Etiket: Spirituele Groei (Page 2 of 2)

Les 62 – Vergifnis is my funksie as die lig van die wêreld.

Augustus 1, 2026 /

1. Dit is jou vergifnis wat die wêreld van duisternis na die lig sal bring. 2Dit is jou vergifnis wat jou die lig waarin jy sien, laat herken. 3Vergifnis is die demonstrasie dat jy die lig van die wêreld is. 4Deur jou vergifnis onthou jy weer die waarheid oor jouself. 5Daarom lê jou verlossing in jou vergifnis.

2. Illusies oor jouself en die wêreld is een en dieselfde. 2Dit is hoekom alle vergifnis ’n geskenk aan jouself is. 3Jou doel is om uit te vind wie jy is omdat jy jou Identiteit ontken het deur die skepping en sy Skepper aan te val. 4Nou leer jy hoe om die waarheid te onthou. 5Want hierdie aanval moet deur vergifnis vervang word, sodat gedagtes van die lewe gedagtes van die dood kan vervang.

3. Onthou dat jy met elke aanval ’n beroep doen op jou eie swakheid, terwyl jy met elke daad van vergifnis ’n beroep doen op die krag van Christus in jou. 2Begin jy dan nie begryp wat vergifnis vir jou kan beteken nie? 3Dit sal alle gevoel van swakheid, inspanning en vermoeidheid uit jou geestesdenke verwyder. 4Dit sal alle vrees en skuld en pyn verwyder. 5Dit sal jou opnuut bewus maak van die onkwetsbaarheid en krag wat God Sy Seun gegee het.

4. Laat ons bly wees om hierdie dag te begin en te eindig deur vandag se idee toe te pas en dit so dikwels as moontlik die hele dag deur te gebruik. 2Dit sal help om die dag vir jou so gelukkig te maak soos God wil hê jy moet wees. 3En dit sal diegene om jou, asook diegene wat in tyd en ruimte ver weg blyk te wees, help om hierdie geluk met jou te deel.

5. Sluit jou oë vandag, so dikwels as wat jy moontlik kan, en sê vir jouself:

              2Vergifnis is my funksie as die lig van die wêreld.

              3Ek sal my funksie vervul, sodat ek gelukkig kan wees.

4Bestee dan ’n minuut of twee om oor jou funksie, en die geluk en bevryding wat dit jou sal bring, te dink. 5Laat verwante gedagtes vrylik opkom, want jou hart sal hierdie woorde herken, en in jou geestesdenke is die besef en bewustheid dat hulle waar is. 6As jou aandag sou afdwaal, herhaal die idee en voeg by:

            7Ek sal dit onthou, want ek wil gelukkig wees.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 62: Forgiveness is my function as the light of the world. (ACIM, W-62)

Les 61 – Ek is die lig van die wêreld.

Julie 31, 2026 /

1. Wie anders as God se Seun is die lig van die wêreld? 2Dit is dus bloot ’n verklaring van die waarheid oor jouself. 3Dit is die teenoorgestelde van ’n verklaring van trots, arrogansie of selfbedrog. 4Dit beskryf nie die selfkonsep wat jy gemaak het nie. 5Dit verwys nie na enige van die kenmerke wat jy jou afgode toebedeel het nie. 6Dit verwys na jou soos jy deur God geskep is. 7Dit stel eenvoudig die waarheid.

2. Vandag se idee is vir die ego die toppunt van selfverheerliking. 2Maar die ego begryp nie nederigheid nie en verwar dit met selfvernedering. 3Nederigheid bestaan uit die aanvaarding van jou rol in die verlossing en dat jy geen ander sal aanneem nie. 4Dit is nie nederigheid om daarop aan te dring dat jy nie die lig van die wêreld kan wees nie, as dit die funksie is wat God aan jou toegeken het. 5Dit is slegs arrogansie wat sou aanvoer dat hierdie funksie nie vir jou bestem kan wees nie, en arrogansie kom altyd van die ego.

3. Ware nederigheid vra dat jy vandag se idee aanvaar, want dit is God se Stem wat jou vertel dat dit waar is. 2Dit is ’n eerste tree om jou werklike funksie op aarde te aanvaar. 3Dit is ’n reuse-stap om jou regmatige plek in verlossing in te neem. 4Dit is ’n positiewe bevestiging van jou reg om verlos te word, en ’n erkenning van die mag wat aan jou gegee is om ander te verlos.

4. Jy sal so dikwels as moontlik vandag aan hierdie idee wil dink. 2Dit is die volmaakte antwoord op alle illusies, en daarom op alle versoekings. 3Dit bring al die beelde wat jy oor jouself gemaak het na die waarheid, en help jou om in vrede heen te gaan, bevry van alle laste en seker van jou doel.

5. Soveel oefenperiodes moontlik moet vandag onderneem word, alhoewel nie een langer as ’n minuut of twee hoef te wees nie. 2Begin hulle deur vir jouself te sê:

              3Ek is die lig van die wêreld. 4Dit is my enigste funksie.

              5Dit is waarom ek hier is.

6Dink dan vir ’n kort rukkie oor hierdie stellings, verkieslik met toe oë as omstandighede dit toelaat. 7Laat ’n paar verwante gedagtes by jou opkom en herhaal die idee vir jouself as jou gedagtes van die kerngedagte afdwaal.

6. Moenie vergeet om die dag met ’n oefenperiode te begin en te eindig nie. 2Op dié manier sal jy wakker word met ’n erkenning van die waarheid oor jouself, dit dwarsdeur die dag versterk, en gaan slaap met die herbevestiging van jou enigste funksie en doel hier. 3Hierdie twee oefenperiodes mag langer as die ander wees, as jy hulle nuttig vind en hulle wil uitbrei.

7. Vandag se idee gaan die ego se beuselagtige idees oor wat jy is en wat jou doel hier is, ver te bowe. 2Vir jou as die een wat verlossing bring, is dit duidelik noodsaaklik. 3Dit is die eerste van ’n aantal reuse-stappe wat ons in die volgende paar weke gaan neem. 4Probeer vandag om ’n stewige fondament vir hierdie opmars te begin bou. 5Jy is die lig van die wêreld. 6God het Sy plan vir die verlossing van Sy Seun op jou gebou.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 61: I am the light of the world. (ACIM, W-61)

Les 28 – Ek wil, meer as enigiets anders, dinge anders sien.

Augustus 12, 2025 /

1. Vandag pas ons gister se idee in werklikheid spesifiek toe. 2In hierdie oefenperiodes sal jy ’n reeks duidelik omskrewe verbintenisse maak. 3Die vraag of jy hulle in die toekoms gaan nakom, gaan ons nie hier aan nie. 4As jy nou ten minste gewillig is om hulle te maak, het jy begin om hulle na te kom. 5En ons is nog maar aan die begin.

2. Jy mag wonder hoekom dit byvoorbeeld belangrik is om te sê: “Ek wil, meer as enigiets anders, hierdie tafel anders sien.” 2Op sigself is dit hoegenaamd nie belangrik nie. 3Maar wat is op sigself? 4En wat beteken “op sigself”? 5Jy sien ’n aantal afsonderlike dinge om jou, wat in werklikheid beteken dat jy hoegenaamd nie sien nie. 6Óf jy sien, óf jy sien nie. 7As jy een ding anders gesien het, sal jy alles anders sien. 8Die lig wat jy in een daarvan sien, is dieselfde lig wat jy in almal sien.

3. As jy sê: “Ek wil, meer as enigiets anders, hierdie tafel anders sien,” verplig jy jouself om jou vooropgesette idees van die tafel terug te trek en jou geestesdenke oop te maak vir wat dit is, en waartoe dit dien. 2Jy definieer dit nie aan die hand van die verlede nie. 3Jy vra wat dit is, eerder as om dit te vertel wat dit is. 4Jy verbind nie die betekenis daarvan met jou eie nietige ervarings van tafels nie, en ook beperk jy nie die doel daarvan tot jou eie onbeduidende persoonlike gedagtes nie.

4. Jy sal nie, wat jy alreeds gedefinieer het, bevraagteken nie. 2En die doel van hierdie oefeninge is om vrae te stel en die antwoorde te kry. 3Deur te sê: “Ek wil, meer as enigiets anders, hierdie tafel anders sien,” verbind jy jouself daartoe om te sien. 4Dit is nie ’n eensydige verbintenis nie. 5Dit is ’n verbintenis wat ewe veel vir die tafel geld as vir enigiets anders, nie meer nie en ook nie minder nie.

5. Jy sou, om die waarheid te sê, visie aan die hand van slegs daardie tafel kon verwerf as jy al jou eie idees daaroor sou terugtrek en met volkome oop geestesdenke daarna sou kyk. 2Dit het iets om jou te wys: iets wat pragtig is en skoon en van oneindige waarde, vol geluk en vol verwagting. 3Weggesteek onder al jou idees lê die werklike doel daarvan, die doel wat dit met die hele universum deel.

6. Deur die tafel as ’n voorwerp te gebruik vir die toepassing van vandag se idee, vra jy dus eintlik om die doel van die universum te sien. 2Jy rig dieselfde versoek tot elke voorwerp wat jy tydens die oefenperiodes gebruik. 3En jy maak ’n verbintenis met elkeen van hulle om hulle doel aan jou bekend te maak, in plaas daarvan om jou eie oordeel daaroor uit te spreek.

7. Ons sal vandag ses oefenperiodes van twee minute elk hê, waartydens vandag se idee eers genoem word en dan toegepas word op wat jy ook al om jou sien. 2Nie alleen moet die voorwerpe willekeurig gekies word nie, maar daar moet aan elkeen dieselfde opregtheid toegeken word wanneer vandag se idee daarop toegepas word, in ’n poging om te erken dat hulle oor gelyke waarde beskik in hul bydrae tot jou vermoë om te sien.

8. Soos gewoonlik moet die toepassings die naam bevat van die voorwerp waarop jou oë toevallig val, en jy moet jou oë daarop laat rus terwyl jy sê:

              2Meer as enigiets anders wil ek hierdie __________ anders sien.

3Elke toepassing moet taamlik stadig uitgevoer word, en so aandagtig moontlik. 4Daar is geen haas nie.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 28: Above all else I want to see things differently. (ACIM, W-28)

Les 24 – Ek sien nie wat in my eie beste belang is nie.

Augustus 8, 2025 /

1. In geen situasie wat ontstaan, weet jy watter uitkoms jou gelukkig sal maak nie. 2Jy beskik dus oor geen leiding vir gepaste optrede, en oor geen maatstaf om die resultaat te beoordeel nie. 3Wat jy doen, word bepaal deur jou persepsie van die situasie, en daardie persepsie is verkeerd. 4Dit is dus onvermydelik dat jy nie jou hoogste en beste belang dien nie. 5Nogtans is dit jou enigste doel in elke situasie wat korrek waargeneem word. 6Anders sal jy nie insien wat dit is nie.

2. As jy ingesien het dat jy nie sien wat jou hoogste of beste belang is nie, sou jy dit geleer kon word. 2Maar as jy daarvan oortuig is dat jy wél weet wat dit is, kan jy nie leer nie. 3Vandag se idee is ’n stap op pad na die oopmaking van jou geestesdenke sodat die leerproses kan begin.

3. Vandag se oefeninge vereis baie meer eerlikheid as waaraan jy gewoond is. 2’n Paar onderwerpe wat eerlik en versigtig oorweeg word in elk van die vyf oefenperiodes wat vandag gedoen moet word, sal van groter hulp wees as die oppervlakkige verkenning van ’n groot hoeveelheid. 3Twee minute word voorgestel vir elke periode van geestesdenke-ondersoek wat die oefeninge behels.

4. Die oefenperiodes moet begin deur vandag se idee te herhaal, gevolg deur ’n ondersoek van die geestesdenke met geslote oë na onopgeloste situasies waaroor jy tans bekommerd is. 2Die klem moet val op die blootlegging van die uitkoms wat jy verlang. 3Jy sal gou agterkom dat jy ’n hele aantal doeleindes in gedagte het as deel van die gewenste uitkoms, en ook dat hierdie doeleindes op verskillende vlakke lê en dikwels konflikteer.

5. Noem in die toepassing van vandag se idee elke situasie wat by jou opkom, en som dan versigtig soveel doeleindes as moontlik op wat jy wil hê bereik moet word vir die oplossing daarvan. 2Die vorm van elke toepassing kan naastenby soos volg wees:

            3In die situasie met betrekking tot __________ sou ek graag wil hê dat _________             gebeur, en _________ gebeur,

ensovoorts. 4Probeer om soveel verskillende soorte uitkomste te dek soos wat eerlik by jou opkom, selfs al lyk dit of sommige nie direk met die situasie verband hou, of selfs heeltemal daarby hoort nie.

6. As hierdie oefeninge korrek gedoen word, sal jy gou insien dat jy ’n groot aantal eise aan die situasie stel wat niks daarmee te doen het nie. 2Jy sal ook insien dat baie van jou doelstellings teenstrydig is, dat jy geen eenduidige uitkoms in gedagte het nie en dat jy, hoe die situasie ook al mag verloop, teleurgesteld sal voel met sommige van jou doelstellings.

7. Nadat jy die lys van soveel hoopvolle doelstellings as moontlik, gedek het, sê vir jouself met elke onopgeloste situasie wat deur jou geestesdenke gaan:

              2Ek sien nie wat my beste belang is in hierdie situasie nie,

en gaan dan voort met die volgende een.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 24: I do not perceive my own best interests. (ACIM, W-24)

Les 15 – My gedagtes is beelde wat ek gemaak het.

Julie 30, 2025 /

1. Juis omdat die gedagtes wat jy dink jy dink as beelde verskyn, herken jy hulle nie as niks nie. 2Jy dink dat jy hulle dink, en dus dink jy dat jy hulle sien. 3Dit is hoe jou “sien” tot stand gekom het. 4Dit is die funksie wat jy aan jou liggaam se oë gegee het. 5Dit is nie sien nie. 6Dit is die maak van beelde. 7Dit neem die plek van sien in en vervang visie met illusie.

2. Hierdie inleidende idee tot die proses van beelde maak wat jy sien noem, sal nie veel betekenis vir jou hê nie. 2Jy sal dit begin begryp wanneer jy klein ligrandjies rondom dieselfde bekende voorwerpe wat jy nou sien, gesien het. 3Dit is die begin van ware visie. 4Jy kan seker wees dat ware visie spoedig sal volg wanneer dit gebeur het.

3. Soos ons voortgaan, mag jy baie “momente van lig” ervaar. 2Hulle mag baie verskillende vorms aanneem, sommiges nogal heeltemal onverwags. 3Moenie vir hulle bang wees nie. 4Hulle is tekens dat jy uiteindelik jou oë begin oopmaak. 5Hulle sal nie aanhou nie, want hulle is bloot simbolies van ware persepsie, en hou nie verband met kennis nie. 6Hierdie oefeninge sal nie kennis vir jou openbaar nie. 7Maar hulle sal die pad daarheen voorberei.

4. Herhaal, in die beoefening van vandag se idee, dit eers vir jouself en pas dit dan toe op alles wat jy om jou sien deur dit by die naam te noem en jou oë daarop te laat rus, terwyl jy sê:

              2Hierdie __________ is ’n beeld wat ek gemaak het.

              3Daardie __________ is ’n beeld wat ek gemaak het.

4Dit is nie nodig om ’n groot aantal spesifieke voorwerpe vir die toepassing van vandag se idee in te sluit nie. 5Dit is egter nodig om aan te hou kyk na elke voorwerp terwyl jy die idee vir jouself herhaal. 6Die idee moet elke keer taamlik stadig herhaal word.

5. Alhoewel jy uit die aard van die tydsduur nie in staat sal wees om die idee op regtig baie dinge van toepassing te maak gedurende die oefenperiode van ongeveer ’n minuut wat aanbeveel word nie, moet jy probeer om die keuses so vry en willekeurig as moontlik te maak. 2Minder as ’n minuut sal voldoende wees vir die oefenperiodes as jy ongemaklik begin voel. 3Moenie meer as drie oefenperiodes vir vandag se idee hou nie, tensy jy geheel en al gemaklik daarmee voel, en moenie vier oorskry nie. 4Die idee kan egter gedurende die dag na behoefte toegepas word.

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 15: My thoughts are images that I have made. (ACIM, W-15)

Newer posts »

Vrywaring / Disclaimer: Hierdie Afrikaanse weergawe is my interpretasie van A Course in Miracles, wat my diep geïnspireer het. Ek het die Kursus in Engels bestudeer en het daarna verlang om my ervaring en insigte in my moedertaal, Afrikaans, te deel. Die werkboek-lesse en terme op hierdie webwerf is vertaal deur Henri Theron. Vir die volledige vertaalde Afrikaanse weergawe van A Course in Miracles, is jy welkom om in aanraking te kom met Henri by: (www.nkiw.org).

Oorspronklik gepubliseer deur die Foundation for Inner Peace in 1975, soos gelei deur Dr. Helen Schucman en mede-skrywer Dr. William Thetford.
Met hul goedkeuring het die Foundation for A Course in Miracles die onderrig-vertakking van die Kursus geword. Albei organisasies het deur die jare getrou gevolg hoe Helen wou hê haar manuskrip hanteer moes word.
As ’n universele, self-studie geestelike leerpad, leer die Kursus ’n unieke vorm van vergifnis—om die hindernisse in die denkgees te verwyder en die blywende teenwoordigheid van liefde te ontdek.

Hierdie webwerf word nie vir geldelike gewin of donasies aangebied nie. Ek doen dit bloot uit liefde en oortuiging, omdat ek glo dat hierdie Kursus 'n kragtige waarheid bevat wat met almal gedeel moet word. Dit is my hart se behoefte om hierdie Kursus bekend te stel aan enigiemand wat daarmee wil werk. Sê hello, stuur vir my 'n e-pos by: (marnus@hemelbewus.org).

Sluit aan by ons e-poslys

All quotes are from A Course in Miracles, Third Edition.
Copyright © 2007 by the Foundation for Inner Peace, copyright holder and publisher.
448 Ignacio Blvd., #306, Novato, CA 94949, acim.org, used with permission.

© 2026 Hemelbewus

Patternstorm Designs