Skrywer: (Page 6 of 7)

Les 11 – My betekenislose gedagtes laat my ’n betekenislose wêreld sien.

1. Hierdie is die eerste idee wat aangebied word in direkte verband met een van die belangrikste fases in die korreksieproses: die omkering van die denke van die wêreld. ²Dit lyk asof die wêreld bepaal wat jy waarneem. ³Vandag se idee stel die konsep bekend dat jou gedagtes die wêreld wat jy sien, bepaal. ⁴Wees trouens bly dat jy die idee in sy basiese vorm kan toepas, want in hierdie idee is jou bevryding verseker. ⁵Die sleutel tot vergifnis is hierin geleë.

2. Die oefenperiodes vir vandag se idee moet ietwat anders as die voriges aangepak word. ²Begin met geslote oë en herhaal die idee stadig vir jouself. ³Maak dan jou oë oop en kyk rond, naby en ver, op en af, – oral om jou. ⁴Herhaal dit bloot vir jouself die minuut of meer wat bestee moet word om die idee te gebruik, maar maak seker dat jy dit nie oorhaastig en met enige gevoel van dringendheid of moeite doen nie.

3. Om die grootste hoeveelheid voordeel uit die oefeninge te trek, moet die oë redelik vinnig van een ding na ’n ander beweeg omdat hulle nie op enigiets spesifiek moet bly rus nie. ²Die woorde moet egter op ’n kalm, selfs ontspanne manier gebruik word. ³Die inleiding tot hierdie idee moet veral so gemaklik moontlik gedoen word. ⁴Dit vorm die grondslag van die vrede, ontspanning en onbesorgdheid wat ons poog om te bereik. ⁵Sluit aan die einde van die oefeninge jou oë en herhaal die idee nog ’n keer stadig vir jouself.

4. Drie oefenperiodes sal vandag heelwaarskynlik voldoende wees. ²Maar as daar min of geen ongemak is nie, en jy voel om meer te doen, kan soveel as vyf aangepak word. ³Meer word nie aanbeveel nie.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 11: My meaningless thoughts are showing me a meaningless world. (ACIM, W-11)

Les 10 – My gedagtes beteken niks nie.

1. Hierdie idee is van toepassing op al die gedagtes waarvan jy bewus is, of bewus van word tydens die oefenperiodes. ²Die rede waarom die idee op hulle almal van toepassing is, is dat hulle nie jou werklike gedagtes is nie. ³Ons het al voorheen hierdie onderskeid gemaak, en sal dit weer doen. ⁴Jy het tot nog toe nog nie ’n basis vir vergelyking nie. ⁵Sodra jy het, sal jy geen twyfel daaroor hê dat wat jy eers geglo het jou gedagtes was, niks beteken het nie.

2. Dit is die tweede keer dat ons hierdie soort idee gebruik. ²Die vorm alleen is ’n bietjie anders. ³Hierdie keer word die idee begin met “My gedagtes” in plaas van “Hierdie gedagtes”, en word nie uiterlik en by name verbind met die dinge rondom jou nie. ⁴Die klem is nou op die gebrek aan werklikheid van wat jy dink jy dink.

3. Hierdie aspek van die korreksieproses het begin met die idee dat die gedagtes waarvan jy bewus is, betekenisloos is, en eerder buite jou as binne jou was; en daarna is beklemtoon dat hulle status in die verlede gelê het eerder as in die hede. ²Nou beklemtoon ons dat die teenwoordigheid van hierdie “gedagtes” juis beteken dat jy nie dink nie. ³Dit is bloot ’n ander manier om ons vorige stelling te herhaal dat jou geestesdenke in werklikheid leeg is. ⁴Om dit te erken, beteken om te erken dat jy niks sien nie, as jy dink dat jy dit sien. ⁵As sodanig is hierdie erkenning die voorwaarde vir visie.

4. Sluit jou oë vir hierdie oefeninge, en begin hulle deur vandag se idee redelik stadig vir jouself te herhaal. ²Voeg dan by:

³Hierdie idee sal help om my te bevry van alles wat ek nou glo.

⁴Die oefeninge bestaan, soos voorheen, daaruit om jou geestesdenke te ondersoek vir alle gedagtes wat daar beskikbaar is, sonder om te kies of te oordeel. ⁵Probeer om enige soort indelings te vermy. ⁶As dit jou sou help, kon jy jou trouens voorstel dat jy ’n eienaardig saamgestelde optog sien verbybeweeg wat vir jou min of geen persoonlike betekenis het nie. ⁷En soos elke gedagte deur jou geestesdenke gaan, sê jy:

⁸My gedagte oor __________ beteken niks nie.

⁹My gedagte oor __________ beteken niks nie.

5. Vandag se idee kan vanselfsprekend nuttig wees vir enige gedagtes wat jou op ’n gegewe tydstip kwel. ²Vyf oefenperiodes word bykomend aanbeveel, nie een langer as ongeveer ’n minuut se ondersoek van die geestesdenke nie. ³Dit word nie aanbeveel dat hierdie tydsduur oorskry word nie, en dit moet na ’n halwe minuut of korter verminder word as jy ongemak ervaar. ⁴Onthou egter om die idee stadig te herhaal voordat dit spesifiek toegepas word, en ook om by te voeg:

⁵Hierdie idee sal help om my te bevry van alles wat ek nou glo.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 10: My thoughts do not mean anything. (ACIM, W-10)

Les 9 – Ek sien niks soos dit nou is nie.

1. Hierdie idee volg baie duidelik uit die twee voriges. ²Maar alhoewel jy dit miskien intellektueel kan aanvaar, is dit onwaarskynlik dat dit nou al iets vir jou sal beteken. ³Begrip is egter nie op die oomblik nodig nie. ⁴In werklikheid is die erkenning dat jy nie begryp nie ’n voorvereiste om jou vals idees ongedaan te maak. ⁵Dit gaan in hierdie oefeninge oor beoefening, nie oor begrip nie. ⁶Jy hoef nie te oefen wat jy alreeds begryp nie. ⁷Jy sou trouens heel onlogies wees as jy sou mik na begrip, en terselfdertyd aanneem dat jy reeds daaroor beskik.

2. Dit is moeilik vir ongeoefende geestesdenke om te glo dat dit wat hy hom dan so duidelik verbeel, nie daar is nie. ²Hierdie idee kan nogal verontrustend wees en hewige weerstand ondervind, in velerlei vorm. ³Maar dit belet nie die toepassing daarvan nie. ⁴Niks meer word dan ook gevra van hierdie of enige ander oefeninge nie. ⁵Elke klein stappie sal ’n bietjie van die duisternis uit die weg ruim, en begrip sal uiteindelik elke hoekie in die geestesdenke, wat skoongemaak is van die puin wat dit verdonker het, kom verlig.

3. Hierdie oefeninge waarvoor drie of vier oefenperiodes voldoende is, behels om rondom jou te kyk en vandag se idee toe te pas op wat jy ook al sien, gedagtig aan die behoefte om dit willekeurig toe te pas, asook die noodsaaklike reël om niks opsetlik uit te sluit nie. ²Byvoorbeeld:

³Ek sien nie hierdie tikmasjien soos dit nou is nie.

⁴Ek sien nie hierdie telefoon soos dit nou is nie.

⁵Ek sien nie hierdie arm soos dit nou is nie.

4. Begin met dinge wat naaste aan jou is, en verbreed dan jou veld na buite:

²Ek sien nie daardie kapstok soos dit nou is nie.

³Ek sien nie daardie deur soos dit nou is nie.

⁴Ek sien nie daardie gesig soos dit nou is nie.

5. Dit word weer beklemtoon dat, alhoewel daar nie gepoog moet word om alles in te sluit nie, dit vermy moet word om iets opsetlik uit te sluit. ²Sorg dat jy eerlik met jouself is wanneer jy hierdie onderskeiding maak. ³Jy mag in die versoeking gestel word om dit te verdoesel.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 9: I see nothing as it is now. (ACIM, W-9)

Les 8 – My geestesdenke is behep met gedagtes uit die verlede.

1. Hierdie idee is natuurlik die rede waarom jy slegs die verlede sien. ²Niemand sien werklik iets nie. ³Hy sien maar net sy gedagtes wat na buite geprojekteer word. ⁴Die geestesdenke se beheptheid met die verlede is die oorsaak van die verkeerde opvatting oor tyd waaronder jou waarneming ly. ⁵Jou geestesdenke kan nie die hede wat die enigste tyd wat daar is, begryp nie. ⁶Dit kan daarom nie tyd begryp nie, en kan in werklikheid niks begryp nie.

2. Die enigste volkome ware gedagte wat ’n mens oor die verlede kan hê, is dat dit nie hier is nie. ²Om dus hoegenaamd daaroor te dink, is om oor illusies te dink. ³Baie min mense besef wat dit nou eintlik behels of selfs beteken om ’n prentjie te vorm van die verlede of om die toekoms te antisipeer. ⁴Wanneer die geestesdenke dit doen, is dit in werklikheid leeg, want dit dink nie wesenlik oor iets nie.

3. Die doel met vandag se oefeninge is om te begin om jou geestesdenke te oefen om te sien wanneer dit in werklikheid glad nie dink nie. ²Solank gedagtelose idees jou geestesdenke in beslag neem, word die waarheid geblokkeer. ³Die eerste stap om die pad na visie te open, is die erkenning dat jou geestesdenke tot dusver bloot leeg was, eerder as om te bly glo dat dit met regte idees gevul is.

4. Vandag se oefeninge moet met geslote oë gedoen word. ²Dit is omdat jy in werklikheid niks kan sien nie en dit so makliker is om in te sien dat, ongeag van hoe duidelik jy jou ook al ’n gedagte mag voorstel, jy in der waarheid niks sien nie. ³Ondersoek jou geestesdenke vir die gewone minuut lank, maar met so min as moontlike insette van jou kant, en let bloot op die gedagtes wat jy daar vind. ⁴Benoem elkeen volgens die sentrale figuur of tema wat daarin voorkom, en gaan oor na die volgende een. ⁵Begin die oefenperiode deur te sê:

⁶Dit lyk of ek dink aan __________.

5. Benoem dan elke gedagte spesifiek, byvoorbeeld:

²Dit lyk of ek dink aan (naam van persoon), aan (naam van ’n objek), aan (naam van ’n emosie),

ensovoorts, en sluit dan die tyd van ondersoek van jou geestesdenke ten slotte af met:

³Maar my geestesdenke is behep met gedagtes uit die verlede.

6. Dit kan vier of vyf keer gedurende die dag gedoen word, tensy jy dit irriterend vind. ²As jy dit veeleisend vind, is drie of vier keer voldoende. ³Jy mag dit egter nuttig vind om jou irritasie, of enige emosie wat vandag se idee moontlik veroorsaak, in te sluit by hierdie ondersoek van jou geestesdenke.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 8: My mind is preoccupied with past thoughts. (ACIM, W-8)

Les 7 – Ek sien slegs die verlede.

1. Dit is van meet af aan baie moeilik om hierdie idee te glo. ²Nogtans vorm dit die grondslag vir al die voriges.

³Dit is die rede waarom niks wat jy sien enigiets beteken nie.

⁴Dit is die rede waarom jy aan alles wat jy sien, alle betekenis gegee het wat dit vir jou het.

⁵Dit is die rede waarom jy niks begryp wat jy sien nie.

⁶Dit is die rede waarom jou gedagtes niks beteken nie en waarom hulle net soos die dinge wat jy sien, is.

⁷Dit is die rede waarom jy nooit ontsteld is om die rede wat jy dink nie.

⁸Dit is die rede waarom jy ontsteld is omdat jy iets sien wat nie daar is nie.

2. Ou idees oor tyd is baie moeilik om te verander omdat alles wat jy glo in tyd gewortel is en daarop staatmaak dat jy nie hierdie nuwe idees daaroor kan aanleer nie. ²Dit is egter presies waarom jy nuwe idees oor tyd benodig. ³Hierdie eerste tyd-idee is nie werklik so vreemd as wat dit in die begin mag klink nie.

3. Kyk byvoorbeeld na ’n koppie. ²Sien jy ’n koppie, of kyk jy bloot terug op jou vorige ervarings om ’n koppie op te tel, dors te wees, uit die koppie te drink, die rand teen jou lippe te voel, ontbyt te nuttig, ensovoorts? ³Is jou estetiese reaksies op die koppie nie ook op vorige ervarings gebaseer nie? ⁴Hoe anders sou jy weet of hierdie soort koppie sal breek as jy hom laat val of nie? ⁵Wat weet jy anders van hierdie koppie, behalwe wat jy in die verlede geleer het? ⁶Jy sou geen idee gehad het oor wat hierdie koppie is, as jy dit nie in die verlede geleer het nie. ⁷Sien jy dit dan werklik?

4. Kyk om jou heen. ²Dit is ewe waar vir alles waarna jy kyk. ³Gee erkenning daaraan deur vandag se idee sonder onderskeid toe te pas op enigiets wat jou oog vang. ⁴Byvoorbeeld:

⁵Ek sien slegs die verlede in hierdie potlood.

⁶Ek sien slegs die verlede in hierdie skoen.

⁷Ek sien slegs die verlede in hierdie hand.

⁸Ek sien slegs die verlede in daardie liggaam.

⁹Ek sien slegs die verlede in daardie gesig.

5. Moenie by enigiets in die besonder stilstaan nie, maar onthou om niks opsetlik weg te laat nie. ²Kyk vlugtig na elke voorwerp en gaan dan voort na die volgende een. ³Drie of vier oefenperiodes wat elk ’n minuut of wat duur, sal genoeg wees.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

Hierdie les kom uit (A Course in Miracles). Hemelbewus bied dit aan in Afrikaans as deel van ‘n pad van innerlike genesing en vergewing. Die vertaling is met groot sorg en toewyding oor verskeie jare deur Henri Theron gedoen, en bring die diep geestelike leringe van die Kursus na Afrikaanssprekende lesers.

📚 Lees meer oor die Kursus: www.acim.org

Lesson 7: I see only the past. (ACIM, W-7)

Les 6 – Ek is ontsteld omdat ek iets sien wat nie daar is nie.

1. Die oefeninge met hierdie idee is baie soortgelyk aan die voriges. ²Weereens is dit nodig om beide die vorm van ontsteltenis (woede, vrees, bekommernis, depressie, ensovoorts) en die vermeende bron baie spesifiek te noem by elke toepassing van die idee. ³Byvoorbeeld:

⁴Ek is kwaad vir __________ omdat ek iets sien wat nie daar is nie.

⁵Ek is bekommerd oor __________ omdat ek iets sien wat nie daar is nie.

2. Vandag se idee is nuttig om toe te pas op enigiets wat jou blyk te ontstel, en kan met vrug die hele dag vir hierdie doel aangewend word. ²Nietemin moet die drie of vier oefenperiodes wat vereis word deur ongeveer ’n minuut se ondersoek van jou geestesdenke voorafgegaan word, gevolg deur die toepassing van die idee op elke ontstellende gedagte wat deur die ondersoek blootgelê is.

3. Weereens, as jy meer weerstand ondervind om die idee op sommige ontstellende gedagtes toe te pas as op ander, herinner jouself aan die twee waarskuwings uit die vorige les:

²Daar is geen klein vorme van onsteltenis nie. ³Hulle is almal ewe steurend vir my innerlike vrede.

⁴En:

⁵Ek kan nie hierdie vorm van ontsteltenis vashou en die ander laat gaan nie. ⁶Vir die doel van hierdie oefeninge sal ek hulle dus almal as dieselfde beskou.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 6: I am upset because I see something that is not there. (ACIM, W-6)

Les 5 – Ek is nooit ontsteld om die rede wat ek dink nie.

1. Hierdie idee kan, soos die vorige een, gebruik word ten opsigte van enige persoon, situasie of gebeurtenis wat jy dink jou pyn veroorsaak. ²Pas dit spesifiek toe op wat jy ook al glo die oorsaak van jou ontsteltenis is, en gebruik die beskrywing van die gevoel op enige wyse wat vir jou reg lyk. ³Die ontsteltenis mag voorkom as vrees, bekommernis, depressie, angs, woede, haat, jaloesie of etlike ander vorme, wat jy almal as verskillend sal waarneem. ⁴Dit is nie waar nie. ⁵Voordat jy egter geleer het dat die vorm nie saak maak nie, is elke vorm ’n geskikte onderwerp vir vandag se oefeninge. ⁶Die toepassing van dieselfde idee op elkeen afsonderlik is die eerste stap na die uiteindelike erkenning dat hulle almal dieselfde is.

2. Wanneer jy vandag se idee gebruik vir die oorsaak van ’n ontsteltenis, in enige vorm wat jy waargeneem het, gebruik dan sowel die naam van die vorm waarin jy die ontsteltenis sien, asook die oorsaak wat jy daaraan toeskryf. ²Byvoorbeeld:

³Ek is nie kwaad vir __________ om die redes wat ek dink nie.

⁴Ek is nie bang vir __________ om die redes wat ek dink nie.

3. Maar weereens, dit moet nie vervang word met oefenperiodes waartydens jy jou geestesdenke eers ondersoek vir, wat jy glo, die “oorsake” van jou ontsteltenis is nie, en die vorms van ontsteltenis wat jy dink daaruit voortvloei nie.

4. Jy mag dit in hierdie oefeninge, meer as in voriges, moeilik vind om nie te diskrimineer nie, en te verhoed om aan sommige onderwerpe meer gewig toe te ken as aan ander. ²Dit kan help om die oefeninge met die volgende stelling vooraf te gaan:

³Daar is geen klein vorme van ontsteltenis nie. ⁴Hulle is almal ewe steurend vir my innerlike vrede.

5. Ondersoek dan jou geestesdenke vir wat jou ook al bekommer, ongeag hoeveel of hoe min jy dink dit jou bekommer.

6. Jy mag ook vind dat jy minder gewillig is om vandag se idee toe te pas op sekere vermeende oorsake van ontsteltenis as op ander. ²As dit gebeur, dink eers hieraan:

³Ek kan nie hierdie vorm van ontsteltenis behou en die ander laat gaan nie. ⁴Vir die doel van hierdie oefeninge sal ek hulle dus almal as dieselfde beskou.

7. Ondersoek jou geestesdenke dan vir nie langer as ongeveer ’n minuut nie, en probeer om ’n aantal verskillende vorms van ontsteltenis wat jou bekommer, te identifiseer, ongeag die relatiewe belangrikheid wat jy miskien aan hulle toeken. ²Pas vandag se idee op elkeen van hulle toe deur beide die naam van die bron van ontsteltenis te noem, soos jy dit sien, asook die gevoel, soos jy dit ervaar. ³Verdere voorbeelde is:

⁴Ek is nie bekommerd oor _________ om die redes wat ek dink nie.

⁵Ek is nie depressief oor __________om die redes wat ek dink nie.

⁶Drie of vier keer gedurende die dag is genoeg.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 5: I am never upset for the reason I think. (ACIM, W-5)

Les 4 – Hierdie gedagtes beteken niks nie.

Hierdie gedagtes beteken niks nie.

Hulle is soos die dinge wat ek in hierdie kamer

(in hierdie straat, uit hierdie venster, op hierdie plek) sien.

1. In teenstelling tot die voriges, begin hierdie oefeninge nie met die idee van die dag nie. ²Begin hierdie oefenperiode deur vir ’n minuut te let op die gedagtes wat deur jou geestesdenke gaan. ³Pas dan die idee daarop toe. ⁴As jy reeds van ongelukkige gedagtes bewus is, gebruik hulle dan as onderwerp vir die idee. ⁵Moet egter nie net die gedagtes wat jy dink “sleg” is, kies nie. ⁶Jy sal vind, as jy jouself oefen om na jou gedagtes te kyk, dat hulle so ’n verskeidenheid verteenwoordig dat nie een daarvan in ’n sekere sin “goed” of “sleg” genoem kan word nie. ⁷Dit is waarom hulle niks beteken nie.

2. By die keuse van onderwerpe vir die toepassing van vandag se idee, is dit soos gewoonlik nodig om spesifiek te wees. ²Moenie bang wees om “goeie” sowel as “slegte” gedagtes te gebruik nie. ³Nie een van hulle gee jou ware gedagtes weer wat deur hulle geheim gehou word nie. ⁴Die “goeies” is slegs skaduwees van wat daaragter lê, en skaduwees bemoeilik sig. ⁵Die “slegtes” blokkeer sig, en maak sien onmoontlik. ⁶Jy wil nie een van die twee hê nie.

3. Hierdie oefening is belangrik, en sal van tyd tot tyd in ietwat verskillende vorm herhaal word. ²Die mikpunt hier is om jou die eerste stappe te leer na die einddoel om die betekenislose van die betekenisvolle te skei. ³Dit is die eerste poging in die langtermyn doel om die betekenislose buite jou te leer sien, en die betekenisvolle binne jou. ⁴Dit is ook die begin daarvan om jou geestesdenke te oefen om te herken wat dieselfde is en wat verskillend is.

4. Tipeer elke gedagte wat jy vir die toepassing van die idee van vandag gebruik volgens die sentrale figuur of gebeurtenis wat dit bevat, byvoorbeeld:

²Hierdie gedagte oor __________ beteken niks nie.

³Dit is soos die dinge wat ek in hierdie kamer

(in hierdie straat, ensovoorts) sien.

5. Jy kan ook die idee gebruik vir enige spesifieke gedagte wat jy as skadelik beskou.

²Hierdie gebruik is nuttig, maar is nie ’n plaasvervanger vir die meer willekeurige werkwyses wat tydens oefeninge gevolg moet word nie. ³Moet egter nie jou geestesdenke vir langer as ongeveer ’n minuut ondersoek nie. ⁴Jy is nog te onervare om die neiging te vermy om doelloos in gedagtes versonke te raak.

6. Omdat hierdie oefeninge bowendien die eerste van hul soort is, mag jy dit besonder moeilik vind om alle oordeel in verband met gedagtes op te skort. ²Moenie hierdie oefeninge meer as drie of vier keer gedurende die dag herhaal nie. ³Ons sal later daarna terugkeer.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 4: These thoughts do not mean anything. They are like the things I see in this room [on this street, from this window, in the place]. (ACIM, W-4)

Les 3 – Ek begryp niks wat ek in hierdie kamer sien nie.

Ek begryp niks wat ek in hierdie kamer

(in hierdie straat, uit hierdie venster, op hierdie plek) sien nie.

1. Pas hierdie idee op dieselfde wyse as die voriges toe, sonder om enige onderskeid te maak. ²Wat jy ook al sien, word ’n gepaste voorwerp om die idee op toe te pas. ³Maak seker dat jy nie die geskiktheid van enigiets om die idee op toe te pas, bevraagteken nie. ⁴Hierdie oefeninge is nie oordeelsoefeninge nie. ⁵Alles is geskik as jy dit sien. ⁶Sommige van die dinge wat jy sien, mag emosiebelaaide betekenis vir jou hê. ⁷Probeer om sulke gevoelens opsy te sit en behandel hierdie dinge bloot soos jy al die ander sou behandel.

2. Die doel met die oefeninge is om jou te help om jou geestesdenke te suiwer van alle vorige assosiasies, om dinge presies te sien soos hulle nou vir jou voorkom en om te besef hoe min jy regtig daarvan begryp. ²Dit is dus belangrik dat jy by die keuse van die dinge waarop vandag se idee toegepas gaan word, jou geestesdenke volkome oop sal hou, onbelemmerd deur enige oordeel. ³Vir hierdie doel is een ding soos die ander, ewe geskik en daarom ewe bruikbaar.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 3: I do not understand anything I see in this room [on this street, from this window, in this place]. (ACIM, W-3)

Les 2 – Ek het aan elke ding wat ek in hierdie kamer sien, al die betekenis gegee wat dit vir my het.

Ek het aan elke ding wat ek in hierdie kamer

(in hierdie straat, uit hierdie venster, op hierdie plek)

sien, al die betekenis gegee wat dit vir my het.

1. Die oefeninge met hierdie idee is dieselfde as dié met die eerste een. ²Begin met die dinge wat naby jou is en pas die idee toe op enigiets waarop jou oog val. ³Brei dan die veld uit. ⁴Draai jou kop sodat jy alles aan weerskante kan sien. ⁵As dit moontlik is, draai jou om en pas die idee toe op dit wat agter jou was. ⁶Bly so willekeurig en so vry as moontlik in jou keuse van onderwerpe om die idee op toe te pas, moenie op enigiets spesifieks konsentreer nie en moenie probeer om alles wat jy in ’n gegewe area sien in te sluit nie, of jy sal spanning veroorsaak.

2. Kyk bloot gemaklik en redelik vinnig rondom jou heen en probeer vermy om volgens grootte, helderheid, kleur, of materiaal wat vir jou relatief belangrik mag wees, te kies. ²Neem die voorwerpe eenvoudig soos jy hulle sien. ³Probeer om die oefening ewe gemaklik op ’n liggaam of ’n knoop, ’n vlieg of ’n vloer, ’n arm of ’n appel, van toepassing te maak. ⁴Die enigste kriterium om die idee op iets toe te pas, is bloot dat jou oog daarop geval het. ⁵Moenie probeer om iets spesifieks in te sluit nie, maar maak seker dat ook niks spesifieks uitgesluit word nie.

👍 Like & Comment on YouTube

✨ Geïnspireer deur die kernboodskap van die Kursus:

“Niks wat werklik is kan bedreig word nie. Niks wat onwerklik is bestaan nie. Hierin lê die vrede van God.”

📚 Lees meer oor die Kursus: www.acim.org

Lesson 2 – I have given everything I see in this room [on this street, from this window, in this place] all the meaning that it has for me. (ACIM, W-2)

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

✨ Geïnspireer deur die kernboodskap van die Kursus:

Ek het aan elke ding wat ek in hierdie kamer

✨ Geïnspireer deur die kernboodskap van die Kursus:

Sluit aan by ons e-poslys