aan genesing lê.

4. Jy het probeer om presies die teenoorgestelde te doen deur alle pogings aan te wend om, hoe verwronge en vreemd ook al, genesing te skei van die siekte waarvoor dit bedoel was, en dus die siekte te behou. ²Jou doel was om te verseker dat genesing nie plaasvind nie. ³God se doel was om seker te maak dat dit wel gebeur.

5. Vandag oefen ons die insig dat God se Wil en ons eie wil hierin in wese dieselfde is. ²Dit is God se Wil dat ons genees word, en ons wil nie regtig siek wees nie, want dit maak ons ongelukkig. ³Deur vandag se idee te aanvaar, is ons dus in werklikheid in ooreenstemming met God. ⁴Dis nie Sy Wil dat ons siek moet wees nie. ⁵Ons ewemin. ⁶Hy wil dat ons genees sal word. ⁷Ons eweneens.

6. Ons is vandag gereed vir twee langer oefenperiodes wat elk ongeveer tien tot vyftien minute behoort te duur. ²Ons sal dit egter nog steeds aan jou oorlaat om te besluit wanneer om hulle te doen. ³Ons sal hierdie metode vir ’n aantal lesse volg, en dit sal weereens goed wees om vooruit te besluit wanneer ’n goeie tyd sal wees om vir elkeen opsy te sit, en dan so nougeset moontlik by jou eie besluite te bly.

7. Begin hierdie oefenperiodes deur vandag se idee te herhaal, en ’n stelling by te voeg wat dui op jou insig dat verlossing van niks buite jouself kom nie. ²Jy kan dit op dié manier stel:

³My verlossing kom van my. ⁴Dit kan nie van enige ander plek kom nie.

⁵Wy dan ’n paar minute daaraan, met toe oë, om terug te kyk op ’n paar van die plekke buite jouself waar jy in die verlede jou verlossing gesoek het: by ander mense, in besittings, in verskillende situasies en gebeure, en in selfbeelde wat jy probeer werklik maak het. ⁶Erken dat dit nie daar is nie en sê vir jouself:

⁷My verlossing kan nie van enige van hierdie dinge kom nie. ⁸My verlossing kom van my en van my alleen.

8. Ons sal nou weer probeer om die lig in jou te bereik, daar waar jou verlossing lê. ²Jy kan dit nie in die wolke wat die lig omring vind nie, en dit is juis daar waar jy dit gesoek het. ³Dit is nie daar nie. ⁴Dit is verby die wolke in die lig daaragter. ⁵Onthou dat jy deur die wolke sal moet gaan voordat jy die lig kan bereik. ⁶Maar onthou ook dat jy nooit iets in die wolkpatrone, wat jy jou voorgestel het, gekry het wat duursaam was, of wat jy enigsins wou hê nie.

9. Aangesien alle illusies van verlossing jou gefaal het, sal jy sekerlik nie in die wolke wil bly en tevergeefs daar vir afgode wil soek, as jy so maklik die lig van werklike verlossing sou kon binnegaan nie. ²Probeer enige metode wat jou pas om by die wolke verby te beweeg. ³As dit jou help, dink dan dat ek jou hand vashou en jou lei. ⁴En ek verseker jou dat dit nie bloot ’n lugspieëling sal wees nie.

10. Hou tydens vandag se kort en frekwente oefenperiodes in gedagte dat jou verlossing van jou kom en dat niks, behalwe jou eie gedagtes, jou vordering kan vertraag nie. ²Jy is vry van alle inmenging van buite. ³Jy is in beheer van jou verlossing. ⁴Jy is in beheer van die verlossing van die wêreld. ⁵Sê dan:

⁶My verlossing kom van my. ⁷Niks buite my kan my terughou nie. ⁸Binne my

lê die verlossing van die wêreld en die verlossing van myself.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 70: My salvation comes from me. (ACIM, W-70)

Les 69 – My griewe verberg die lig van die wêreld in my.

Augustus 1, 2026 / admin

1. Niemand kan sien wat jou griewe alles wegsteek nie. ²Omdat jou griewe die lig van die wêreld in jou verberg, verkeer almal in die duisternis, en staan jy langs hulle. ³Maar soos die sluier oor jou griewe gelig word, word jy saam met hulle bevry. ⁴Deel jou verlossing nou met hom wat langs jou gestaan het toe jy in die hel was. ⁵Hy is jou broer in die lig van die wêreld wat julle beide verlos.

2. Laat ons vandag opnuut ’n opregte poging aanwend om die lig in jou te bereik. ²Voordat ons dit in ons langer oefenperiode onderneem, laat ons ’n paar minute daaraan wy om na te dink oor wat ons probeer doen. ³Ons probeer letterlik om in voeling te kom met die verlossing van die wêreld. ⁴Ons probeer by die sluier van duisternis verby kyk wat dit verborge hou. ⁵Ons probeer om die sluier te laat lig, en om die trane van God se Seun in die sonlig te sien verdwyn.

3. Laat ons vandag ons langer oefenperiode begin in die volle besef dat dit so is, en met ware vasberadenheid probeer om dit wat vir ons duideliker as enigiets anders is, te bereik. ²Verlossing is ons enigste behoefte. ³Daar is hier geen ander doel nie, en geen ander funksie om te vervul nie. ⁴Om verlossing te leer, is ons enigste doel. ⁵Laat ons vandag die oeroue soektog beëindig deur die lig in ons te vind, en dit omhoog te hou sodat almal wat saam met ons soek dit kan sien, en hulle kan verbly.

4. Probeer nou om baie rustig, met geslote oë, al die inhoude wat gewoonlik jou bewuste beset, te laat gaan. ²Dink aan jou geestesdenke as ’n reusagtige sirkel wat omring word met ’n laag swaar donker wolke. ³Jy kan slegs die wolke sien, want dit kom voor of jy buite en heeltemal weg van die sirkel staan.

5. Van waar jy staan, is daar geen rede om te glo dat daar ’n skitterende lig is wat deur die wolke verberg word nie. ²Die wolke blyk die enigste werklikheid te wees. ³Hulle skyn al te wees wat daar is om te sien. ⁴Daarom probeer jy nie deur hulle en verby hulle te gaan nie, wat die enigste manier sou wees om werklik oortuig te word van hulle gebrek aan substansie. ⁵Ons sal vandag hierdie poging aanwend.

6. Probeer, nadat jy nagedink het oor die belangrikheid van wat jy vir jouself en die wêreld probeer doen, om dan in volkome stilte tot rus te kom, en onthou slegs hoe graag jy vandag die lig in jou wil bereik – nou! ²Besluit om by die wolke verby te gaan. ³Strek in jou gedagtes jou hand uit en raak hulle aan. ⁴Vee hulle met jou hande weg, voel hoe hulle op jou wange en voorkop en ooglede rus soos jy deur hulle gaan. ⁵Gaan voort; wolke kan jou nie stop nie.

7. As jy die oefeninge korrek doen, sal jy ’n gevoel kry dat jy opgelig en vorentoe gedra word. ²Jou ligte inspanning en jou geringe vasberadenheid doen ’n oproep op die krag van die universum om jou te help, en God Self sal jou uit die duisternis in die lig in optel. ³Jy is in harmonie met Sy Wil. ⁴Jy kan nie misluk nie, want jou wil is Syne.

8. Vertrou vandag op jou Vader, en wees seker dat Hy jou gehoor en geantwoord het. ²Jy mag miskien nog nie Sy antwoord herken het nie, maar jy kan inderdaad seker wees dat dit reeds vir jou gegee is en dat jy dit nog sal ontvang. ³Probeer om hierdie vertroue in jou geestesdenke te behou, soos jy poog om deur die wolke na die lig te beweeg. ⁴Probeer onthou dat jy uiteindelik besig is om jou Wil met God se Wil te verenig. ⁵Probeer om duidelik in gedagte te hou dat, wat jy met God onderneem, moet slaag. ⁶Laat die krag van God dan in en deur jou werk, sodat Sy Wil en joune kan geskied.

9. Herinner jouself daaraan tydens die korter oefenperiodes wat jy soveel as moontlik sal wil doen as gevolg van die belangrikheid van vandag se idee vir jou en jou geluk, dat jou griewe die lig van die wêreld vir jou bewussyn wegsteek. ²Herinner jouself ook daaraan dat jy nie alleen daarvoor soek nie en dat jy wel weet waar om daarvoor te soek. ³Sê dan:

⁴My griewe verberg die lig van die wêreld in my. ⁵Ek kan nie sien wat ek verberg het nie. ⁶Nogtans wil ek hê dat dit vir my bekend gemaak word, ter wille van my verlossing en vir die verlossing van die wêreld.

⁷Onthou om in elk geval ook vir jouself te sê:

⁸As ek hierdie grief hou, sal die lig van die wêreld vir my verborge bly,

as jy vandag versoek sou word om enigiets teen iemand te hou.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 69: My grievances hide the light of the world in me. (ACIM, W-69)

Les 68 – Liefde koester geen griewe nie.

Augustus 1, 2026 / admin

1. Jy is deur liefde soos homself geskep en kan nie jou Self ken as jy griewe koester nie. ²Om ’n grief te koester, is om te vergeet wie jy is. ³Om ’n grief te koester, beteken om jouself as ’n liggaam te sien. ⁴Om ’n grief te koester, is om die ego toe te laat om jou geestesdenke te beheer en die liggaam ter dood te veroordeel. ⁵Miskien besef jy nog net nie ten volle wat dit aan jou geestesdenke doen om griewe te koester nie. ⁶Dit blyk om jou van jou Bron af te splits en jou anders as Hy te maak. ⁷Dit laat jou glo dat Hy is soos jy dink jy geword het, want niemand kan sy Skepper as anders as homself voorstel nie.

2. Afgesluit van jou Self, wat bewus bly van Sy gelykenis met Sy Skepper, lyk dit of jou Self slaap, terwyl die deel van jou geestesdenke wat in sy slaap illusies weef, voorkom om wakker te wees. ²Kan dit alles ontstaan deur griewe te koester? ³O ja! Verseker! ⁴Want hy wat griewe koester, ontken dat hy deur liefde geskep is, en sy Skepper het vir hom angswekkend geword in sy drome van haat. ⁵Wie kan van haat droom en God nie vrees nie?

3. Net so seker as wat diegene wat griewe koester, God na hul eie beeld herdefinieer, is dit seker dat God hulle soos Homself geskep het, en hulle as deel van Hom gedefinieer het. ²Net so seker as wat diegene wat griewe koester onder skuld gebuk sal gaan, is dit seker dat diegene wat vergewe, vrede sal vind. ³Net so seker as wat diegene wat griewe koester, sal vergeet wie hulle is, is dit seker dat diegene wat vergewe, dit sal onthou.

4. Sou jy nie bereid gewees het om jou griewe te laat vaar as jy geglo het dat dit alles so is nie? ²Miskien dink jy dat jy nie jou griewe kan los nie. ³Dit is egter eenvoudig ’n kwessie van motivering. ⁴Vandag sal ons probeer uitvind hoe jy sonder hulle sal voel. ⁵As jy slegs maar in geringe mate daarin slaag, sal daar nooit weer ’n motiveringsprobleem wees nie.

5. Begin vandag se langer oefenperiodes deur jou geestesdenke te ondersoek vir diegene teen wie jy, wat jou betref en soos jy dit sien, ernstige griewe koester. ²Sommiges sal redelik maklik gekry word. ³Dink dan aan die oënskynlik kleiner griewe wat jy hou teen diegene van wie jy hou en van wie jy selfs dink jy lief het. ⁴Dit sal gou duidelik word dat daar niemand is teen wie jy nie die een of ander grief koester nie. ⁵Juis vanweë hierdie gegriefdheid sien jy jouself as heeltemal alleen in gans die universum.

6. Besluit nou om al hierdie mense as vriende te sien. ²Terwyl jy aan elkeen om die beurt dink as jy dit doen, sê jy vir hulle almal:

³Ek wil jou as my vriend sien, sodat ek kan onthou dat jy deel van my is en

ek myself kan leer ken.

⁴Bestee die res van die oefenperiode daaraan om aan jouself te probeer dink as volkome in vrede met elkeen en alles, veilig in ’n wêreld wat jou beskerm en liefhet, en wat jy op jou beurt ook liefhet. ⁵Probeer voel hoe veiligheid jou omvou, soos ’n gewelf jou omhul en jou regop hou. ⁶Probeer om te glo, hoe kort dit ook mag wees, dat niks jou op enige wyse kan skaad nie. ⁷Sê vir jouself aan die einde van die oefenperiode:

⁸Liefde koester geen griewe nie. ⁹As ek al my griewe laat gaan, sal ek weet dat

ek heeltemal veilig is.

7. Telkens wanneer daar in jou gedagtes ’n grief opkom teen iemand, of die persoon nou fisies aanwesig is of nie, moet die kort oefenperiodes ’n vinnige toepassing van vandag se idee in die volgende vorm bevat:

²Liefde koester geen griewe nie. ³Laat ek nie my Self verraai nie.

⁴Herhaal die idee boonop ’n paar keer elke uur in hierdie vorm:

⁵Liefde koester geen griewe nie. ⁶Ek wil tot my Self ontwaak deur al my griewe opsy te sit en in Hom te ontwaak.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 68: Love holds no grievances. (ACIM, W-68)

Les 67 – Liefde het my soos homself geskep.

Augustus 1, 2026 / admin

1. Vandag se idee is ’n volledige en akkurate verklaring van wat jy is. ²Dit is hoekom jy die lig van die wêreld is. ³Dit is waarom God jou aangestel het as die verlosser van die wêreld. ⁴Dit is waarom die Seun van God na jou opsien vir sy verlossing. ⁵Hy word verlos deur wat jy is. ⁶Ons sal vandag alles in die stryd werp om hierdie waarheid oor jou te bereik, en ten volle te besef dat dit die waarheid is, al is dit net vir ’n oomblikkie.

2. Tydens die langer oefenperiodes sal ons aan jou werklikheid en die volkome onveranderde en onveranderlike aard daarvan dink. ²Ons sal begin deur hierdie waarheid oor jou te herhaal, en dan vyf minute te bestee om sekere verwante gedagtes by te voeg, soos:

³Heiligheid het my heilig geskep.

⁴Vriendelikheid het my vriendelik geskep..

⁵Hulpvaardigheid het my hulpvaardig geskep.

⁶Volmaaktheid het my volmaak geskep.

⁷Enige kenmerk wat in ooreenstemming is met God, soos Hy Homself definieer, is geskik om gebruik te word. ⁸Ons probeer vandag om jou definisie van God ongedaan te maak en dit met Sy Eie te vervang. ⁹Ons probeer ook beklemtoon dat jy deel van Sy definisie van Homself uitmaak.

3. Nadat jy deur verskeie sulke verwante gedagtes gegaan het, probeer dan om alle gedagtes vir ’n kort voorbereidende periode te laat wegval, en daarna by al jou beelde en vooroordele oor jouself verby te gaan om so die waarheid in jou te bereik. ²As liefde jou soos homself geskep het, moet hierdie Self binne jou wees. ³En êrens in jou geestesdenke lê Dit en wag op jou.

4. Jy mag dit nodig vind om vandag se idee van tyd tot tyd te herhaal om verwarrende gedagtes te vervang. ²Miskien vind jy dit ook onvoldoende, en dat dit nodig is om voortdurend ander gedagtes, wat verband hou met die waarheid oor jouself, by te voeg. ³Maar miskien sal jy daarin slaag om daar verby te gaan, en deur die periode van gedagteloosheid te kom tot by die gewaarwording van ’n stralende lig waarin jy jouself herken soos liefde jou geskep het. ⁴Wees vol vertroue dat jy vandag baie sal doen om hierdie gewaarwording nader te bring, of jy nou voel dat jy daarin suksesvol is of nie.

5. Dit sal besonder nuttig wees om vandag se idee so dikwels as wat jy kan, te oefen. ²Dit is nodig dat jy die waarheid oor jouself so dikwels as moontlik hoor omdat jou geestesdenke so behep is met vals beelde omtrent jouself. ³Dit sal raadsaam wees om vier of vyf keer ’n uur, en miskien selfs meer, jouself daaraan te herinner dat liefde jou soos homself geskep het. ⁴Hoor die waarheid oor jouself hierin.

6. Probeer tydens die korter oefenperiodes besef dat dit nie jou nietige eenselwige stemmetjie is wat jou dit vertel nie. ²Dit is die Stem namens God wat jou aan jou Vader en aan jou Self herinner. ³Dit is die Stem van die waarheid wat alles wat die ego jou oor jouself vertel, vervang met die eenvoudige waarheid oor die Seun van God. ⁴Jy is geskep deur liefde soos homself.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 67: Love created me like itself. (ACIM, W-67)

Les 66 – My geluk en my funksie is één.

Augustus 1, 2026 / admin

1. Jy moes sekerlik gedurende ons afgelope lesse die beklemtoning opgemerk het op die verband tussen die vervulling van jou funksie en die verkryging van geluk. ²Dit is so omdat jy nie regtig die verband sien nie. ³Maar daar is meer as net ’n verband tussen hulle: hulle is dieselfde. ⁴Hulle vorm is verskillend, maar hulle inhoud is volkome één.

2. Die ego voer ’n voortdurende stryd met die Heilige Gees betreffende die fundamentele vraag oor wat jou funksie is. ²Net so voer hy voortdurend ’n stryd met die Heilige Gees oor wat jou geluk is. ³Dit is nie ’n wedersydse stryd nie. ⁴Die ego val aan en die Heilige Gees reageer nie. ⁵Hy weet wat jou funksie is. ⁶Hy weet dat dit jou geluk is.

3. Vandag sal ons probeer om verby hierdie totaal sinlose stryd te beweeg en by die waarheid oor jou funksie uit te kom. ²Ons sal nie betrokke raak by onsinnige argumente oor wat dit is nie. ³Ons sal nie hopeloos vervalle raak in die definiëring van geluk en die bepaling van die middele om dit te bereik nie. ⁴Ons sal nie aan die ego toegee deur te luister na sy aanval op die waarheid nie. ⁵Ons sal bloot bly wees dat ons kan uitvind wat die waarheid is.

4. Ons langer oefenperiodes vandag is gerig op jou aanvaarding van die feit dat daar nie net ’n wesenlike verband tussen die funksie wat God jou gegee het en jou geluk is nie, maar dat hulle in werklikheid identies is. ²God gee jou slegs geluk. ³Daarom moet die funksie wat Hy jou gegee het, geluk wees, selfs al lyk dit anders. ⁴Vandag se oefeninge is ’n poging om verder te gaan as hierdie verskille in voorkoms, en ’n gemeenskaplike inhoud te onderskei waar dit in waarheid bestaan.

5. Begin die tien tot vyftien minute oefenperiode deur na die volgende gedagtes te kyk:

²God gee my net geluk.

³Hy het my my funksie gegee.

⁴Daarom moet my funksie geluk wees.

⁵Probeer om die logika in hierdie volgorde te sien, selfs al aanvaar jy nog nie die gevolgtrekking nie. ⁶Die gevolgtrekking kan alleenlik onwaar wees as die eerste twee gedagtes verkeerd is. ⁷Laat ons dan vir ’n rukkie, soos ons oefen, oor die uitgangspunte nadink.

6. Die eerste uitgangspunt is dat God jou slegs geluk gee. ²Dit kan natuurlik onwaar wees, maar om onwaar te wees, is dit nodig om God te definieer as iets wat Hy nie is nie. ³Liefde kan nie boosheid skenk nie, en wat nie gelukkig is nie, is boos. ⁴God kan nie gee wat Hy nie het nie, en Hy kan nie hê wat Hy nie is nie. ⁵Tensy God jou slegs geluk gee, moet Hy boos wees. ⁶En dit is hierdie definisie van Hom wat jy glo as jy nie die eerste uitgangspunt aanvaar nie.

7. Die tweede uitgangspunt is dat God jou jou funksie gegee het. ²Ons het gesien dat jou geestesdenke alleenlik twee gedeeltes het. ³Die een word deur die ego beheer en bestaan uit illusies. ⁴Die ander een is die tuiste van die Heilige Gees, waar die waarheid vir ewig vertoef. ⁵Daar bestaan geen ander gidse om tussen te kies nie, en geen ander uitkomste is moontlik as gevolg van jou keuse nie behalwe die vrees wat die ego altyd veroorsaak, en die liefde wat die Heilige Gees altyd aanbied om dit te vervang.

8. Dit moet dus so wees dat jou funksie daargestel is deur God via Sy Stem, of andersins opgestel is deur die ego, wat jy gemaak het om Hom te vervang. ²Watter een is waar? ³As God jou nie jou funksie gegee het nie, moet dit ’n geskenk van die ego wees. ⁴Het die ego werklik geskenke om te gee, aangesien hyself ’n illusie is en bloot die illusie van geskenke aanbied?

9. Dink vandag tydens die langer oefenperiodes hieroor. ²Dink ook aan die menigte van vorms wat die illusie van jou funksie in jou geestesdenke aangeneem het, en die menigte van maniere waarop jy probeer het om verlossing te vind onder die ego se leiding. ³Het jy dit gevind? ⁴Was jy gelukkig? ⁵Het hulle vir jou vrede gebring? ⁶Ons het vandag baie eerlikheid nodig. ⁷Herinner jouself goed en eerlik aan die gevolge en oorweeg ook of dit ooit redelik was om geluk te verwag van enigiets wat die ego ooit voorgestel het. ⁸Nogtans is die ego die enigste alternatief vir die Heilige Gees se Stem.

10. Jy sal na waansin luister of jy sal die waarheid hoor. ²Probeer om hierdie keuse te maak soos jy aan die uitgangspunte waarop ons gevolgtrekking berus, dink. ³Ons kan in hierdie gevolgtrekking deel, maar in geen ander nie. ⁴Want God Self deel dit met ons. ⁵Vandag se idee is ’n volgende groot stap om wat dieselfde is as dieselfde waar te neem, en wat verskillend is as verskillend. ⁶Aan die een kant staan alle illusies. ⁷Aan die ander kant staan alle waarheid. ⁸Laat ons vandag probeer insien dat slegs die waarheid waar is.

11. Tydens die korter oefenperiodes, wat baie nuttig sal wees as hulle vandag twee keer per uur gedoen word, word die volgende soort toepassing voorgestel:

²My geluk en my funksie is één, want God het my beide gegee.

³Dit sal nie langer as ’n minuut nie, moontlik minder, duur om hierdie woorde stadig te herhaal en ’n bietjie daaroor na te dink wanneer jy hulle sê.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 66: My happiness and my function are one. (ACIM, W-66)

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

Sluit aan by ons e-poslys