Skrywer: admin (Page 2 of 8)

Les 65 – My enigste funksie is die een wat God my gegee het.

Augustus 1, 2026 / admin

1. Vandag se idee herbevestig jou toewyding aan verlossing. ²Dit herinner jou ook daaraan dat jy geen ander funksie het nie. ³Beide hierdie gedagtes is sonder meer noodsaaklik vir totale toewyding. ⁴Verlossing kan nie die enigste doel wees wat jy het as jy nog steeds ander op die kantlyn koester nie. ⁵Die volle aanvaarding van verlossing as jou enigste funksie, behels noodwendig twee fases: die erkenning van verlossing as jou funksie, en die opgee van al die ander doelstellings en doeleindes wat jy vir jouself uitgedink het.

2. Dit is die enigste manier waarop jy jou regmatige plek onder die verlossers van die wêreld kan inneem. ²Dit is die enigste manier om te kan sê en te bedoel: “My enigste funksie is die een wat God my gegee het.” ³Dit is die enigste manier om innerlike vrede te kry.

3. Sit vir vandag, en vir die komende dae, tien tot vyftien minute opsy vir ’n meer langdurige oefenperiode waartydens jy probeer begryp en aanvaar wat die idee vir die dag werklik beteken. ²Vandag se idee bied jou ’n ontvlugting uit al jou gewaande probleme. ³Dit gee in jou eie hande die sleutel tot die deur van vrede wat jy vir jouself toegemaak het. ⁴Dit verskaf jou die antwoord op al die soektogte wat jy sedert die begin van tyd onderneem het.

4. Probeer om elke dag, indien moontlik, die daaglikse uitgebreide oefenperiodes op ongeveer dieselfde tyd te doen. ²Probeer ook om hierdie tyd vooraf te bepaal, en dan so na as moontlik daarby te bly. ³Die doel hiervan is om jou dag sodanig te reël dat jy tyd vir God opsy gesit het, naas al die alledaagse planne en doelstellings wat jy gaan najaag. ⁴Dit is deel van die langtermynopleiding in dissipline wat jou geestesdenke nodig het, sodat die Heilige Gees dit aanhoudend kan gebruik vir die doel wat Hy met jou deel.

5. Begin die langer oefenperiodes deur die idee vir die dag te hersien. ²Sluit dan jou oë, herhaal die idee weer ’n keer vir jouself, en hou jou geestesdenke versigtig dop ten einde enige gedagtes wat dit te binne skiet, te onderskep. ³Moenie aan die begin enige pogings aanwend om slegs te konsentreer op gedagtes wat met vandag se idee verband hou nie. ⁴Probeer eerder om elke steurende gedagte wat mag opduik te identifiseer. ⁵Neem kennis van elkeen soos dit by jou opkom, maar met so min betrokkenheid of besorgdheid as moontlik, en laat elkeen dan gaan deur vir jouself te sê:

⁶Hierdie gedagte weerspieël ’n doelstelling wat my verhoed om my enigste funksie te aanvaar.

6. Na ’n ruk sal belemmerende gedagtes al moeiliker gevind word. ²Probeer egter ’n minuut of langer voortgaan in ’n poging om ’n paar van die ydele gedagtes wat jou aandag voorheen ontsnap het, te betrap, maar moenie jou inspan of oormatig moeite daarmee doen nie. ³Sê dan vir jouself:

⁴Laat my ware funksie vir my op hierdie skoon lei geskryf word.

⁵Jy hoef nie hierdie presiese woorde te gebruik nie, maar probeer die gevoel kry dat jy gewillig is om jou doelstellings van illusies met die doelstellings van waarheid te laat vervang.

7. Herhaal die idee vir vandag, ten slotte, nog ’n keer en wy die res van die oefenperiode daaraan om te probeer fokus op die belangrikheid daarvan vir jou, die verligting wat die aanvaarding daarvan vir jou sal gee deur jou konflikte eens en vir altyd op te los, asook die mate waarin jy werklik verlossing wil hê ten spyte van jou eie dwase teenoorgestelde idees.

8. Gebruik tydens die korter oefenperiodes, wat ten minste een keer ’n uur gedoen moet word, die volgende vorm om vandag se idee toe te pas:

²My enigste funksie is die een wat God my gegee het. ³Ek wil geen ander hê nie en ek het geen ander nie.

⁴Sluit soms jou oë as jy dit oefen, en hou hulle soms oop en kyk om jou heen. ⁵Dit is wat jy nou sien wat geheel en al sal verander as jy vandag se idee volkome aanvaar.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 65: My only function is the one God gave me. (ACIM, W-65)

Les 64 – Laat ek nie my funksie vergeet nie.

Augustus 1, 2026 / admin

1. Vandag se idee is bloot ’n ander manier om te sê: “Laat ek nie in die versoeking gelei word nie.” ²Die doel van die wêreld wat jy sien, is om jou funksie van vergifnis te verberg, en aan jou ’n regverdiging te verskaf om dit te vergeet. ³Dit is die versoeking om God en Sy Seun te verlaat deur ’n fisiese voorkoms aan te neem. ⁴Dit is dít waarna die liggaam se oë kyk.

2. Niks wat die liggaam se oë blyk te sien, kan enigiets anders as ’n vorm van versoeking wees nie, aangesien dit juis die doel van die liggaam was. ²Tog het ons geleer dat die Heilige Gees ’n ander toepassing of gebruik het vir al die illusies wat jy gemaak het, en daarom sien Hy ’n ander doel daarin. ³Vir die Heilige Gees is die wêreld ’n plek waar jy leer om jouself te vergewe van wat jy as jou sondes beskou. ⁴Volgens hierdie persepsie word die fisiese voorkoms van versoeking dan die geestelike herkenning van verlossing.

3. Ter herhaling van ons laaste paar lesse: jou funksie hier is om die lig van die wêreld te wees, ’n funksie wat deur God aan jou gegee is. ²Dit is net die arrogansie van die ego wat jou dit sal laat bevraagteken, en dit is net die vrees van die ego wat jou oorhaal om jouself as onwaardig te beskou vir die taak wat God Self aan jou toegewys het. ³Die wêreld se verlossing wag op jou vergifnis, want daardeur ontsnap die Seun van God aan alle illusies, en dus aan alle versoekings. ⁴Die Seun van God is jy.

4. Slegs deur die funksie wat God aan jou gegee het om te vervul, sal jy gelukkig wees. ²Dit is vanweë die feit dat dit jou funksie is om gelukkig te wees deur gebruik te maak van die middel waardeur geluk onafwendbaar word. ³Daar is geen ander manier nie. ⁴Daarom kies jy, elke keer as jy kies om jou funksie te vervul of nie, in werklikheid of jy gelukkig wil wees of nie.

5. Laat ons dit vandag onthou. ²Laat ons ons daaraan herinner in die oggend en weer in die aand, en ook deur die hele dag. ³Berei jouself vooraf voor vir al die besluite wat jy vandag sal neem, deur te onthou dat hulle almal eintlik baie eenvoudig is. ⁴Elkeen sal tot geluk of ongelukkigheid lei. ⁵Kan so ’n eenvoudige besluit regtig moeilik wees om te neem? ⁶Laat die vorm van die besluit jou nie mislei nie. ⁷Die ingewikkeldheid van die vorm impliseer nie ingewikkeldheid van inhoud nie. ⁸Dit is onmoontlik dat enige besluit op aarde ’n ander inhoud kan hê as hierdie enkele eenvoudige keuse. ⁹Dit is die enigste keuse wat die Heilige Gees sien.¹⁰Daarom is dit die enigste keuse wat daar is.

6. Laat ons dan vandag met hierdie gedagtes oefen:

²Laat ek nie my funksie vergeet nie.

³Laat ek nie probeer om God se funksie met myne te vervang nie.

⁴Laat ek vergewe en gelukkig wees.

⁵Bestee vandag ten minste een keer tien of vyftien minute daaraan om met geslote oë hieroor na te dink. ⁶Verwante gedagtes sal jou kom help, as jy die deurslaggewende belangrikheid van jou funksie vir jouself en die wêreld onthou.

7. Bestee ’n paar minute, tydens die herhaaldelike toepassings van vandag se idee deur die dag, daaraan om hierdie gedagtes te hersien, en dan daaroor en oor niks anders nie te dink. ²Dit sal aan die begin veral moeilik wees, aangesien jy nie bedrewe is in die dissipline wat dit van die geestesdenke vereis nie. ³Om jou te help om te konsentreer, mag dit miskien nodig wees om redelik dikwels te herhaal: “Laat ek nie my funksie vergeet nie.”

8. By die korter oefenperiodes word daar twee vorms verlang. ²Doen die oefeninge, by tye, met geslote oë terwyl jy konsentreer op die gedagtes wat jy gebruik. ³Hou jou oë die ander tye nadat jy die gedagtes hersien het, oop, en kyk dan stadig en onselektief om jou heen terwyl jy vir jouself sê:

⁴Om hierdie wêreld te verlos, is my funksie.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 64: Let me not forget my function. (ACIM, W-64)

Les 63 – Die lig van die wêreld bring aan elkeen se geestesdenke vrede deur my vergifnis.

Augustus 1, 2026 / admin

1. Hoe heilig is jy nie wat oor die mag beskik om vrede na elkeen se geestesdenke te bring nie! ²Hoe salig is jy nie wat kan leer om die middel te herken om dit deur jou te laat doen nie! ³Watter ander doel sou jy kon hê wat jou groter geluk sou kon bring?

2. Jy is inderdaad die lig van die wêreld met so ’n funksie. ²Die Seun van God reken op jou vir sy verlossing. ³Jy kan hom dit gee, want dit behoort aan jou. ⁴Moet geen niksbeduidende doel of betekenislose begeerte in plaas daarvan aanvaar nie, of jy sal jou funksie vergeet en die Seun van God in die hel agterlaat. ⁵Dit is geen ydele versoek wat van jou gevra word nie. ⁶Jy word gevra om verlossing te aanvaar, sodat dit joune kan wees om te gee.

3. Omdat ons die belangrikheid van hierdie funksie insien, sal ons tevrede wees om dit vandag baie dikwels te onthou. ²Ons sal die dag begin met die erkenning daarvan, en die dag afsluit met die gedagte daaraan in ons bewussyn. ³En die hele dag deur sal ons die volgende, so dikwels ons kan, herhaal:

⁴Die lig van die wêreld bring aan elkeen se geestesdenke vrede deur my vergifnis. ⁵Ek is die middel wat God aangewys het vir die verlossing van die wêreld.

4. As jy jou oë sluit, sal jy dit heelwaarskynlik makliker vind om verwante gedagtes te laat opkom tydens die minuut of meer wat jy moet bestee om dit te oordink. ²Moet egter nie vir so ’n geleentheid wag nie. ³Geen kans mag verlore gaan om vandag se idee te versterk nie. ⁴Onthou dat God se Seun op jou reken vir sy verlossing. ⁵En Wie anders as jy Self kan Sy Seun wees?

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 63: The light of the world brings peace to every mind through my forgiveness. (ACIM, W-63)

Les 62 – Vergifnis is my funksie as die lig van die wêreld.

Augustus 1, 2026 / admin

1. Dit is jou vergifnis wat die wêreld van duisternis na die lig sal bring. ²Dit is jou vergifnis wat jou die lig waarin jy sien, laat herken. ³Vergifnis is die demonstrasie dat jy die lig van die wêreld is. ⁴Deur jou vergifnis onthou jy weer die waarheid oor jouself. ⁵Daarom lê jou verlossing in jou vergifnis.

2. Illusies oor jouself en die wêreld is een en dieselfde. ²Dit is hoekom alle vergifnis ’n geskenk aan jouself is. ³Jou doel is om uit te vind wie jy is omdat jy jou Identiteit ontken het deur die skepping en sy Skepper aan te val. ⁴Nou leer jy hoe om die waarheid te onthou. ⁵Want hierdie aanval moet deur vergifnis vervang word, sodat gedagtes van die lewe gedagtes van die dood kan vervang.

3. Onthou dat jy met elke aanval ’n beroep doen op jou eie swakheid, terwyl jy met elke daad van vergifnis ’n beroep doen op die krag van Christus in jou. ²Begin jy dan nie begryp wat vergifnis vir jou kan beteken nie? ³Dit sal alle gevoel van swakheid, inspanning en vermoeidheid uit jou geestesdenke verwyder. ⁴Dit sal alle vrees en skuld en pyn verwyder. ⁵Dit sal jou opnuut bewus maak van die onkwetsbaarheid en krag wat God Sy Seun gegee het.

4. Laat ons bly wees om hierdie dag te begin en te eindig deur vandag se idee toe te pas en dit so dikwels as moontlik die hele dag deur te gebruik. ²Dit sal help om die dag vir jou so gelukkig te maak soos God wil hê jy moet wees. ³En dit sal diegene om jou, asook diegene wat in tyd en ruimte ver weg blyk te wees, help om hierdie geluk met jou te deel.

5. Sluit jou oë vandag, so dikwels as wat jy moontlik kan, en sê vir jouself:

²Vergifnis is my funksie as die lig van die wêreld.

³Ek sal my funksie vervul, sodat ek gelukkig kan wees.

⁴Bestee dan ’n minuut of twee om oor jou funksie, en die geluk en bevryding wat dit jou sal bring, te dink. ⁵Laat verwante gedagtes vrylik opkom, want jou hart sal hierdie woorde herken, en in jou geestesdenke is die besef en bewustheid dat hulle waar is. ⁶As jou aandag sou afdwaal, herhaal die idee en voeg by:

⁷Ek sal dit onthou, want ek wil gelukkig wees.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 62: Forgiveness is my function as the light of the world. (ACIM, W-62)

Les 61 – Ek is die lig van die wêreld.

Julie 31, 2026 / admin

1. Wie anders as God se Seun is die lig van die wêreld? ²Dit is dus bloot ’n verklaring van die waarheid oor jouself. ³Dit is die teenoorgestelde van ’n verklaring van trots, arrogansie of selfbedrog. ⁴Dit beskryf nie die selfkonsep wat jy gemaak het nie. ⁵Dit verwys nie na enige van die kenmerke wat jy jou afgode toebedeel het nie. ⁶Dit verwys na jou soos jy deur God geskep is. ⁷Dit stel eenvoudig die waarheid.

2. Vandag se idee is vir die ego die toppunt van selfverheerliking. ²Maar die ego begryp nie nederigheid nie en verwar dit met selfvernedering. ³Nederigheid bestaan uit die aanvaarding van jou rol in die verlossing en dat jy geen ander sal aanneem nie. ⁴Dit is nie nederigheid om daarop aan te dring dat jy nie die lig van die wêreld kan wees nie, as dit die funksie is wat God aan jou toegeken het. ⁵Dit is slegs arrogansie wat sou aanvoer dat hierdie funksie nie vir jou bestem kan wees nie, en arrogansie kom altyd van die ego.

3. Ware nederigheid vra dat jy vandag se idee aanvaar, want dit is God se Stem wat jou vertel dat dit waar is. ²Dit is ’n eerste tree om jou werklike funksie op aarde te aanvaar. ³Dit is ’n reuse-stap om jou regmatige plek in verlossing in te neem. ⁴Dit is ’n positiewe bevestiging van jou reg om verlos te word, en ’n erkenning van die mag wat aan jou gegee is om ander te verlos.

4. Jy sal so dikwels as moontlik vandag aan hierdie idee wil dink. ²Dit is die volmaakte antwoord op alle illusies, en daarom op alle versoekings. ³Dit bring al die beelde wat jy oor jouself gemaak het na die waarheid, en help jou om in vrede heen te gaan, bevry van alle laste en seker van jou doel.

5. Soveel oefenperiodes moontlik moet vandag onderneem word, alhoewel nie een langer as ’n minuut of twee hoef te wees nie. ²Begin hulle deur vir jouself te sê:

³Ek is die lig van die wêreld. ⁴Dit is my enigste funksie.

⁵Dit is waarom ek hier is.

⁶Dink dan vir ’n kort rukkie oor hierdie stellings, verkieslik met toe oë as omstandighede dit toelaat. ⁷Laat ’n paar verwante gedagtes by jou opkom en herhaal die idee vir jouself as jou gedagtes van die kerngedagte afdwaal.

6. Moenie vergeet om die dag met ’n oefenperiode te begin en te eindig nie. ²Op dié manier sal jy wakker word met ’n erkenning van die waarheid oor jouself, dit dwarsdeur die dag versterk, en gaan slaap met die herbevestiging van jou enigste funksie en doel hier. ³Hierdie twee oefenperiodes mag langer as die ander wees, as jy hulle nuttig vind en hulle wil uitbrei.

7. Vandag se idee gaan die ego se beuselagtige idees oor wat jy is en wat jou doel hier is, ver te bowe. ²Vir jou as die een wat verlossing bring, is dit duidelik noodsaaklik. ³Dit is die eerste van ’n aantal reuse-stappe wat ons in die volgende paar weke gaan neem. ⁴Probeer vandag om ’n stewige fondament vir hierdie opmars te begin bou. ⁵Jy is die lig van die wêreld. ⁶God het Sy plan vir die verlossing van Sy Seun op jou gebou.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 61: I am the light of the world. (ACIM, W-61)

Les 60 – Hersiening (46-50)

Mei 26, 2026 / admin

Die volgende idees word vandag hersien:

1. (46) God is die Liefde waarin ek vergewe.

²God vergewe nie, want Hy het nooit veroordeel nie. ³Wie onskuldig is, kan nie beskuldig nie, en wie hulle onskuld aanvaar het, sien niks om te vergewe nie. ⁴Tog is vergifnis die middel waardeur ek my onskuld sal herken. ⁵Dit is die weerspieëling van God se Liefde op aarde. ⁶Dit sal my na genoeg aan die Hemel bring sodat die Liefde van God na my kan neerbuig en my na Hom toe kan ophef.

2. (47) God is die krag waarop ek vertrou.

²Dit is nie my eie krag waarmee ek vergewe nie. ³Dit is die krag van God in my wat ek onthou as ek vergewe. ⁴Soos ek begin sien, herken ek Sy weerspieëling op aarde. ⁵Ek vergewe alle dinge omdat ek Sy Krag in my voel ontwaak. ⁶En ek begin om die Liefde te onthou wat ek verkies het om te vergeet, maar wat my nie vergeet het nie.

3. (48) Daar is niks om te vrees nie.

²Hoe veilig sal die wêreld nie vir my lyk wanneer ek dit kan sien nie! ³Dit sal hoegenaamd nie lyk soos dit wat ek nou dink ek sien nie. ⁴Alles en almal wat ek sien, sal hulle na my wend om my te seën. ⁵Ek sal in almal my beste Vriend herken. ⁶Wat sou daar kon wees om te vrees in ’n wêreld wat ek vergewe het, en wat my vergewe het?

4. (49) God se Stem praat met my die hele dag deur.

²Daar is nie ’n oomblik dat God se Stem ophou om ’n oproep te doen op my bereidheid tot vergifnis ten einde my te verlos nie. ³Daar is nie ’n oomblik dat Sy Stem nie my gedagtes lei, my handelinge rig, en my voete stuur nie. ⁴Ek stap gestadig en doelgerig die waarheid tegemoet. ⁵Ek kan nêrens anders gaan nie, want God se Stem is die enigste Stem en die enigste Gids wat aan Sy Seun gegee is.

5. (50) Ek word deur die Liefde van God gedra.

²Soos ek na God se Stem luister, word ek deur Sy Liefde gedra. ³Soos ek my oë oopmaak, verlig Sy Liefde die wêreld sodat ek kan sien. ⁴Soos ek vergewe, herinner Sy Liefde my dat Sy Seun sonder sonde is. ⁵En soos ek die wêreld aanskou met die visie wat Hy my gegee het, onthou ek dat ek Sy Seun is.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 60: Review (46-50). (ACIM, W-60)

Les 59 – Hersiening (41-45)

Mei 26, 2026 / admin

Hier is die volgende idees om vandag te hersien:

1. (41) God gaan met my, waar ek ook al gaan.

²Hoe kan ek alleen wees as God altyd saam met my gaan? ³Hoe kan ek twyfelagtig en onseker oor myself wees as daar volmaakte sekerheid in Hom rus? ⁴Hoe kan ek deur enigiets ontstel word as Hy in my woon in absolute vrede? ⁵Hoe kan ek ly as liefde en vreugde my, danksy Hom, omring. ⁶Laat ek geen illusies oor myself koester nie. ⁷Ek is volmaak, want God gaan met my, waar ek ook al gaan.

2. (42) God is my Krag. ²Visie is Sy geskenk.

³Laat ek nie vandag op my eie oë staatmaak om te sien nie. ⁴Laat ek gewillig wees om my jammerlike illusie van wat sien is, te verruil vir die visie wat deur God gegee word. ⁵Christus se visie is Sy geskenk, en Hy het dit vir my gegee. ⁶Laat ek my vandag op hierdie geskenk beroep, sodat hierdie dag my kan help om die ewigheid te begryp.

3. (43) God is my Bron. ²Los van Hom kan ek nie sien nie.

³Ek kan sien wat God wil hê ek moet sien. ⁴Ek kan nie enigiets anders sien nie. ⁵Buite Sy Wil is daar slegs illusies. ⁶Dít is wat ek kies wanneer ek dink ek los van Hom kan sien. ⁷Dít is wat ek kies wanneer ek probeer om met die liggaam se oë te sien. ⁸Tog is die visie van Christus vir my gegee om hulle te vervang. ⁹Dit is met hierdie visie dat ek wil sien.

4. (44) God is die lig waarin ek sien.

²Ek kan nie in die duisternis sien nie. ³God is die enigste lig. ⁴As ek dus wil sien, moet dit deur Hom wees. ⁵Ek het probeer bepaal wat sig is, en ek was verkeerd. ⁶Nou word dit my gegee om te begryp dat God die Lig is waarin ek sien. ⁷Laat ek visie, en die gelukkige wêreld wat dit my sal wys, verwelkom.

5. (45) God is die Geestesdenke waarmee ek dink.

²Ek het geen gedagtes wat ek nie met God deel nie. ³Ek het apart van Hom geen gedagtes nie, want ek het geen geestesdenke apart van Syne nie. ⁴As deel van Sy Geestesdenke is my gedagtes Syne en Sy Gedagtes myne.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 59: Review (41-45). (ACIM, W-59)

Les 58 – Hersiening (36-40)

Mei 26, 2026 / admin

Die volgende idees word vandag hersien:

1. (36) My heiligheid omvou alles wat ek sien.

²Vanuit my heiligheid kom my persepsie van die werklike wêreld. ³Nou dat ek vergewe het, sien ek myself nie meer as skuldig nie. ⁴Ek kan die onskuld wat die waarheid oor my is, aanvaar. ⁵Gesien deur begrypende oë, is die heiligheid van die wêreld al wat ek sien, want ek kan maar net die gedagtes wat ek oor myself koester, uitbeeld.

2. (37) My heiligheid seën die wêreld.

²My persepsie van my heiligheid seën my nie alleen nie. ³Almal en alles wat ek in die lig daarvan sien, deel in die vreugde wat dit my bring. ⁴Daar is niks buite en behalwe vreugde nie, want daar is niks wat nie my heiligheid deel nie. ⁵Soos ek my heiligheid herken, skyn die heiligheid van die wêreld al verder uit vir almal om te sien.

3. (38) Daar is niks wat my heiligheid nie kan doen nie.

²My heiligheid is in sy krag van genesing onbeperk, omdat dit onbeperk is in die krag van sy verlossing. ³Wat is daar om van verlos te word, behalwe illusies? ⁴En wat is alle illusies anders as vals idees oor myself? ⁵My heiligheid maak hulle almal ongedaan deur die waarheid oor my te bevestig. ⁶In die teenwoordigheid van my heiligheid, wat ek met God Self deel, verdwyn alle afgode.

4. (39) My heiligheid is my verlossing.

²Aangesien my heiligheid my van alle skuld verlos, beteken ’n erkenning van my heiligheid ’n erkenning van my verlossing. ³Dit is ook ’n erkenning van die verlossing van die wêreld. ⁴As ek eenmaal my heiligheid aanvaar het, kan niks my bang maak nie. ⁵En omdat ek nie bang is nie, moet iedereen my insig deel, wat die geskenk is van God aan my en die wêreld.

5. (40) Ek is geseënd as ’n Seun van God.

²Hierin lê my aanspraak op al die goeie en alleenlik die goeie. ³Ek is geseënd as ’n Seun van God. ⁴Alle goeie dinge is myne, want God het hulle vir my bedoel. ⁵Ek kan geen verlies, ontbering of pyn ly nie, dit alles op grond van Wie ek is. ⁶My Vader ondersteun, beskerm en lei my in alle dinge. ⁷Sy sorg vir my is oneindig, en vergesel my altyd. ⁸Ek is vir ewig geseënd as Sy Seun.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 58: Review (36-40). (ACIM, W-58)

Les 57 – Hersiening (31-35)

Mei 26, 2026 / admin

Laat ons vandag die volgende idees hersien:

1. (31) Ek is nie ’n slagoffer van die wêreld wat ek sien nie.

²Hoe kan ek die slagoffer van ’n wêreld wees wat volledig ongedaan gemaak kan word as ek so verkies? ³My kettings is losgemaak. ⁴Ek kan hulle laat afval deur bloot so te wens. ⁵Die tronkdeur staan oop. ⁶Ek kan vertrek deur eenvoudig uit te loop. ⁷Niks hou my in hierdie wêreld vas nie. ⁸Slegs my wens om te bly, hou my gevange. ⁹Ek sal my waansinnige wense opgee en uiteindelik die sonlig in loop.

2. (32) Ek het die wêreld wat ek sien, self uitgedink.

²Die tronk, waarin ek myself sien, is my eie maaksel. ³Al wat ek hoef te doen, is om dit in te sien, en ek is vry. ⁴Ek het myself wysgemaak dat dit moontlik is om die Seun van God gevange te neem. ⁵Ek het my bitterlik in hierdie oortuiging wat ek nie langer wil hê nie, misgis. ⁶Die Seun van God moet vir ewig vry wees. ⁷Hy is soos God hom geskep het en nie wat ek van hom wil maak nie. ⁸Hy is waar God wil hê hy moet wees, en nie waar ek gedink het om hom gevange te hou nie.

3. (33) Daar is ’n ander manier om na die wêreld te kyk.

²Aangesien die doel van die wêreld nie die een is wat ek daaraan toegeken het nie, moet daar ’n ander manier wees om daarna te kyk. ³Ek sien alles onderstebo, en my gedagtes is die teenoorgestelde van die waarheid. ⁴Ek sien die wêreld as ’n gevangenis vir God se Seun. ⁵Dan moet dit dus so wees dat die wêreld in werklikheid ’n plek is waar hy bevry kan word. ⁶Ek wil die wêreld beskou soos dit is, en dit sien as ’n plek waar die Seun van God sy vryheid vind.

4. (34) Ek sou vrede in plaas hiervan kan sien.

²Wanneer ek die wêreld as ’n plek van vryheid sien, besef ek dit weerspieël die wette van God in plaas van die reëls wat ek daarvoor opgemaak het waaraan hy moet gehoorsaam. ³Ek sal begryp dat vrede daarin woon, en nie stryd nie. ⁴En dan sal ek sien dat vrede ook woon in die harte van almal wat hierdie plek met my deel.

5. (35) My geestesdenke is deel van God se Geestesdenke. ²Ek is baie heilig.

³Soos ek die vrede van die wêreld met my broers deel, begin ek begryp dat hierdie vrede van diep binne myself kom. ⁴Die wêreld waarna ek kyk, het die lig van my vergifnis aangeneem, en straal vergifnis na my terug. ⁵In hierdie lig begin ek sien wat my illusies oor myself verborge gehou het. ⁶Ek begin die heiligheid van al wat leef, myself ingeslote, en hulle éénheid met my, te begryp.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 57: Review (31-35). (ACIM, W-57)

Les 56 – Hersiening (26-30)

Mei 26, 2026 / admin

Ons hersiening omvat vandag die volgende:

1. (26) My aanvalsgedagtes val my onkwetsbaarheid aan.

²Hoe kan ek weet wie ek is wanneer ek myself voortdurend as ’n slagoffer van aanval sien. ³Dit lyk of pyn, siekte, verlies, ouderdom en dood my bedreig. ⁴Dit kom voor of al my hoop, wense en planne aan die genade oorgelewer is van ’n wêreld waaroor ek geen beheer het nie. ⁵Tog is volmaakte veiligheid en volledige vervulling my erfenis. ⁶Ek het probeer om my erfenis weg te gee in ruil vir die wêreld wat ek sien. ⁷Maar God het my erfenis vir my veilig bewaar. ⁸My eie werklike gedagtes sal my leer wat dit is.

2. (27) Meer as enigiets anders, wil ek tog net kan sien.

²Omdat ek insien dat dit wat ek sien, ’n weerspieëling is van wat ek dink ek is, besef ek dat visie my grootste behoefte is. ³Die wêreld wat ek sien, getuig van die angswekkende aard van die selfbeeld wat ek gemaak het. ⁴As ek wil onthou wie ek is, is dit noodsaaklik dat ek hierdie beeld van myself laat vaar. ⁵Soos dit deur waarheid vervang word, sal visie sekerlik aan my geskenk word. ⁶En met hierdie visie sal ek met mildheid en liefde die wêreld en myself aanskou.

3. (28) Ek wil, meer as enigiets anders, dinge anders sien.

²Die wêreld wat ek sien, hou my angswekkende selfbeeld in stand, en waarborg die voortsetting daarvan. ³Terwyl ek die wêreld sien soos ek dit nou sien, kan die waarheid nie tot my bewussyn deurdring nie. ⁴Ek wil graag dat die deur agter hierdie wêreld vir my oopgemaak word, sodat ek daaragter die wêreld kan sien wat die Liefde van God weerspieël.

4. (29) God is in alles wat ek sien.

²Agter elke beeld wat ek gevorm het, bly die waarheid onveranderd. ³Agter elke sluier wat ek oor die gelaat van die liefde getrek het, het die lig helder en onverdof gebly. ⁴Agter al my waansinnige wense is my wil verenig met die Wil van my Vader. ⁵God is steeds oral en vir ewig in alles. ⁶En ons, wat deel van Hom is, sal uiteindelik verby alle uiterlike verskyningsvorms verby kyk en die volle waarheid daaragter herken.

5. (30) God is alles wat ek sien, want God is in my geestesdenke.

²In my eie geestesdenke, agter al my waansinnige skeidings- en aanvalsgedagtes, is die kennis dat alles vir ewig een is. ³Ek het nie die kennis van Wie ek is verloor deur dit te vergeet nie. ⁴Dit het vir my behoue gebly in die Geestesdenke van God wat nie Sy Gedagtes verlaat het nie. ⁵En ek, wat daartoe behoort, is één daarmee en één met Hom.