Etiket: a course in miracles (Page 1 of 3)

Les 50 – Ek word deur die Liefde van God gedra.

1. Hier is die antwoord op elke probleem waarvoor jy te staan mag kom, vandag en môre en deur alle tye heen. ²In hierdie wêreld glo jy dat jy deur alles, behalwe God, gesteun word. ³Jou vertroue word gestel in die mees onbenullige en banale simbole: pille, geld, “beskermende” klere, invloed, status, gewildheid, die “regte” mense ken, en ’n eindelose lys van allerhande vorms van nietighede wat jy met magiese krag beklee.

2. Al hierdie dinge is jou plaasvervangers vir God se Liefde. ²Al hierdie dinge word gekoester om te verseker dat jy met jou liggaam identifiseer. ³Hulle is lofsange vir die ego. ⁴Moenie jou vertroue op die waardelose vestig nie. ⁵Dit sal jou nie onderskraag nie.

3. Net die Liefde van God sal jou in alle omstandighede beskerm. ²Dit sal jou uit elke beproewing lig, jou hoog bo al die gewaande gevare van hierdie wêreld verhef tot ’n sfeer van volmaakte vrede en veiligheid. ³Dit sal jou na ’n toestand van die geestesdenke voer wat deur niks bedreig en ontstel kan word nie, en waar niks die ewige kalmte van die Seun van God kan verbreek nie.

4. Moenie op illusies vertrou nie. ²Hulle sal jou in die steek laat. ³Vestig al jou vertroue op die Liefde van God binne jou: ewig, onveranderlik en vir altyd onfeilbaar. ⁴Dit is die antwoord op wat jou ook al vandag konfronteer. ⁵Deur die Liefde van God in jou kan jy alle oënskynlike probleme sonder moeite en in die volste vertroue oplos. ⁶Sê dit vandag dikwels vir jouself. ⁷Dit is ’n verklaring waarmee jy jou van die geloof in afgode bevry. ⁸Dit is jou erkenning van die waarheid oor jouself.

5. Laat die idee, twee keer vandag, oggend en aand, vir tien minute elk diep in jou bewuste insink. ²Herhaal dit, dink daaroor na, laat verwante gedagtes jou kom help om die waarheid daarvan te erken, en laat vrede oor jou vloei soos ’n kombers van beskerming en geborgenheid. ³Laat geen beuselagtige en dwase gedagtes binne om die heilige geestesdenke van die Seun van God te versteur nie. ⁴Dit is die Koninkryk van die Hemele. ⁵Dit is die rusplek wat die Vader jou vir ewig toebedeel het.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 50: I am sustained by the Love of God. (ACIM, W-50)

Les 49 – God se Stem praat met my, die hele dag deur.

1. Dit is heeltemal moontlik om die hele dag deur na God se Stem te luister sonder om jou gewone bedrywighede op enigerlei wyse te onderbreek. ²Die deel van jou geestesdenke waarin die waarheid woon, is in voortdurende kommunikasie met God, of jy hiervan bewus is of nie. ³Die ander gedeelte van jou geestesdenke is die een wat in die wêreld funksioneer en die wêreld se wette gehoorsaam. ⁴Dit is hierdie gedeelte wat voortdurend deurmekaar, ontwrig en uiters onseker is.

2. Die deel wat na die Stem namens God luister, is kalm, altyd rustig en heeltemal seker. ²Dit is in werklikheid die enigste deel wat daar is. ³Die ander deel is ’n onbeheerste illusie, waansinnig en dol, maar sonder werklikheid van enige aard. ⁴Probeer om nie vandag daarna te luister nie. ⁵Probeer om jou met die deel van jou geestesdenke te vereenselwig waar stilte en vrede altyd heers. ⁶Probeer om God se Stem te hoor wat jou liefdevol roep en jou daaraan herinner dat jou Skepper nie Sy Seun vergeet het nie.

3. Ons sal vandag ten minste vier oefenperiodes van vyf minute elke benodig, en meer indien moontlik. ²Ons sal werklik probeer om God se Stem te hoor wat jou aan Hom en aan jou Self herinner. ³Ons sal hierdie hoogs vreugdevolle en hoogs heilige gedagtes met vertroue nader, in die wete dat ons hiermee ons wil met die Wil van God verbind. ⁴Hy wil hê dat jy Sy Stem hoor. ⁵Hy het dit vir jou gegee om gehoor te word.

4. Luister in diepe stilte. ²Wees heeltemal stil en open jou geestesdenke. ³Gaan verby al die skrille gegil en siek fantasieë wat jou werklike gedagtes verberg en jou ewige verbinding met God versluier. ⁴Sink diep in die vrede in wat verby die waansinnige, rumoerige gedagtes, taferele en geluide van hierdie kranksinnige wêreld wag. ⁵Jy woon nie hier nie. ⁶Ons probeer jou werklike tuiste te bereik. ⁷Ons probeer die plek bereik waar jy waarlik welkom is. ⁸Ons probeer God bereik.

5. Moenie vergeet om vandag se idee dikwels te herhaal nie. ²Doen dit met oop oë waar nodig, maar met toe oë waar moontlik. ³En maak seker om rustig te sit en die idee vir vandag te herhaal wanneer jy ook al kan, deur jou oë vir die wêreld te sluit, en te weet dat jy God se Stem uitnooi om met jou te praat.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 49: God’s Voice speaks to me all through the day. (ACIM, W-49)

Les 47 – God is die krag waarop ek vertrou.

1. As jy op jou eie krag vertrou, het jy genoeg rede om onrustig, angstig en bang te wees. ²Wat kan jy voorspel of beheer? ³Wat is daar in jou waarop gereken kan word? ⁴Wat kan jou die vermoë verskaf om van alle fasette van enige probleem bewus te wees, en dit op sodanige wyse op te los dat daar slegs goed van kan kom? ⁵Wat is daar in jou wat jou die regte oplossing laat insien, en jou die waarborg gee dat dit bereik sal word?

2. Uit jouself kan jy niks van hierdie dinge doen nie. ²Om te glo dat jy kan, beteken om jou vertroue te plaas waar daar geen gronde vir vertroue is nie, en om vrees, angs, depressie, woede en verdriet te regverdig. ³Wie kan sy vertroue in swakheid stel en veilig voel? ⁴Maar wie kan sy vertroue in krag stel en swak voel?

3. God is onder alle omstandighede jou veiligheid. ²Sy Stem praat namens Hom in alle situasies en in elke aspek van alle situasies, en sê presies vir jou wat jou te doen staan om ’n beroep te doen op Sy krag en Sy beskerming. ³Daar is geen uitsonderings nie, want God ken geen uitsonderings nie. ⁴En die Stem Wat namens Hom praat, dink soos Hy dink.

4. Vandag sal ons probeer om by jou eie swakheid verby te reik na die Bron van werklike krag. ²Vier oefenperiodes van vyf minute elk is vandag nodig, en langer en meer gereelde tye word sterk aanbeveel. ³Sluit jou oë en begin, soos gewoonlik, met ’n herhaling van die idee vir die dag. ⁴Bestee dan ’n minuut of twee om na situasies in jou lewe te soek wat jy met vrees belaai het, en laat vaar elkeen deur vir jouself te sê:

⁵God is die Krag waarop ek vertrou.

5. Probeer nou om by alle besorgdhede wat met jou eie gevoel van ontoereikendheid verband hou, verby te glip. ²Dit is duidelik dat elke situasie wat jou besorgd maak, gepaard gaan met gevoelens van ontoereikendheid, want anders sou jy geglo het dat jy die situasie suksesvol kan hanteer. ³Jy sal nie selfvertroue kry deur bloot op jouself te vertrou nie. ⁴Maar die krag van God in jou laat alles altyd suksesvol verloop.

6. Die erkenning van jou eie swakheid is ’n noodsaaklike stap om jou foute te herstel, maar dit is nouliks voldoende om jou die selfvertroue te gee wat jy nodig het, en waarop jy geregtig is. ²Jy moet ook daarvan bewus word dat vertroue in jou werklike krag ten volle geregverdig is in alle opsigte en in alle omstandighede.

7. Probeer tydens die laaste fase van die oefenperiode om diep in jou geestesdenke ’n plek van ware veiligheid te bereik. ²Jy sal weet dat jy dit bereik het as jy ’n gevoel van diepe vrede, hoe kortstondig ook al, ervaar. ³Laat los alle onbenullighede wat aan die oppervlakte van jou geestesdenke borrel en kook, en reik in die diepte daaronder na die Koninkryk van die Hemele. ⁴Daar is ’n plek in jou waar daar volmaakte vrede heers. ⁵Daar is ’n plek in jou waar niks onmoontlik is nie. ⁶Daar is ’n plek in jou waar die krag van God vir ewig vertoef.

8. Herhaal die idee dikwels gedurende die dag. ²Gebruik dit as jou antwoord op enige versteuring. ³Onthou dat vrede jou reg is, want jy vestig jou vertroue op die krag van God.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 47: God is the strength in which I trust. (ACIM, W-47)

Les 46 – God is die Liefde waarin ek vergewe.

1. God vergewe nie, want Hy het nooit veroordeel nie. ²En daar moet veroordeling wees voordat vergifnis nodig is. ³Vergifnis is die groot behoefte van hierdie wêreld, maar dit is omdat dit ’n wêreld van illusies is. ⁴Dié wat vergewe, bevry hulleself dus van illusies, terwyl dié wat hulle van vergifnis weerhou, hulleself daaraan bind. ⁵Net soos jy alleen jouself veroordeel, vergewe jy ook alleen jouself.

2. Maar alhoewel God nie vergewe nie, is Sy Liefde nietemin die basis vir vergifnis. ²Vrees veroordeel en liefde vergewe. ³Vergifnis maak ongedaan wat deur vrees veroorsaak is, en laat die geestesdenke weer terugkeer om bewus te word van God. ⁴Om hierdie rede kan vergifnis waarlik verlossing genoem word. ⁵Dit is die middel waardeur illusies verdwyn.

3. Vandag se oefeninge vereis ten minste drie oefenperiodes van ’n volle vyf minute elk, en soveel korter toepassings as moontlik. ²Begin die langer oefenperiodes deur vandag se idee, soos gewoonlik, vir jouself te herhaal. ³Sluit jou oë as jy dit doen en bestee ’n minuut of twee om jou geestesdenke te ondersoek vir diegene wat jy nog nie vergewe het nie. ⁴Dit maak nie saak “hoeveel” jy hulle nie vergewe het nie. ⁵Jy het hulle volkome vergewe of glad nie.

4. As jy die oefeninge goed doen, sal dit nie vir jou moeilik wees om ’n aantal mense te kry wat jy nie vergewe het nie. ²Jy kan van die veilige veronderstelling uitgaan dat enigeen van wie jy nie hou nie, ’n geskikte onderwerp is. ³Noem elkeen op sy naam en sê:

⁴God is die Liefde waarin ek jou, (naam), vergewe.

5. Die bedoeling van die eerste fase van vandag se oefenperiodes is om jou in staat te stel om jouself te vergewe. ²Nadat jy die idee toegepas het op almal wat in jou geestesdenke opgekom het, sê vir jouself:

³God is die Liefde waarin ek myself vergewe.

⁴Bestee dan die res van die oefenperiode daaraan om verwante idees, soos die volgende, by te voeg:

⁵God is die Liefde waarmee ek myself lief het.

⁶God is die Liefde waarin ek geseënd is.

6. Die toepassingsvorm mag aansienlik varieer, maar die sentrale idee moet nie uit die oog verloor word nie. ²Jy sou byvoorbeeld kon sê:

³Ek kan nie skuldig wees nie, want ek is ’n Seun van God.

⁴Ek is alreeds vergewe.

⁵Geen vrees is moontlik in geestesdenke wat deur God bemin word nie.

⁶Dit is nie nodig om aan te val nie, want liefde het my vergewe.

⁷Die oefenperiode moet egter eindig met ’n herhaling van die dag se idee soos dit oorspronklik gestel is.

7. Die korter oefenperiodes kan bestaan uit óf ’n herhaling van die dag se idee in sy oorspronklike óf in ’n verwante vorm, net soos jy verkies. ²Sorg egter om meer spesifieke toepassings te maak as dit nodig is. ³Hulle sal nodig wees op elke oomblik van die dag wanneer jy bewus word van enige soort negatiewe reaksie teenoor iemand, hetsy teenwoordig of nie. ⁴In dié geval, sê stil vir hom:

⁵God is die Liefde waarin ek jou vergewe.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 46: God is the Love in which I forgive. (ACIM, W-46)

Les 45 – God is die Geestesdenke waarmee ek dink.

1. Vandag se idee bevat die sleutel tot wat jou werklike gedagtes is. ²Hulle is nie wat jy dink jy dink nie, net soos wat jy dink jy sien, geen verband hou met visie op enige wyse nie. ³Daar is geen verband tussen wat werklik is en wat jy dink werklik is nie. ⁴Niks wat jy dink jou regte gedagtes is, kom enigsins met jou regte gedagtes ooreen nie. ⁵Niks wat jy dink jy sien, toon enige ooreenkoms met wat visie jou sal wys nie.

2. Jy dink met die Geestesdenke van God. ²Sodoende deel jy jou gedagtes met Hom, soos Hy Syne met jou deel. ³Hulle is dieselfde gedagtes, want hulle word deur dieselfde Geestesdenke gedink. ⁴Om te deel, beteken om eenders of één te maak. ⁵Ook verlaat die gedagtes waarmee jy met die Geestesdenke van God dink nie jou geestesdenke nie, want gedagtes verlaat nie hulle bron nie. ⁶Daarom is jou gedagtes in die Geestesdenke van God, nes jy is. ⁷Hulle is ook in jou geestesdenke, waar Hy is. ⁸Soos jy deel van Sy Geestesdenke is, is jou gedagtes deel van Sy Geestesdenke.

3. Waar is jou werklike gedagtes dan? ²Vandag gaan ons probeer om hulle te bereik. ³Ons sal hulle in jou geestesdenke moet soek, want dit is waar hulle is. ⁴Hulle moet steeds daar wees, want hulle kon nie hulle bron verlaat het nie. ⁵Wat deur die Geestesdenke van God gedink word, is ewig, omdat dit ’n deel van die skepping is.

4. Ons drie oefenperiodes van vyf minute elk vir vandag neem dieselfde vorm aan as wat ons gebruik het om gister se idee toe te pas. ²Ons sal probeer om die onwerklike agter te laat en die werklike te soek. ³Ons sal die wêreld afwys ten gunste van die waarheid. ⁴Ons sal ons nie deur die gedagtes van die wêreld laat terughou nie. ⁵Ons sal ons nie deur die oortuigings van die wêreld laat vertel dat wat God wil hê ons moet doen, onmoontlik is nie. ⁶Ons sal, inteendeel, probeer insien dat alleenlik wat God wil hê ons moet doen, moontlik is.

5. Ons sal ook probeer begryp dat ons net dít wil doen wat God vir ons wil. ²En ons sal ook probeer om te onthou dat ons nie kan misluk om te doen wat Hy wil hê ons moet doen nie. ³Ons het alle rede om vol vertroue te wees dat ons vandag sal slaag. ⁴Dit is die Wil van God.

6. Begin vandag se oefeninge deur die idee vir jouself te herhaal, en sluit jou oë daartydens. ²Bestee dan ’n redelike kort tydjie om ’n paar verwante gedagtes van jou eie te dink, terwyl jy die idee in gedagte hou. ³Nadat jy ongeveer vier of vyf gedagtes van jou eie tot die idee gevoeg het, herhaal dit weereens en sê saggies vir jouself:

⁴My werklike gedagtes is in my geestesdenke. ⁵Ek wil hulle graag vind.

⁶Probeer dan om by al die onwerklike gedagtes verby te gaan wat die waarheid in jou geestesdenke bedek, en die ewige te bereik.

7. Onder al die sinlose gedagtes en dwase idees waarmee jy jou geestesdenke volgestop het, is die gedagtes wat jy in die begin met God gedink het. ²Hulle is nou, volkome onveranderd, daar in jou geestesdenke. ³Hulle sal altyd in jou geestesdenke wees, presies soos hulle altyd was. ⁴Alles wat jy sedertdien gedink het, sal verander, maar die Grondslag waarop dit berus, is volkome onveranderlik.

8. Dit is op hierdie Grondslag dat vandag se oefeninge gerig word. ²Hier is jou geestesdenke verenig met die Geestesdenke van God. ³Hier is jou gedagtes één met Syne. ⁴Vir hierdie soort oefening is slegs een ding nodig: benader dit soos jy ’n altaar sou nader wat in die Hemel aan God die Vader en aan God die Seun toegewy is. ⁵Want sodanig is die plek wat jy probeer bereik. ⁶Jy sal heelwaarskynlik nog nie in staat wees om te besef hoe hoog jy probeer gaan nie. ⁷Maar selfs met die klein bietjie insig wat jy reeds verwerf het, behoort jy in staat te wees om jouself daaraan te herinner dat dit nie ’n beuselagtige speletjie is nie, maar ’n oefening in heiligheid en ’n poging om die Koninkryk van die Hemel te bereik.

9. Probeer tydens die korter oefenperiodes van vandag onthou hoe belangrik dit vir jou is om die heiligheid te begryp van die geestesdenke wat met God dink. ²Neem ’n minuut of twee om, wanneer jy die idee deur die dag herhaal, jou geestesdenke se heiligheid te waardeer. ³Staan opsy, hoe kort ook al, van alle gedagtes wat Hom Wie se gasheer jy is, onwaardig is. ⁴En bedank Hom vir die gedagtes wat Hy met jou dink.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 45: God is the Mind with which I think. (ACIM, W-45)

Les 44 – God is die lig waarin ek sien.

1. Vandag gaan ons voort met gister se idee deur ’n ander dimensie daaraan toe te voeg. ²Jy kan nie in die duisternis sien nie, en jy kan nie lig maak nie. ³Jy kan duisternis maak en dan dink dat jy daarin sien, maar lig weerspieël lewe en is dus ’n aspek van die skepping. ⁴Skepping en duisternis kan nie saambestaan nie, maar lig en lewe moet saamgaan, omdat hulle slegs verskillende aspekte van die skepping is.

2. Om te kan sien, moet jy besef dat lig in jou is, nie buite nie. ²Jy sien nie buite jouself nie, en ook is die toerusting om buite jou te sien nie daar nie. ³’n Noodsaaklike deel van hierdie toerusting is die lig wat sien moontlik maak. ⁴Dit is altyd met jou en by jou en maak visie onder alle omstandighede moontlik.

3. Vandag gaan ons probeer om daardie lig te bereik. ²Vir hierdie doel gaan ons ’n soort oefening gebruik wat al voorheen aangeraai is en wat ons steeds meer gaan aanwend. ³Dit is ’n besonder moeilike vorm vir die ongedissiplineerde geestesdenke, en verteenwoordig ’n hoofdoel van die opleiding van die geestesdenke. ⁴Dit vereis presies wat die ongeoefende geestesdenke mis. ⁵Tog moet hierdie oefening uitgevoer word as jy wil sien.

4. Neem vandag ten minste drie oefenperiodes van elk drie tot vyf minute lank. ²’n Langer tyd is aan te beveel, maar slegs as jy vind dat die tyd sonder enige spanning verbyglip. ³Die oefenvorm wat ons vandag gebruik is die natuurlikste en maklikste een ter wêreld vir die geoefende geestesdenke, maar lyk na die onnatuurlikste en moeilikste vir die ongeoefende geestesdenke.

5. Jou geestesdenke is nie meer heeltemal ongeoefen nie. ²Jy is sekerlik gereed om die oefenvorm wat ons vandag gaan gebruik, te leer, maar jy mag vind dat jy sterk weerstand ondervind. ³Die rede hiervoor is baie eenvoudig. ⁴Wanneer jy op hierdie wyse oefen, laat jy alles wat jy nou glo, en al die gedagtes wat jy tot nog toe opgemaak het, agter. ⁵In der waarheid is dit ’n verlossing uit die hel. ⁶Tog is dit, gesien deur die oë van die ego, ’n verlies aan identiteit en ’n afdaling hel toe.

6. As jy net so ’n bietjie afstand kan hou van die ego, sal jy geen probleme ondervind om te besef dat sy teenstand en vrese betekenisloos is nie. ²Miskien kan dit jou help om van tyd tot tyd jouself daaraan te herinner dat om die lig te bereik, beteken om uit die duisternis te ontsnap, wat jy ook al andersins mag glo. ³God is die lig waarin jy sien. ⁴Jy probeer om Hom te bereik.

7. Begin die oefenperiode deur vandag se idee met oop oë te herhaal, en hulle dan stadig toe te maak terwyl die idee nog ’n paar keer herhaal word. ²Probeer dan om as’t ware in jou geestesdenke in te sink, en elke soort steuring en inmenging te laat vaar deur rustig daar verby al dieper in te sink. ³Jou geestesdenke kan nie hierin gekeer word nie, tensy jy dit so verkies. ⁴Dit volg slegs sy natuurlike koers. ⁵Probeer om jou verbygaande gedagtes sonder betrokkenheid te observeer, en glip rustig by hulle verby.

8. Alhoewel geen spesifieke benadering vir hierdie soort oefening aanbeveel word nie, is dit nodig dat jy ’n gevoel kry van die belangrikheid van wat jy doen, die onskatbare waarde daarvan vir jou, en ’n bewustheid dat jy iets baie heiligs beproef. ²Verlossing is jou gelukkigste volbrenging. ³Dit is ook al een wat enige betekenis het, want dit is die enigste een wat enige werklike nut hoegenaamd vir jou het.

9. As weerstand van enige aard ontstaan, rus dan lank genoeg sodat jy vandag se idee kan herhaal, terwyl jy jou oë geslote hou, tensy jy van vrees bewus is. ²In laasgenoemde geval sal jy dit heelwaarskynlik meer gerusstellend vind om jou oë vir ’n kort tydjie oop te hou. ³Probeer egter om so gou moontlik weer die oefeninge te hervat met geslote oë.

10. As jy die oefeninge korrek doen, moet jy ’n mate van ontspanning ervaar en selfs ’n gevoel kry dat jy die lig nader, indien nie binnegaan nie. ²Probeer om aan lig te dink, vormloos en grensloos, soos jy by die gedagtes van hierdie wêreld verby beweeg. ³En moenie vergeet dat hulle jou nie aan die wêreld kan vashou nie, tensy jy hulle die mag gee om dit te doen.

11. Herhaal die idee dikwels deur die dag met oop of geslote oë, soos dit vir jou op daardie oomblik die beste lyk. ²Maar moenie dit vergeet nie. ³Wees bowenal vasbeslote om nie vandag te vergeet nie.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 44: God is the light in which I see. (ACIM, W-44)

Les 43 – God is my Bron. Los van Hom kan ek nie sien nie.

1. Persepsie is nie ’n eienskap van God nie. ²Aan Hom behoort die koninkryk van kennis. ³Maar Hy het die Heilige Gees geskep as die Middelaar tussen persepsie en kennis. ⁴Sonder hierdie skakel met God sou persepsie vir ewig die plek van kennis in jou geestesdenke ingeneem het. ⁵Met hierdie skakel met God sal persepsie so verander en gesuiwer word dat dit na kennis lei. ⁶Dit is sy funksie soos die Heilige Gees dit sien. ⁷Daarom is dit in waarheid sy funksie.

2. In God kan jy nie sien nie. ²Persepsie het nie ’n funksie in God nie en bestaan nie. ³Maar in verlossing, wat die ongedaanmaking behels van wat nooit was nie, het persepsie ’n grootse doel. ⁴Deur die Seun van God vir ’n onheilige doel gemaak, moet dit die middel word waarmee hy weer van sy heiligheid bewus word. ⁵Persepsie het geen betekenis nie. ⁶Nogtans gee die Heilige Gees ’n betekenis daaraan wat baie na aan die betekenis van God Self is. ⁷Geneesde persepsie word die middel waardeur die Seun van God sy broer en dus homself vergewe.

3. Los van God kan jy nie sien nie, want jy kan nie los van God bestaan nie. ²Wat jy ook al doen, doen jy in Hom, want wat jy ook al dink, dink jy met Sy Geestesdenke. ³As visie werklik is, en dit is slegs werklik in die mate waarin dit die Heilige Gees se doel deel, kan jy nie apart van God sien nie.

4. Drie oefenperiodes van vyf minute elk word vandag benodig, een so vroeg moontlik en die ander so laat moontlik in die dag. ²Die derde een kan onderneem word op die gunstigste en geskikste tyd binne jou omstandighede en gereedheid. ³Herhaal die idee vir die dag aan jouself met oop oë aan die begin van hierdie oefenperiodes. ⁴Kyk dan vir ’n kort rukkie om jou heen terwyl jy die idee spesifiek op wat jy sien, toepas. ⁵Vier of vyf onderwerpe vir hierdie fase van die oefenperiode is voldoende. ⁶Jy kan byvoorbeeld sê:

⁷God is my Bron. ⁸Ek kan nie hierdie lessenaar los van hom sien nie.

⁹God is my Bron. ¹⁰Ek kan nie daardie skildery los van hom sien nie.

5. Alhoewel hierdie deel van die oefening relatief kort moet wees, moet jy seker maak dat jy die onderwerpe vir hierdie oefenfase willekeurig kies, sonder dat jy self besluit wat jy in- of uitsluit. ²Vir die tweede en langer fase moet jy jou oë sluit, vandag se idee weer herhaal en dan alle relevante gedagtes wat by jou opkom, op jou eie persoonlike manier by die idee voeg. ³Gedagtes soos:

⁴Ek sien deur oë van vergifnis.

⁵Ek sien die wêreld as geseënd.

⁶Die wêreld kan my myself laat sien.

⁷Ek sien my eie gedagtes, wat soos die Gedagtes van God Self is.

⁸Enige gedagte wat min of meer aan vandag se idee verwant is, is geskik. ⁹Die gedagtes hoef nie ’n duidelike verwantskap met die idee te hê nie, maar hulle moet nie daarmee in stryd wees nie.

6. As jy vind dat jou geestesdenke afdwaal, as jy begin bewus word van gedagtes wat duidelik nie met vandag se idee verband hou nie, of as dit voorkom of jy aan niks kan dink nie, maak dan jou oë oop, herhaal die eerste fase van die oefenperiode en probeer dan weer die tweede fase. ²Moenie ’n lang uitgerekte periode waartydens jy behep raak met onverwante gedagtes, toelaat nie. ³Keer so dikwels as wat nodig is na die eerste fase van die oefeninge terug om dit te voorkom.

7. By die toepassing van vandag se idee in die korter oefenperiodes, kan die vorm varieer volgens die omstandighede en situasies waarin jy jouself gedurende die dag bevind. ²As jy byvoorbeeld saam met iemand anders is, probeer onthou om saggies vir hom te sê:

³God is my Bron. ⁴Los van Hom kan ek jou nie sien nie.

⁵Hierdie vorm is net so van toepassing op vreemdelinge as wat dit is op diegene wat jy dink nader aan jou is. ⁶Probeer trouens om hoegenaamd geen onderskeidings van hierdie aard te maak nie.

8. Vandag se idee behoort ook die hele dag deur toegepas te word op verskillende situasies en gebeure wat mag voorkom, veral op dié wat skyn om jou op een of ander manier te ontstel. ²Pas die idee vir hierdie doel in hierdie vorm toe:

³God is my Bron. ⁴Los van Hom kan ek dit nie sien nie.

9. As geen spesifieke onderwerp op ’n gegewe tyd by jou opkom nie, herhaal bloot die idee in sy oorspronklike vorm. ²Probeer vandag om nie enige lang tye te laat verby gaan sonder om aan die idee van die dag en dus aan jou funksie te dink nie.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 43: God is my Source. I cannot see apart from Him. (ACIM, W-43)

Les 40 – Ek is geseënd as ’n Seun van God.

1. Vandag sal ons begin aanspraak maak op sommige van die gelukkige dinge waarop jy geregtig is, omdat jy is wat jy is. ²Geen lang oefenperiodes word vandag verlang nie, maar baie herhaalde kortetjies is nodig. ³Een elke tien minute sou baie wenslik wees, en jy word aangemoedig om hierdie rooster te volg en waar enigsins moontlik, daarby te hou. ⁴As jy vergeet, probeer weer. ⁵As daar lang onderbrekings voorkom, probeer weer. ⁶Wanneer jy ook al onthou, probeer weer.

2. Jy hoef nie jou oë vir die oefenperiodes te sluit nie, alhoewel jy dit heelwaarskynlik nuttiger sal vind as jy dit wel doen. ²Jy mag jou nogtans gedurende die dag in ’n aantal situasies bevind waar dit nie wenslik sou wees om jou oë toe te maak nie. ³Moenie ’n oefenperiode as gevolg hiervan mis nie. ⁴Jy kan heel goed onder enige omstandighede oefen, as jy regtig wil.

3. Vandag se oefeninge vra min tyd en geen inspanning nie. ²Herhaal die idee vir vandag, en voeg dan verskeie van die eienskappe by wat jy met ’n Seun van God assosieer, en pas hulle dan op jouself toe. ³’n Oefenperiode kan, byvoorbeeld, uit die volgende bestaan:

⁴Ek is geseënd as ’n Seun van God.

⁵Ek is gelukkig, tevrede, liefdevol en voldaan.

⁶’n Ander een kan dalk hierdie vorm aanneem:

⁷Ek is geseënd as ’n Seun van God.

⁸Ek is kalm, rustig, selfversekerd en vol vertroue.

⁹As jy slegs ’n kort tydjie tot jou beskikking het, sal dit voldoende wees om net vir jouself te sê dat jy geseënd is as ’n Seun van God.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 40: I am blessed as a Son of God. (ACIM, W-40)

Les 39 – My heiligheid is my verlossing.

1. As skuld die hel self is, wat is die teenoorgestelde daarvan? ²Net soos die teks waarvoor hierdie werkboek geskryf is, is die idees wat vir die oefeninge gebruik word eenvoudig, baie duidelik en geheel en al ondubbelsinnig. ³Dit gaan nie vir ons oor intellektuele prestasies of speletjies met die logika nie. ⁴Ons hou ons slegs besig met die heel voor die hand liggende wat in die waas van ingewikkeldheid waarin jy dink jy dink, nie raakgesien word nie.

2. As skuld die hel is, wat is die teenoorgestelde daarvan? ²Dit is tog sekerlik nie moeilik nie. ³Jou aarseling om te antwoord is nie te wyte aan die dubbelsinnigheid van die vraag nie. ⁴Maar glo jy wel dat skuld die hel is? ⁵Indien wel, sou jy dadelik sien hoe direk en eenvoudig die teks is, en sal jy glad nie ’n werkboek nodig hê nie. ⁶Niemand hoef te oefen om te verwerf wat alreeds syne is nie.

3. Ons het alreeds gesê dat jou heiligheid die verlosssing van die wêreld is. ²Wat dan van jou eie verlossing? ³Jy kan nie gee wat jy nie het nie. ⁴’n Verlosser moet verlos wees. ⁵Hoe kan hy anders verlossing onderrig? ⁶Vandag se oefeninge geld vir jou, in die besef dat jou verlossing noodsaaklik vir die verlossing van die wêreld is. ⁷Wanneer jy die oefeninge op jou wêreld toepas, sal die hele wêreld baat vind.

4. Jou heiligheid is die antwoord op elke vraag wat ooit gestel was, wat nou gestel word of in die toekoms gestel sal word. ²Jou heiligheid beteken die einde van skuld, en daarom die einde van hel. ³Jou heiligheid is die verlossing van die wêreld, en jou eie. ⁴Hoe kan jy, aan wie jou heiligheid behoort, daarvan uitgesluit wees? ⁵God ken nie onheiligheid nie. ⁶Kan dit wees dat Hy nie Sy Seun ken nie?

5. ’n Volle vyf minute vir die vier langer oefenperiodes van vandag word aangeraai, en langer en meer herhaaldelike oefensessies word aangemoedig. ²As jy die minimum vereiste wil oorskry, word eerder méér as langer sessies aanbeveel, alhoewel beide voorgestel word.

6. Begin die oefenperiodes soos gewoonlik deur vandag se idee vir jouself te herhaal. ²Spoor dan met geslote oë jou liefdelose gedagtes op, in watter vorm hulle ook al mag verskyn: ongemak, depressie, woede, vrees, bekommernis, aggressie, onsekerheid, ensovoorts. ³Watter vorm hulle ook al aanneem, hulle is liefdeloos en daarom angswekkend. ⁴En dit is dus hulle waarvan jy verlos moet word.

7. Spesifieke situasies, gebeure of persoonlikhede wat jy met allerlei liefdelose gedagtes assosieer, is geskikte onderwerpe vir vandag se oefeninge. ²Dit is noodsaaklik vir jou verlossing dat jy hulle anders sien. ³En dit is jou seën oor hulle wat jou sal verlos en aan jou visie sal verskaf.

8. Ondersoek jou geestesdenke stadig, sonder om bewustelik te kies en sonder om een spesiaal te beklemtoon, vir elke gedagte wat tussen jou en jou verlossing staan. ²Pas die idee vir vandag op elkeen van hulle soos volg toe:

³My liefdelose gedagtes oor __________ hou my in die hel.

⁴ My heiligheid is my verlossing.

9. Jy mag hierdie oefenperiodes makliker vind as jy dit afwissel met verskeie kort oefenperiodes waartydens jy bloot vandag se idee ’n paar keer stadig vir jouself herhaal. ²Jy mag dit ook nuttig vind om ’n paar kort tussenposes in te sluit waartydens jy net ontspan en skynbaar aan niks dink nie. ³Volgehoue konsentrasie is aan die begin baie moeilik. ⁴Dit sal baie makliker word soos jou geestesdenke meer gedissiplineerd en minder verstrooid raak.

10. Intussen behoort jy vry te voel om enige variasie tydens die oefenperiodes in te bring, wat ook al by jou ingang vind. ²Moet egter nie die idee self, soos jy die toepassingsmetode varieer, verander nie. ³Hoe jy ook al verkies om dit te gebruik, moet die idee só gestel word dat die betekenis daarvan ’n feit bly dat jou heiligheid jou verlossing is. ⁴Beëindig elke oefenperiode deur weereens die idee in sy oorspronklike vorm te herhaal, en daaraan toe te voeg:

⁵As skuld hel is, wat is die teenoorgestelde daarvan?

11. Tydens die korter toepassings wat indien moontlik drie of vier keer ’n uur gedoen moet word, kan jy jouself hierdie vraag stel, vandag se idee herhaal, en liefs beide doen. ²As versoekings ontstaan, is die volgende ’n besondere nuttige vorm van die idee:

³My heiligheid is my verlossing hiervan.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 39: My holiness is my salvation. (ACIM, W-39)

Les 38 – Daar is niks wat my heiligheid nie kan doen nie.

1. Jou heiligheid draai al die wette van die wêreld om. ²Dit gaan enige tyd, ruimte, afstand en grense van enige aard te bowe. ³Jou heiligheid is totaal onbeperk in die mag daarvan, want dit bevestig jou as ’n Seun van God, één met die Geestesdenke van sy Skepper.

2. Deur jou heiligheid word die mag van God gemanifesteer. ²Deur jou heiligheid word die mag van God beskikbaar gestel. ³En daar is niks wat die mag van God nie kan doen nie. ⁴Jou heiligheid kan gevolglik alle pyn verwyder, alle smart en leed beëindig, en alle probleme oplos. ⁵Dit kan hy doen met betrekking tot jouself en enigiemand anders. ⁶Dit het dieselfde mag om elkeen te help omdat dit dieselfde mag het om iedereen te verlos.

3. As jy heilig is, is alles wat God geskep het ook heilig. ²Jy is heilig, omdat alle dinge wat Hy geskep het heilig is. ³En alle dinge wat Hy geskep het, is heilig, omdat jy heilig is. ⁴In vandag se oefeninge sal ons die mag van jou heiligheid benut vir alle probleme, moeilikhede of lyding van enige aard waaraan jy mag dink, in jouself of in iemand anders. ⁵Ons sal geen onderskeid tref nie, want daar is geen onderskeid nie.

4. Herhaal tydens die vier langer oefenperiodes, wat elk verkieslik ’n volle vyf minute moet duur, die idee vir vandag, sluit jou oë en ondersoek dan jou geestesdenke vir enige gevoel van verlies of ongelukkigheid van enige aard, soos jy dit sien. ²Probeer so min onderskeid as moontlik maak tussen situasies wat vir jou moeilik is en situasies wat vir iemand anders moeilik is. ³Dui die situasie spesifiek aan, en ook die naam van die betrokke persoon. ⁴Gebruik die volgende vorm om die idee vir vandag toe te pas:

⁵In die situasie met betrekking tot __________ waarin ek myself sien, is daar

niks wat my heiligheid nie kan doen nie.

⁶In die situasie met betrekking tot __________ waarin __________ homself

sien, is daar niks wat my heiligheid nie kan doen nie.

5. Miskien wil jy van tyd tot tyd hierdie werkswyse varieer en enkele verbandhoudende gedagtes van jou eie byvoeg. ²Jy sou byvoorbeeld gedagtes kon insluit soos:

³Daar is niks wat my heiligheid nie kan doen nie, want die mag van God lê daarin.

⁴Bring enige variasies in waarvan jy hou, maar fokus die oefeninge op die tema: “Daar is niks wat my heiligheid nie kan doen nie.” ⁵Die doel van vandag se oefeninge is om die gevoel geleidelik in te prent dat jy heerskappy oor alle dinge het, as gevolg van wat jy is.

6. Pas die idee tydens die veelvuldige korter oefeninge toe in sy oorspronklike vorm, tensy ’n spesifieke probleem ten opsigte van jouself of iemand anders opduik, of in jou geestesdenke opkom. ²Gebruik in dié geval die meer spesifieke vorm van die idee en pas dit daarop toe.