Kategorie: Uncategorized

Die volgende idees word vandag hersien:

1.             (46) God is die Liefde waarin ek vergewe.

²God vergewe nie, want Hy het nooit veroordeel nie. ³Wie onskuldig is, kan nie beskuldig nie, en wie hulle onskuld aanvaar het, sien niks om te vergewe nie. ⁴Tog is vergifnis die middel waardeur ek my onskuld sal herken. ⁵Dit is die weerspieëling van God se Liefde op aarde. ⁶Dit sal my na genoeg aan die Hemel bring sodat die Liefde van God na my kan neerbuig en my na Hom toe kan ophef.

2.            (47) God is die krag waarop ek vertrou.

²Dit is nie my eie krag waarmee ek vergewe nie. ³Dit is die krag van God in my wat ek onthou as ek vergewe. ⁴Soos ek begin sien, herken ek Sy weerspieëling op aarde. ⁵Ek vergewe alle dinge omdat ek Sy Krag in my voel ontwaak. ⁶En ek begin om die Liefde te onthou wat ek verkies het om te vergeet, maar wat my nie vergeet het nie.

3.             (48) Daar is niks om te vrees nie.

²Hoe veilig sal die wêreld nie vir my lyk wanneer ek dit kan sien nie! ³Dit sal hoegenaamd nie lyk soos dit wat ek nou dink ek sien nie. ⁴Alles en almal wat ek sien, sal hulle na my wend om my te seën. ⁵Ek sal in almal my beste Vriend herken. ⁶Wat sou daar kon wees om te vrees in ’n wêreld wat ek vergewe het, en wat my vergewe het?

4.            (49) God se Stem praat met my die hele dag deur.

²Daar is nie ’n oomblik dat God se Stem ophou om ’n oproep te doen op my bereidheid tot vergifnis ten einde my te verlos nie. ³Daar is nie ’n oomblik dat Sy Stem nie my gedagtes lei, my handelinge rig, en my voete stuur nie. ⁴Ek stap gestadig en doelgerig die waarheid tegemoet. ⁵Ek kan nêrens anders gaan nie, want God se Stem is die enigste Stem en die enigste Gids wat aan Sy Seun gegee is.

5. (50) Ek word deur die Liefde van God gedra.

²Soos ek na God se Stem luister, word ek deur Sy Liefde gedra. ³Soos ek my oë oopmaak, verlig Sy Liefde die wêreld sodat ek kan sien. ⁴Soos ek vergewe, herinner Sy Liefde my dat Sy Seun sonder sonde is. ⁵En soos ek die wêreld aanskou met die visie wat Hy my gegee het, onthou ek dat ek Sy Seun is.

---

---

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

---

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 60: Review (46-50). (ACIM, W-60)

Hier is die volgende idees om vandag te hersien:

1.             (41) God gaan met my, waar ek ook al gaan.

²Hoe kan ek alleen wees as God altyd saam met my gaan? ³Hoe kan ek twyfelagtig en onseker oor myself wees as daar volmaakte sekerheid in Hom rus? ⁴Hoe kan ek deur enigiets ontstel word as Hy in my woon in absolute vrede? ⁵Hoe kan ek ly as liefde en vreugde my, danksy Hom, omring. ⁶Laat ek geen illusies oor myself koester nie. ⁷Ek is volmaak, want God gaan met my, waar ek ook al gaan.

2.             (42) God is my Krag. ²Visie is Sy geskenk.

³Laat ek nie vandag op my eie oë staatmaak om te sien nie. ⁴Laat ek gewillig wees om my jammerlike illusie van wat sien is, te verruil vir die visie wat deur God gegee word. ⁵Christus se visie is Sy geskenk, en Hy het dit vir my gegee. ⁶Laat ek my vandag op hierdie geskenk beroep, sodat hierdie dag my kan help om die ewigheid te begryp.

3.             (43) God is my Bron. ²Los van Hom kan ek nie sien nie.

³Ek kan sien wat God wil hê ek moet sien. ⁴Ek kan nie enigiets anders sien nie. ⁵Buite Sy Wil is daar slegs illusies. ⁶Dít is wat ek kies wanneer ek dink ek los van Hom kan sien. ⁷Dít is wat ek kies wanneer ek probeer om met die liggaam se oë te sien. ⁸Tog is die visie van Christus vir my gegee om hulle te vervang. ⁹Dit is met hierdie visie dat ek wil sien.

4.             (44) God is die lig waarin ek sien.

²Ek kan nie in die duisternis sien nie. ³God is die enigste lig. ⁴As ek dus wil sien, moet dit deur Hom wees. ⁵Ek het probeer bepaal wat sig is, en ek was verkeerd. ⁶Nou word dit my gegee om te begryp dat God die Lig is waarin ek sien. ⁷Laat ek visie, en die gelukkige wêreld wat dit my sal wys, verwelkom.

5.             (45) God is die Geestesdenke waarmee ek dink.

²Ek het geen gedagtes wat ek nie met God deel nie. ³Ek het apart van Hom geen gedagtes nie, want ek het geen geestesdenke apart van Syne nie. ⁴As deel van Sy Geestesdenke is my gedagtes Syne en Sy Gedagtes myne.

---

---

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

---

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 59: Review (41-45). (ACIM, W-59)

Die volgende idees word vandag hersien:

1.             (36) My heiligheid omvou alles wat ek sien.

²Vanuit my heiligheid kom my persepsie van die werklike wêreld. ³Nou dat ek vergewe het, sien ek myself nie meer as skuldig nie. ⁴Ek kan die onskuld wat die waarheid oor my is, aanvaar. ⁵Gesien deur begrypende oë, is die heiligheid van die wêreld al wat ek sien, want ek kan maar net die gedagtes wat ek oor myself koester, uitbeeld.

2.             (37) My heiligheid seën die wêreld.

²My persepsie van my heiligheid seën my nie alleen nie. ³Almal en alles wat ek in die lig daarvan sien, deel in die vreugde wat dit my bring. ⁴Daar is niks buite en behalwe vreugde nie, want daar is niks wat nie my heiligheid deel nie. ⁵Soos ek my heiligheid herken, skyn die heiligheid van die wêreld al verder uit vir almal om te sien.

3.             (38) Daar is niks wat my heiligheid nie kan doen nie.

²My heiligheid is in sy krag van genesing onbeperk, omdat dit onbeperk is in die krag van sy verlossing. ³Wat is daar om van verlos te word, behalwe illusies? ⁴En wat is alle illusies anders as vals idees oor myself? ⁵My heiligheid maak hulle almal ongedaan deur die waarheid oor my te bevestig. ⁶In die teenwoordigheid van my heiligheid, wat ek met God Self deel, verdwyn alle afgode.

4.             (39) My heiligheid is my verlossing.

²Aangesien my heiligheid my van alle skuld verlos, beteken ’n erkenning van my heiligheid ’n erkenning van my verlossing. ³Dit is ook ’n erkenning van die verlossing van die wêreld. ⁴As ek eenmaal my heiligheid aanvaar het, kan niks my bang maak nie. ⁵En omdat ek nie bang is nie, moet iedereen my insig deel, wat die geskenk is van God aan my en die wêreld.

5.             (40) Ek is geseënd as ’n Seun van God.

²Hierin lê my aanspraak op al die goeie en alleenlik die goeie. ³Ek is geseënd as ’n Seun van God. ⁴Alle goeie dinge is myne, want God het hulle vir my bedoel. ⁵Ek kan geen verlies, ontbering of pyn ly nie, dit alles op grond van Wie ek is. ⁶My Vader ondersteun, beskerm en lei my in alle dinge. ⁷Sy sorg vir my is oneindig, en vergesel my altyd. ⁸Ek is vir ewig geseënd as Sy Seun.

---

---

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

---

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 58: Review (36-40). (ACIM, W-58)

Laat ons vandag die volgende idees hersien:

1.             (31) Ek is nie ’n slagoffer van die wêreld wat ek sien nie.

²Hoe kan ek die slagoffer van ’n wêreld wees wat volledig ongedaan gemaak kan word as ek so verkies? ³My kettings is losgemaak. ⁴Ek kan hulle laat afval deur bloot so te wens. ⁵Die tronkdeur staan oop. ⁶Ek kan vertrek deur eenvoudig uit te loop. ⁷Niks hou my in hierdie wêreld vas nie. ⁸Slegs my wens om te bly, hou my gevange. ⁹Ek sal my waansinnige wense opgee en uiteindelik die sonlig in loop.

2.             (32) Ek het die wêreld wat ek sien, self uitgedink.

²Die tronk, waarin ek myself sien, is my eie maaksel. ³Al wat ek hoef te doen, is om dit in te sien, en ek is vry. ⁴Ek het myself wysgemaak dat dit moontlik is om die Seun van God gevange te neem. ⁵Ek het my bitterlik in hierdie oortuiging wat ek nie langer wil hê nie, misgis. ⁶Die Seun van God moet vir ewig vry wees. ⁷Hy is soos God hom geskep het en nie wat ek van hom wil maak nie. ⁸Hy is waar God wil hê hy moet wees, en nie waar ek gedink het om hom gevange te hou nie.

3.             (33) Daar is ’n ander manier om na die wêreld te kyk.

²Aangesien die doel van die wêreld nie die een is wat ek daaraan toegeken het nie, moet daar ’n ander manier wees om daarna te kyk. ³Ek sien alles onderstebo, en my gedagtes is die teenoorgestelde van die waarheid. ⁴Ek sien die wêreld as ’n gevangenis vir God se Seun. ⁵Dan moet dit dus so wees dat die wêreld in werklikheid ’n plek is waar hy bevry kan word. ⁶Ek wil die wêreld beskou soos dit is, en dit sien as ’n plek waar die Seun van God sy vryheid vind.

4.             (34) Ek sou vrede in plaas hiervan kan sien.

²Wanneer ek die wêreld as ’n plek van vryheid sien, besef ek dit weerspieël die wette van God in plaas van die reëls wat ek daarvoor opgemaak het waaraan hy moet gehoorsaam. ³Ek sal begryp dat vrede daarin woon, en nie stryd nie. ⁴En dan sal ek sien dat vrede ook woon in die harte van almal wat hierdie plek met my deel.

5.             (35) My geestesdenke is deel van God se Geestesdenke. ²Ek is baie heilig.

³Soos ek die vrede van die wêreld met my broers deel, begin ek begryp dat hierdie vrede van diep binne myself kom. ⁴Die wêreld waarna ek kyk, het die lig van my vergifnis aangeneem, en straal vergifnis na my terug. ⁵In hierdie lig begin ek sien wat my illusies oor myself verborge gehou het. ⁶Ek begin die heiligheid van al wat leef, myself ingeslote, en hulle éénheid met my, te begryp.

---

---

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

---

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 57: Review (31-35). (ACIM, W-57)

Ons hersiening omvat vandag die volgende:

1.             (26) My aanvalsgedagtes val my onkwetsbaarheid aan.

²Hoe kan ek weet wie ek is wanneer ek myself voortdurend as ’n slagoffer van aanval sien. ³Dit lyk of pyn, siekte, verlies, ouderdom en dood my bedreig. ⁴Dit kom voor of al my hoop, wense en planne aan die genade oorgelewer is van ’n wêreld waaroor ek geen beheer het nie. ⁵Tog is volmaakte veiligheid en volledige vervulling my erfenis. ⁶Ek het probeer om my erfenis weg te gee in ruil vir die wêreld wat ek sien. ⁷Maar God het my erfenis vir my veilig bewaar. ⁸My eie werklike gedagtes sal my leer wat dit is.

2. (27) Meer as enigiets anders, wil ek tog net kan sien.

²Omdat ek insien dat dit wat ek sien, ’n weerspieëling is van wat ek dink ek is, besef ek dat visie my grootste behoefte is. ³Die wêreld wat ek sien, getuig van die angswekkende aard van die selfbeeld wat ek gemaak het. ⁴As ek wil onthou wie ek is, is dit noodsaaklik dat ek hierdie beeld van myself laat vaar. ⁵Soos dit deur waarheid vervang word, sal visie sekerlik aan my geskenk word. ⁶En met hierdie visie sal ek met mildheid en liefde die wêreld en myself aanskou.

3.             (28) Ek wil, meer as enigiets anders, dinge anders sien.

²Die wêreld wat ek sien, hou my angswekkende selfbeeld in stand, en waarborg die voortsetting daarvan. ³Terwyl ek die wêreld sien soos ek dit nou sien, kan die waarheid nie tot my bewussyn deurdring nie. ⁴Ek wil graag dat die deur agter hierdie wêreld vir my oopgemaak word, sodat ek daaragter die wêreld kan sien wat die Liefde van God weerspieël.

4.             (29) God is in alles wat ek sien.

²Agter elke beeld wat ek gevorm het, bly die waarheid onveranderd. ³Agter elke sluier wat ek oor die gelaat van die liefde getrek het, het die lig helder en onverdof gebly. ⁴Agter al my waansinnige wense is my wil verenig met die Wil van my Vader. ⁵God is steeds oral en vir ewig in alles. ⁶En ons, wat deel van Hom is, sal uiteindelik verby alle uiterlike verskyningsvorms verby kyk en die volle waarheid daaragter herken.

5.             (30) God is alles wat ek sien, want God is in my geestesdenke.

²In my eie geestesdenke, agter al my waansinnige skeidings- en aanvalsgedagtes, is die kennis dat alles vir ewig een is. ³Ek het nie die kennis van Wie ek is verloor deur dit te vergeet nie. ⁴Dit het vir my behoue gebly in die Geestesdenke van God wat nie Sy Gedagtes verlaat het nie. ⁵En ek, wat daartoe behoort, is één daarmee en één met Hom.

---

---

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

---

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 56: Review (26-30). (ACIM, W-56)

Vandag se hersiening sluit die volgende in:

1.             (21) Ek is vasbeslote om dinge anders te sien.

²Wat ek nou sien, is slegs tekens van siekte, rampspoed en dood. ³Dit kan voorwaar nie wees wat God vir Sy geliefde Seun geskep het nie. ⁴Die blote feit dat ek sulke dinge sien, bewys dat ek God nie begryp nie. ⁵Daarom begryp ek ook nie Sy Seun nie. ⁶Wat ek sien, sê vir my dat ek nie weet wie ek is nie. ⁷Ek is vasbeslote om die getuies van waarheid in my te sien, eerder as dié wat my ’n illusie van myself wys.

2.             (22) Wat ek sien, is ’n vorm van wraak.

²Die wêreld wat ek sien, is beswaarlik ’n weergawe van liefdevolle gedagtes. ³Dit is ’n beeld van hoe alles mekaar aanval. ⁴Dit is alles behalwe ’n weerspieëling van die Liefde van God en die Liefde van Sy Seun. ⁵Dit is my eie aanvalsgedagtes wat tot hierdie beeld aanleiding gee. ⁶My liefdevolle gedagtes sal my van hierdie persepsie van die wêreld red, en my die vrede gee wat God vir my bestem het.

3.             (23) Ek kan aan hierdie wêreld ontsnap deur aanvalsgedagtes op te gee.

²Verlossing lê hierin, en nêrens anders nie. ³Sonder aanvalsgedagtes sou ek nie ’n wêreld van aanval kon sien nie. ⁴Soos vergifnis my weer bewus laat word van liefde, sal ek ’n wêreld van vrede, veiligheid en vreugde sien. ⁵En dít is wat ek verkies om te sien, in plaas van dit waarna ek nou kyk.

4.             (24) Ek sien nie wat in my eie beste belang is nie.

²Hoe kan ek my hoogste belang ken as ek nie weet wie ek is nie? ³Wat ek dink in my eie belang is, bind my bloot meer aan die wêreld van illusies vas. ⁴Ek is gewillig om die Gids wat God my verskaf het, te volg om uit te vind wat in my eie hoogste belang is, omdat ek besef dat ek hulle uit myself alleen nie kan sien nie.

5.             (25) Ek weet nie waarvóór enigiets daar is nie.

²Vir my is die doel van alles om te bewys dat my illusies oor myself werklik is. ³Vir hierdie doel probeer ek almal en alles gebruik. ⁴Dit is wat ek glo die doel van die wêreld is. ⁵Daarom herken ek nie sy werklike doel nie. ⁶Die doel wat ek aan die wêreld gegee het, het tot ’n vreesaanjaende beeld daarvan aanleiding gegee. ⁷Laat ek my geestesdenke vir die wêreld se werklike doel oopstel deur die een wat ek daaraan gegee het, te onttrek, en die waarheid daaroor te leer.

---

---

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

---

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 55: Review (21-25). (ACIM, W-55)

Vandag word die volgende idees hersien:

1.             (16) Ek het geen neutrale gedagtes nie.

²Neutrale gedagtes is onmoontlik, want alle gedagtes beskik oor krag. ³Hulle sal óf ’n vals wêreld maak óf hulle sal my na die werklike een lei. ⁴Maar gedagtes kan nie sonder gevolge wees nie. ⁵Soos die wêreld wat ek sien, voortspruit uit my denkfoute, sal die werklike wêreld voor my oë verrys as ek my foute laat korrigeer. ⁶My gedagtes kan nie nóg waar nóg onwaar wees nie. ⁷Hulle moet óf die een óf die ander wees. ⁸Wat ek sien, wys my wat hulle is.

2.             (17) Ek sien geen neutrale dinge nie.

²Wat ek sien, getuig van wat ek dink. ³As ek nie gedink het nie, sou ek nie bestaan het nie, want lewe is denke. ⁴Laat ek na die wêreld wat ek sien, kyk as ’n weerspieëling van my eie stand van geestesdenke. ⁵Ek weet dat die toestand van my geestesdenke kan verander. ⁶En dus weet ek verder dat die wêreld wat ek sien, ook kan verander.

3.             (18) Ek ervaar nie die gevolge van my sien alleen nie.

²As ek geen private gedagtes het nie, kan ek nie ’n private of afgesonderde wêreld sien nie. ³Selfs die dwase idee van skeiding moes gedeel word voordat dit die basis kon word van die wêreld wat ek sien. ⁴Maar daardie verdeling was die deling van niksheid. ⁵Ek kan egter ook ’n beroep doen op my werklike gedagtes, wat alles met almal deel. ⁶Net soos my gedagtes van skeiding ander se gedagtes van skeiding aanroep, laat my werklike gedagtes die werklike gedagtes in hulle ontwaak. ⁷En die wêreld wat my werklike gedagtes vir my wys, sal verrys voor sowel hulle oë as myne.

4.             (19) Ek ervaar nie die gevolge van my gedagtes alleen nie.

²Ek is in niks alleen nie. ³Alles wat ek dink of sê of doen, onderrig die hele universum. ⁴’n Seun van God kan nie vergeefs dink of praat of doen nie. ⁵Hy kan in niks alleen wees nie. ⁶Dit is dus binne my mag om elkeen se geestesdenke saam met myne te verander, want aan my behoort die krag van God.

5.             (20) Ek is vasbeslote om te sien.

²Omdat ek insien dat my gedagtes altyd met ander gedeel word, is ek vasbeslote om te sien. ³Ek wil na die getuies kyk wat my sal wys dat die denke van die wêreld verander het. ⁴Ek wil die bewys aanskou dat wat deur middel van my gedoen is, die liefde in staat gestel het om vrees te vervang, lag in staat gestel het om trane te vervang en oorvloed in staat gestel het om verlies te vervang. ⁵Ek wil die werklike wêreld sien, en my daardeur laat leer dat my wil en die Wil van God één is.

---

---

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

---

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 54: Review (16-20). (ACIM, W-54)

Ons sal vandag die volgende hersien:

1.             (11) My betekenislose gedagtes laat my ’n betekenislose wêreld sien.

²Aangesien die gedagtes waarvan ek bewus is, niks beteken nie, kan die wêreld wat deur hulle uitgebeeld word nie betekenis hê nie. ³Dit waardeur hierdie wêreld voortgebring is, is waansinnig, en dieselfde geld vir dit wat die wêreld voortbring. ⁴Die werklikheid is nie waansinnig nie, en ek het sowel werklike as waansinnige gedagtes. ⁵Ek kan daarom die werklike wêreld sien, as ek op my werklike gedagtes sou staatmaak as rigsnoer om te sien.

2.               (12) Ek voel ontsteld omdat ek ’n betekenislose wêreld sien.

2.Waansinnige gedagtes is ontstellend. ³Hulle bring ’n wêreld voort waarin daar nêrens orde is nie. ⁴Net chaos regeer ’n wêreld wat ’n weergawe is van chaotiese denke, en chaos ken geen wette nie. ⁵Ek kan nie in so ’n wêreld in vrede leef nie. ⁶Ek is dankbaar dat hierdie wêreld nie werklik is nie en ek dit hoegenaamd nie hoef te sien nie, tensy ek kies om waarde daaraan te verleen. ⁷En ek kies om nie waarde te verleen aan wat heeltemal waansinnig is en geen betekenis het nie.

3.             (13) ’n Betekenislose wêreld veroorsaak vrees.

²Wat totaal waansinnig is, veroorsaak vrees omdat dit heeltemal onbetroubaar is en geen basis vir vertroue bied nie. ³In waansin is niks te vertrou nie. ⁴Dit bied geen veiligheid en hoop nie. ⁵Maar so ’n wêreld is nie werklik nie. ⁶Ek het daaraan die illusie van werklikheid verskaf en het gely as gevolg van my geloof daarin. ⁷Nou verkies ek om hierdie geloof terug te trek, en my vertroue in die werklikheid te stel. ⁸Deur dit te kies, sal ek van al die gevolge van die wêreld van vrees ontsnap, want ek erken dat dit nie bestaan nie.

4.             (14) God het nie ’n betekenislose wêreld geskep nie.

²Hoe kan ’n betekenislose wêreld bestaan as God dit nie geskep het nie? ³Hy is die Bron van alle betekenis, en alles wat werklik is, is in Sy Geestesdenke. ⁴Dit is ook in my geestesdenke, want Hy het dit met my geskep. ⁵Waarom sal ek voortgaan om te ly aan die gevolge van my eie waansinnige gedagtes as die volmaaktheid van die skepping my tuiste is? ⁶Laat ek die krag van my keuse onthou en besef waar ek regtig woon.

5.             (15) My gedagtes is beelde wat ek gemaak het.

²Wat ek ook al sien, is ’n weerspieëling van my gedagtes. ³Dit is my gedagtes wat my vertel waar ek is en wat ek is. ⁴Die feit dat ek ’n wêreld van swaarkry, verlies en dood sien, wys my dat ek bloot ’n weergawe van my waansinnige gedagtes sien, en nie my werklike gedagtes toelaat om hulle weldadige lig te werp op wat ek sien nie. ⁵Tog is God se weg seker. ⁶Die beelde wat ek gemaak het, kan Hom nie oorweldig nie, want dit is nie my wil dat dit geskied nie. ⁷My wil is Syne, en ek sal geen ander gode voor Sy aangesig hê nie.

---

---

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

---

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 53: Review (11-15). (ACIM, W-53)

Vandag se hersiening omvat hierdie idees:

1.             (6) Ek is ontsteld omdat ek sien wat nie daar is nie.

²Die werklikheid is nooit vreesaanjaend nie. ³Dit kan my onmoontlik ontstel. ⁴Die werklikheid bring alleen volmaakte vrede. ⁵As ek ontsteld is, is dit altyd omdat ek die werklikheid vervang het met illusies wat ek self opgemaak het. ⁶Die illusies is ontstellend, want ek het aan hulle werklikheid verskaf, en beskou dus die werklikheid as ’n illusie. ⁷Niks in God se skepping word op enige wyse deur hierdie verwarring van my beïnvloed nie. ⁸Ek raak altyd ontsteld deur heeltemal niks.

2.             (7) Ek sien slegs die verlede.

²Wanneer ek om my heen kyk, veroordeel ek die wêreld waarna ek kyk. ³Ek noem dit sien. ⁴Ek hou die verlede teen almal en alles, en maak hulle my vyand. ⁵As ek myself vergewe het en onthou het Wie ek is, sal ek almal en alles wat ek sien, seën. ⁶Daar sal geen verlede, en dus geen vyande wees nie. ⁷En ek sal met liefde na alles wat ek voorheen nie gesien het nie, kyk.

3.             (8) My geestesdenke is behep met gedagtes uit die verlede.

²Ek sien slegs my eie gedagtes, en my geestesdenke is behep met die verlede. ³Wat kan ek dan sien, soos dit is? ⁴Laat ek onthou dat ek na die verlede kyk om te verhoed dat die hede vir my geestesdenke duidelik word. ⁵Laat ek begryp dat ek probeer om tyd teen God te gebruik. ⁶Laat ek leer om die verlede weg te gee, in die besef dat ek sodoende niks opgee nie.

4.               (9) Ek sien niks soos dit nou is nie.

²As ek niks sien soos dit nou is nie, kan inderdaad gesê word dat ek heeltemal niks sien nie. ³Ek kan slegs wat nou is, sien. ⁴Die keuse is nie om die verlede of die hede te sien nie, die keuse is bloot om te sien, of nie. ⁵Wat ek verkies het om te sien, het my my visie gekos. ⁶Nou wil ek weer kies, sodat ek kan sien.

5.             (10) My gedagtes beteken niks nie.

²Ek het geen private gedagtes nie. ³Nogtans is dit alleen private gedagtes waarvan ek bewus is. ⁴Wat kan hierdie gedagtes tog beteken? ⁵Hulle bestaan nie, en beteken dus niks nie. ⁶Tog is my geestesdenke deel van die skepping, en deel van sy Skepper. ⁷Wil ek my nie eerder by die denke van die universum aansluit, as om wat regtig myne is met armsalige en betekenislose “private” gedagtes te verdoesel nie?

---

---

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

---

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 52: Review (6-10). (ACIM, W-52)